Read lubukusu Yer. 49 Bible Online

Yer. 49 - lubukusu bible

Yer. 49

¹ Wele Omunyali Owa Bioosi aloma ari khuloondekhana ne Baamoni “Baisiraeli se bali ne basoleeli tawe? Se bali ne nabo babeela khu miaandu kiabwe tawe? Siina sikila nono basaaya wele Milikomu ne babukula kamaloba ke kholo eya Kati, mala bamenyile mu chingoba chako?

²Khwako Wele Omunyali Owa Bioosi aloma ali, lola chindaalo chilikho chiicha ndikhola chingukuulo che liie chiuliilikhane mu Raba, lukoba lwe Baamoni lulianjukhwa, lukwe ne birekere bialwo biliosibwa, nio Baisiraeli abo balioona abo ba babaoona.

³“Ee, Heshiboni kukuula sikila lukoba lwa Ai lwabunile! Kukuula, ee bamenywa ba Raba! Yefwara kamakunia mu bubeeleli sooma, ne mutima ne mwoola eyi neyi mu masiisi sikila wele Milikoni alacha mu mbaambe, alala ne basaayi bewe ne babemeelesi.

⁴Siina sikila ne mwibonesilia mu matooma kenywe, enywe babaandu bataamba lisuubila, mweyikina kimiaandu kienywe ne muloma muli, ‘Naanu olikhwibwaakala efwe?’ ”

⁵Omwami WELE we banamae aloma ali, “Lola, ndamureerera butinyu khukhwama khu nibo mwetikiyana ne enywe, buli mulala alelukha, ne se aliio olibuusia babelukha liie tawe.

⁶“Ne kakhali enyuma wako, khakobosieo chikhabi che Baamoni.”

⁷ Wele Omunyali Owa Bioosi aloma khuloondekhana ne Edomu ali, “Bukesi mu lukoba lwa Temani mu Edomu se bulimo lundi tawe? Bukeleki bwaweele mu baandu bakesi? Bukesi bwabwe bwaweele?

⁸Baandu ba Dedani yilukha mala mwekise, ndikho nja khubunia lisaaye lia Esau! Sikila siise siolile sie khubaukuuma.

⁹Kaaba bali babaandu babuta chisabibu ne bamwichakho, se banyala balekhakho chisabibu ndiiti chiri tawe ku? Kaaba bali babefwi becha siilo, se beeba busa nibio banyala khusuta biong'ene tawe ku?

¹⁰Ne kakhali ese nachuliile elala lisaaye lia Esau nasimbuule bubwikisilo bwabwe mala luno se banyala khukhwekisa tawe. Babaana ba Esau ne bawandaaye ne bamenyile siimbi boosi babunile se aliio oramire tawe.

¹¹Ndekhele ese bafuubi, mala ndabaliinda, ne lekha banamulekhwa benywe banjeyikine ese.”

¹²Wele Omunyali Owa Bioosi aloma ali, “Kaaba bali abo bakholaana siiukuumo tawe, baukumwa, khulwe khunywela mu sikoombe sie siiukuumo, enywe mwibaasia muli se mulaukuumibwa tawe ku? Tawe, khukhwola munywele mu sikoombe esio.”

¹³Wele Omunyali Owa Bioosi echubile ali, “Lukoba lwa Bosira lulaba luriisia, lwe chinjekho, lulanjukhwa, lundi lwe silaamo ne chingoba chalwo chindiiti choosi se chilamenywamo tawe khulwa mindali.”

¹⁴Ese Yeremia ndoma ndi, “Edomu, nanyoolile burume khukhwama khu Wele Omunyali Owa Bioosi. Arumire omurumwa khuboolela babaandu babuusie banamae babwe berekekhe khukhwibwaakala.

¹⁵Wele Omunyali Owa Bioosi alikho acha khukhumala kamaani, ne se aliio olakhuria ewe tawe.

¹⁶Khukhwebonia khwowo khwakhutibiisie mbao okhuria ewe nga wibaasia tawe. Omenyile mu mbangaachi che chingulu ne wakhaba ne omenyile angaaki nga efuruusi, ese ndakhwikhisia okwe asi. Ese Wele Omunyali Owa Bioosi nalomile.”

¹⁷Wele Omunyali Owa Bioosi aloma ali, “Libuna lilecha khu Edomu lilaba liboofu lundi liriisia, buli sia mulala obirao aliesiindukha mala auke.

¹⁸ Bibiindu bibiekholekha khu Sodomu ne Komora nibio bibieene bikhekholekhe khu Edomu. Chingoba echo ne chichaba siimbi chabuna. Se aliio olichimenyamo lundi tawe.

¹⁹Lola lili nga etalang'i mu bichakha bia Yoritani ne yiicha khukhwebwaakala siko sie kamakheese sie kamaani. Nja khukhola Baedomu belukhe barure mu sibala siabwe, ne ndarobora omwami okona abamiie. Naanu oli nga ese? Naanu onyala wanjalaala ese? Omwaayi aliio onyala ambingania ese ku?

²⁰Khwako ulila lirekekha nilio ese Wele Omunyali Owa Bioosi ndekeekhe khu Edomu ne niko mbisiisie khukhola khu baandu be lukoba lwa Temani. Akhaba babaana bosi balatiilwa. Buli mundu aliesiindukha.

²¹Endaalo eye likwa lie babaandu ba Edomu, sibala siliterema mala khulila khwabwe khuliuliilikha khwole sia Nyanja Embesemu.

²²Lola, omusiku alibwaakala Bosira, abambule chindaa chewe khu lukoba mala apurukhe khangu oli efuruusi. Ne endaalo eyo kimiooyo kie banamae ba Edomu kiliba nga kumwoyo kwo mukhasi olumwa.”

²³ Kano niko Wele Omunyali Owa Bioosi aloma khuloondekhana ne Damasika. “Babaandu be mu ngoba cha Hamati ne Aripadi beendekheleele, sikila bauliile burume bubi. Bayenguukhe mu buri mala banaanisibwa nga enyanja, ekhasila tawe.

²⁴Babaandu ba Damasika batekhelaane mala belukhe ne buri bwabaambile, bali mu buchuuni ne burafu nga omukhasi olumwa,

²⁵lukoba lulwaba lwe fuma, ne busangaafu lwanjukhiilwe elala.

²⁶Khwako basoleeli balwo balererwa khu ngila ne banamae balwo boosi balibuna endaalo eyo.”

²⁷Ndiosia kamasiisi ka Damasika, lundi khosie kamachipi ko mwami Beni-hadadi.

²⁸Wele Omunyali Owa Bioosi aloma khuloondekhana ne kholo eya Kedari ne bubwami bwa Hasori nibwo Nebukadinesa omwami owa Babiloni aula ali, “Yinyokha mwibwaakale Kedari! Bunia babaandu be ebukwe abo!

²⁹Kamaeema kabwe ne bibiaayo bilabukulwa akhaba chipasia chabwe che kamaeema ne kimiaandu kiabwe kioosi chingamia chabwe chikhasaalile aleeyi khukhwama khu nibo, ne babaandu balila bali, ‘Butinyu buli buli abuundu.’ ”

³⁰Wele Omunyali Owa Bioosi aloma ali, “Yilukha, cha aleeyi mwikise mu mbangaachi che kamabaale, ee baandu ba Hasori! Sikila Nebukadinesa omwami owa Babiloni akholile lirekekha libi khwinywe, mala abisiisie sikholwa siibi khwinywe.

³¹Yinyokha mwibwaakale ekholo emenyile mu muleembe, eli bulayi ekholo etamba bilibwa namwe chinjiki emenyile busa yong'ene.”

³²Wele Omunyali Owa Bioosi aloma ali, “Chingamia chabwe chiliaaywa, ne chikhaafu chabwe chilinuulwa. Ndisalanisia buli abuundu mu mbeo abo babekanga binyoosi Ne khabareerere butinyu khukhwama buli abuundu.

³³Lukoba lwa Hasori lukheekele sichiimi sie chingibwe, abuundu aanjukhwa khulwa mindali, se aliio omundu olimenyamo tawe, ne se aliio omundu olichamo tawe.”

³⁴Mu khurakikha khwe khukhwamiia khwo mwami Sedekia owa Yuda, omwami alomaloma no mung'oosi Yeremia. Amuboolela kamakhuwa khuloondekhana ne Elamu.

³⁵Aloma ali, “Lola, ndafunaka buyiingo bwa Elamu, kamaani kabwe.

³⁶Ne ndareera khu Elamu embeo khukhwama chimbeka choosi chine mala salanisie babaandu basio buli lubeka. Se siliio sibala nisio omundu owa Elamu khu bakhaonwe barure mu Elamu akhalichamo tawe.

³⁷Khareengie Elamu ebweeni we basiku babwe ne nabo bayiima khubeera, khabareerere butinyu, lirima liase lirafu, khabaloondiekho liie khukhwola nga mbabunia.

³⁸Enyuma wako khareere bubwami bwase mu Elamu mala mbunie omwami wasio ne babemeelesi.”

³⁹Wele Omunyali Owa Bioosi aloma ali, “Mu ndaalo chichiicha khakobosiele Elamu chikhabi.”