Read lubukusu Yer. 5 Bible Online

Yer. 5 - lubukusu bible

Yer. 5

¹Enywe baandu ba Yerusalemu, Tima khu ngila cha Yerusalemu, ne mwola eyi neyi, lola mala mubone! Yiima niio bakusilia bibiindu, munyala mwanyoola omundu okhola ka ng'ali? Okhaka khuba omuluungi khu Wele? Kaaba bali onyoola, Wele Omunyali Owa Bioosi alabeela Yerusalemu.

²Bakhaba ne bechuba bali, “Nga Wele Omunyali Owa Bioosi ne amenyile mindali,” bechuba busa bubeeyi.

³Wele Omunyali Owa Bioosi ewe soyimanga bung'ali? Ewe wabapile, ne se baulila tawe, ewe wababuniisie, ne baloba likololosia. Babeele ne sileka sikali. Baalobile khukhwekanila.

⁴Nio naloma ndi, “Bano bali bataamba lundi bakhali ne limanya tawe, bali basilu busa, sikila se bamanyile niko Wele wabwe enya tawe, niko Wele Omunyali Owa Bioosi enya bakhole tawe.

⁵Ndacha khu be bunyali, mala ndomalome nabo, sikila bamanyile engila ya Wele Omunyali Owa Bioosi, lilaka lia Wele wabwe.” Ne kakhali boosi baloba lilaka lia Wele Omunyali Owa Bioosi, nio balekha khumuria.

⁶Khwako chitalang'i khukhwama mu musiru chilabeera, bisuuche khukhwama mu siangalaamwe bilababunia. Chingwe chalindiilile chingoba chabwe, buli mundu orura mungoba echo alatabulwamo bitonyi, sikila bubwoni bwabwe buli bukali, ne buli siise baukhanga khukhwama khu Wele.

⁷Ese nyala namubeela enywe ndiena? Babaana benywe banjanjukha, mala bechubile mu masina ke bawele bakhali ba ng'ali tawe. Nga nabalisia bekura, bakhola bueeyi, ne khubusiana mu chinju che baeeyi.

⁸Baaba nga chifarasi chiuunwa chichikuure, Buli mulala ekoomba omukhasi wo wasie.

⁹Wele Omunyali Owa Bioosi areeba ali, “Ese se ndabaukuuma sikila bibiindu bino ta ku?” Ne se ndeyacha ekholo nga yino ta ku?

¹⁰Wele Omunyali Owa Bioosi aloma ali, “Ndaruma basiku baremakake, kimisabibu kie babaandu base, ne se balarema kioosi tawe, balachura chisakia chakio, sikila ching'enechi se chili chichase tawe.

¹¹Sikila enju eya Isiraeli nende eya Yuda, se chabeele ne busuubilwa khwise ne atiiti ene tawe.”

¹²Balomile bubeeyi khu Wele Omunyali Owa Bioosi, lundi balomile bali “Se alakhola siindu tawe, butinyu se bulakhwichakho tawe, efwe se khulibona liie namwe enjala tawe.

¹³Bang'oosi se bali siindu tawe, nibo bali embeo busa, sikila elomo ya Wele se ebalimo tawe.” Khwako kalaba kario khu nibo babeene!

¹⁴Khwako Wele Omunyali Owa Bioosi, Wele owe bunyali aloma ali, “Sikila balomaloome likhuwa lino, lola ndikho khola kamakhuwa kaase kabe nga kumulilo mukhanwa mwowo, ne babaandu bano balaba nga chiikhu mala kumulilo kulababunia.”

¹⁵Wele Omunyali Owa Bioosi aloma ali, “Be nju eya Isiraeli ndikho mureerera ekholo eya aleeyi, eli ekholo eye kamaani, eli ekholo ekhale, ekholo niyo enywe mukhamanyile lulomo lwayo tawe, namwe mwaulila niko baloma tawe.

¹⁶Basuta buembo bali basikari be kamaani, beera ne se bali ne siisa tawe.

¹⁷Balalia bikeswa bienywe ne biakhulia, balalia babaana benywe basoleeli ne bakhaana, balalia kamatuuli kenywe ke bibiaayo ne chikhaafu, balalia chisabibu chenywe ne chinduli, chingoba chenywe chisire nicho mweyikina, chilatechulwa mwiie.”

¹⁸“Ne akhaba mu ndaalo echo, Wele Omunyali Owa Bioosi aloma ali, se alimubunisilia elala tawe

¹⁹Ne babaandu benywe ne bareeba bali, ‘Siina sikila Wele Omunyali Owa Bioosi Wele wefwe nakhukholeele efwe bibiindu bino bioosi?’ Mubaboolela muli, ‘Sikila enywe mwandekha ese mala mwasaaya bawele be chikholo chichiindi mu sibala sienywe. Nono mukhakholele baakwa mu sibala siikhali sisienywe tawe.’ ”

²⁰Wele Omunyali Owa Bioosi aloma ali: “Boola likhuwa lino khu baandu ba Yakobo, liboole mu Yuda ne oloma oli,

²¹ Ulila lino enywe baandu basilu lundi bakhali ne limanya tawe. Muli ne chimoni ne se mubona tawe, muli ne kamaru ne se muulila tawe.

²² Eku, enywe se mundiakho ese tawe? Se muterema ebweeni wase tawe? Nara kumuyekhe mu nyanja kube lulwakha lwayo, lukhiingilila lundi luukhawao tawe nio kameechi ke nyanja kakhabira tawe, akhaba bibuli ne bipa se binyala biakutuuma tawe.

²³Ne kakhali babaandu bano bali banaania lundi bali ne sileka, bangalukhaanekho mala bandekhile,

²⁴se bebaasia mu miooyo kiabwe bali, ‘Lekha khurie Wele Omunyali Owa Bioosi, Wele wefwe, okhuelesianga efula mu siise siayo, efula eye siruumbi ne fula eye kumunaane, mala akhuelesia kamachuuma niko akhuroborera ke likesa’ tawe.

²⁵Bumayaanu bwenywe bwakhingiliile bino, bubwoni bwenywe bwamwimaane enywe bilayi.

²⁶Sikila babaandu bamayaanu banyolekha mu baandu baase, bebuliile babaandu oli bareka buboche khutiila chinyuni, bareka khutiila babaandu.

²⁷Nga kutabuku kukhwichuule chinyuni, chinju chabwe chechula bunuuli, khwako babeele ne bunyali ne buiinda,

²⁸babeele banefu lundi bamiliiu. Se bamanyile lulwakha lwe bumayaanu tawe, se bakhalaka bung'ali tawe, se bayeeta bafuubi tawe, lundi se bakholela bung'ali babanani tawe.”

²⁹Wele Omunyali Owa Bioosi areeba ali, “Ese se ndabaukuuma khulwe bibiindu bino tawe ku? Ne se nyala neyacha khu kholo nga niyo tawe ku?

³⁰Sisiindu simayaanu lukali, lundi sie khuriisia siekholeekhe mu sibala.

³¹Bang'oosi bang'oola bubeeyi, ne basaayi bamiia nga bang'oosi ne bababoolela, babaandu base basiima kabe kario, ne bakhakhole bariena sisiakamo ne sikhoole?”