Read lubukusu Yer. 47 Bible Online

Yer. 47 - lubukusu bible

Yer. 47

¹ Wele Omunyali Owa Bioosi alomaloma ne omung'oosi Yeremia khuloondekhana ne Bafilisiti omwami Farao ne akhebwaakala Kasa tawe.

²Wele Omunyali Owa Bioosi aloma ali, “Lola kameechi kalikho kenyokha khukhwama e bunaswa, mala kalabisia nga luluuchi lulwichuule, kalechula sibala kafuunikhe buli siindu. Kalechula chingoba mala kamile abo bachimenyilemo babaandu balakukuula khulwe khukhwenya buyeeti buli mundu omenyile mu sibala esio alalila lukali.

³Balaulila lutiri lwe chifarasi ne chitima, balaulila liuuma lie kamakaari ke liie ne katima, ne lipiringikha lie kimikuu kiako, nio basaasi se baliekhebukha babaana babwe tawe, kamakhono kabwe kalakataala.

⁴Siise siolile sie khubunia Bafilisiti, khusikhala khukhwama khu Tiro ne Sidoni boosi banyala baba be buyeeti. Ese Wele Omunyali Owa Bioosi ndikho nja khubunia Bafilisiti boosi babama khu nyanja eya Kirete.

⁵Bubeeleli bukali bwechile khu baandu ba Kasa ne babaandu ba Ashikeloni basilile busa Ne babaandu ba Filisiti balalila khukhwola siise siina?

⁶Mulila ne muloma muli, ‘Mbalu eya Wele Omunyali Owa Bioosi! Olachiililila khukhwira khukhwola siise siina? Yikobosia mu sibaabi siowo mala oolelemo osile busa!’

⁷Ne kakhali embalu eya Wele Omunyali Owa Bioosi esila eriena? Kaaba bali Wele Omunyali Owa Bioosi niye okilakile? Akilakile yibwaakale lukoba lwa Ashikeloni ne babaandu bamenyile mu sibala sie khu nyanja.”