Read lubukusu Yer. 48 Bible Online

Yer. 48 - lubukusu bible

Yer. 48

¹ Wele Omunyali Owa Bioosi, Wele owa Isiraeli aloma kano khuloondekhana ne Maobu: “Sibala sia Nebo sialaamiilwe, sikila sianjuukhwe! Lukoba lwa Kiriataimu lwatiliilwe mala lwanyoolile chisoni, lukoba lusire lwakwile mala lwaambilwe chisoni.

²Efuma eye sibala sia Moabu se eliio lundi tawe, basiku batiilile lukoba lwa Heshiboni, bafukiilisiana khurusiao ekholo eya Moabu ne baloma bali, ‘Yiicha, lekha khubabunie, bakhaba ekholo tawe!’ Lukoba lwe balalu lwosi lulasila chi. Banamae balalwibwaakala.

³Babaandu ba Horonaimu balila bali, sisiayuumba! Libuna!

⁴Sibala sia Moabu sionaakwe, bililo biuliilikhana biola Soari.

⁵Ulila khulila khabwe khu ngila echa Luhiti, lilila lisaba buyeeti biuliilikhana khukhwola Horonaimu.

⁶Yilukha! Yeonia mwabeene! Ba nga epunda eye mu siangalaamwe!

⁷“Sikila enywe baandu ba Moabu mweyikina kamaani kenywe ne kimiaandu, akhaba mwesi mulatiilwa mu mbaambe, ne wele wenywe Chemoshi yesi alacha mu mbaambe, alala ne basaayi bewe ne babemeelesi.

⁸Omwonaki alecha khu buli lukoba, ne se luliio lukoba lulebacha tawe, sibala sie litooma silabuna ne sibala sie kumweyeeywe silonakwa, bulayi bwene nga Wele Omunyali Owa Bioosi ne alomile.

⁹Limila sibala sia Moabu eng'ani sikila sicha khubuna chingoba chasio chilaba kamakuunda omundu se alamenyamo tawe.

¹⁰Omundu okhola kimilimo kia Wele Omunyali Owa Bioosi kalaa alaamwe. Omundu okhenya khuchukha sifuki mwiie tawe alaamwe!”

¹¹Wele Omunyali Owa Bioosi aloma ali, “Sibala sia Moabu siamenya mu muleembe khukhwama khale, siikhayilwakho mu mbaambe tawe. Maobu sili nga endali eyakwalaala mu nyuungu niyo bakhachukha mu nyuungu omu ne nomu tawe, echamu yayo ekhatibiakho bulayi bwayo tawe, ne echamu yasio eli busa nga yaba.”

¹²Khwako Wele Omunyali Owa Bioosi aloma ali, “Chindaalo chilikho chiicha nicho khasirumire babaandu bakhasikholekho kumulimo. Bakhachukhe bie khunywa biabwe birure mu nyuungu mala, baarakake chinyuungu mu bikolonjo.

¹³Nio Moabu siliaambwa chisoni ne wele wabwe Chemoshi, bulayi bwene nga enju eya Isiraeli ne yaambwa chisoni sikila wele Beteli niye baba ne beyikina.

¹⁴“Baandu ba Moabu, siina sikila enywe ne muboola muli ‘Efwe khuli bakhili lundi banamae be kamaani?’

¹⁵Ese ndi Omwami Wele Omunyali Owa Bioosi, Omwonaki owa Moabu ne chingoba chasio nechile, ne basoleeli baele balayi basio balerwa.

¹⁶Libuna lia Moabu lili siimbi ne buchuuni bwasio bulikho bwicha khangu.

¹⁷Enywe mumenyile siimbi, lila sibala esio, ne nabo boosi bamanyile efuma yasio loma muli, ‘Bubwami bwe kamaani bwakwiile, luyali ne kamaani kalwo biaweele!’

¹⁸“Ee, enywe mumenyile mu Diboni! Yiikha khukhwama khu luyali lwenywe, mala mwikhale asi mu lipukhuulu, sikila Omwonaki owa Moabu echile, khukhwonakaka chingoba chenywe chisire.

¹⁹Ee enywe mumenyile mu Aroeri! Yiima khu ngila muloleelele, Reeba abo balikho belukha, reeba muli, ‘Siina sisiekholeekhe?’ ”

²⁰Balakobosia bali, “Moabu yaambisiibwe chisoni, sikila yafunakaakwe; kukuula, lila! Langilila khu luuchi lwa Arinoni, muli Moabu yabunisiibwe elala.”

²¹“Bukhalaki bwechile khu ngoba che sibala sie kumweyeeywe. Bwechile khu lukoba lwa Holoni, Yahisa ne Mifaati.

²²Bwechile akhaba khu Diboni, Nebo ne Betitibulataimu.

²³Akhaba Kiriataimu, Betikamuli, Betimeoni,

²⁴Keriosi, Bosira alala ne chingoba choosi che mu sibala sia Moabu che aleeyi ne che aembi choosi bukhalaki bwachichilekho.

²⁵Wele Omunyali Owa Bioosi aloma ali, ‘Kamaani ka Moabu kasiruriremo mala bunyali bwasio bwaweele.’ ”

²⁶Wele Omunyali Owa Bioosi aloma ali, “Meesia Moabu, sikila sieniinia sialeka Wele Omunyali Owa Bioosi. Nio Moabu silakwa asi sipiringikhe mu marusio kasio mala baandu balasichekha.

²⁷Baandu ba Moabu, khebulila muli enywe mwachekha Isiraeli! Enywe mwebaasia muli banyoolekha mu befwi, nio buli lwosi ne mwalomalomanga kakabwe mwasisiikhanga kimirwe?

²⁸Ee, enywe mumenyile mu Moabu, yanjukha chingoba mala mumenye mu mbangaachi! Ba nga liuusi liliombakha siswi siasio amunwa kwe libina.

²⁹Khwaulila khukhwebonia khwa Moabu siebonia lukali, khwaulila lilieniinia liasio khukhwelola khukhwefumia ne sileka ne lilibaasia lie kimiooyo kiabwe.”

³⁰Wele Omunyali Owa Bioosi aloma ali, “Ese manyile ekitiaabi eya Moabu, liliebonia liasio lili lie bubeeyi, bikholwa biasio bili bie bubeeyi.

³¹Khwako ndila Moabu Ndakukuulila Bamoabu boosi, ndalila babaandu ba Kiri-Hareseti.

³²Mulila enywe babaandu ba Sibima lukali, khukhila babaandu ba Yaseri! Nikwo chisakia chakwo chacha choola khu nyanja e Yaseri. Bibiaamo bienywe bie mu simiyu ne chisabibu. Omwonaki ebwakaale.

³³Busangaafu ne liliekhoya biarusiibweo biarusiibwe mu sibala sie ngakha sia Moabu. Ese nakholile endali ekharura mu bisuuriro tawe, biakhabao bikalakala, se bilaba bikalakala bie khusuura endali tawe.

³⁴“Babaandu be lukoba lwa Heshiboni nende ba Eleale bakukuula. Kimimilo kiabwe kiola Yahasi. Khukhwama Soari khukhwola Horonaimu ne Ekilatisielishiya chingukuulo chong'ene. Sikila akhaba kameechi ka Nimurimu kosi kateenyile.

³⁵Ne Wele Omunyali Owa Bioosi aloma ali, ‘Ndarusia mu Moabu omundu oaana chimbosio abuundu aesuta ne khukhwosia biiunya bulayi khu wele wewe.’

³⁶“Khwako kumwoyo kwase kusooma Moabu ne babaandu be siseecha ba Kiri-Hareseti nga omundu oupa kumulele ne emba kumwenya kwe kamasika. Buli siindu nisio banyoola siatibile.

³⁷Boosi babekile kamachuune kabwe ne khubeka bunwanwa. Boosi bali ne chimbala khu makhono kabwe mala beboyile kamakunia munda.

³⁸Khu ngaaki khwe chinju choosi cha Moabu nende buli mu sikuuri, lisooma liong'ene. Wele Omunyali Owa Bioosi aloma ali, ‘Sikila narakaake Moabu nga owara enyuungu niyo babaandu baloba.

³⁹Moabu efunakaakwe lukali! Babaandu ba Moabu bakukuula bariena! Moabu siaambisiibwe chisoni lukalipo! Sibala sia Moabu siekelile chinjekho lundi siriisia khu baandu baali siimbi nasio.’ ”

⁴⁰Wele Omunyali Owa Bioosi aloma ali, “Lola, ekholo ekhapurukhe ekwe khu Moabu nga efuruusi, mala ebambule chindaa chayo khu Moabu,

⁴¹Chingoba cha Moabu chilibukulwa ne chingoba chisire chiliaambwa. Kimiooyo kie banamae ba Moabu mu ndaalo ng'eneyo kiliba nga kumwoyo kwo mukhasi olumwa,

⁴²Moabu elionakwa mala se elaba ekholo lundi tawe, sikila yeniinia yakholela Wele Omunyali Owa Bioosi sileka.”

⁴³Wele Omunyali Owa Bioosi aloma ali, “Ee enywe baandu ba Moabu, busiku, kamaloo ne buuko biamulindiliile.

⁴⁴Yesi yesi owilukha busiku alakwa mwiloo, ne oyo oniina arure mwiloo alakwa mu buuko sikila Wele Omunyali Owa Bioosi alareera busiku buno khu Moabu mu mwiiko kwe siiukuumo siabwe.

⁴⁵“Babelukha liie bakhaka khukhweyikama mu siniini sia Heshiboni, ne se bali ne kamaani tawe, sikila kumulilo kwaburuukhe mu Heshiboni lumemu lwamile munju eya Sihoni lwosiisie bubweeni bwa Moabu ne khurusiao bunyali bwe babaandu be kukwebonio.

⁴⁶Muli ne silaamo Bamoabu! Babaandu basayaanga wele Chemoshi babunile, sikila basoleeli benywe bayiliilwe mu mbaambe akhaba bakhaana benywe bosi.”

⁴⁷Wele Omunyali Owa Bioosi aloma ali, “Kakhaba kario khakobosieo lundi chikhabi cha Moabu mu ndaalo chichiicha.” Bukhalaki khu Moabu buwela ao.