Read lubukusu Yer. 50 Bible Online

Yer. 50 - lubukusu bible

Yer. 50

¹ Kano niko kamakhuwa niko Wele Omunyali Owa Bioosi alomaloma khuloondekhana ne Babiloni, sibala sie Bakalitayo khubirira khu mung'oosi Yeremia:

²“Boolela babaandu kamakhuwa kano, yilwacha mulomo muli, ‘Babiloni lwabukuliibwe wele walwo Beli aambiilwe chisoni Merodaki wele wabwe achangalaalile bifwaani biabwe biachangalaalile. Mukhabakisakho siindu tawe.’

³“Sikila ekholo khukhwama ebunaswa yechile khukhwibwaakala Babiloni. Elakhola sibala sibe sichiimi, ne se siliio silasimenyamo tawe. Babaandu ne chisaang'i bilelukha.”

⁴“Wele Omunyali Owa Bioosi aloma ali, mu ndaalo echo ne mu biise ebio, babaandu ba Isiraeli ne babaandu ba Yuda, bakhebuusie alala mala beche ne balila. Balimbenja ese Wele Omunyali Owa Bioosi, Wele wabwe.

⁵Balireeba engila echa Sayuni mala bachile khu ngila ng'eneyo baliloma bali, ‘yiicha khuambaane ne Wele Omunyali Owa Bioosi mu ndakaano eya mindali ekhaliibililwa tawe.’

⁶“Babaandu base babeele nga kamakheese niko babaayi batibisiilie mu bikulu. Batibile oli kamakheese kakama khu sikulu silala ne kacha khu siindi, mala bebiliile litaala engo wabwe.

⁷Boosi ba banyoola babebwaakala. Basiku babwe baloma bali, ‘Efwe se khuli ne kumusaango tawe, sikila babene bakholela Wele Omunyali Owa Bioosi bubwoni. Bakuuka babwe beyikina Wele Omunyali Owa Bioosi andi bosi bara lilieyikina liabwe mu niye.’

⁸ “Wele Omunyali Owa Bioosi aloma ali, ‘Baandu ba Isiraeli, yilukha mu lukoba lwa Babiloni! Ruura mu sibala sie Bakalitayo. Ba be khunyoa, khururamo.

⁹Sikila ese nja khusokosia mala ndeere khu Babiloni sipupu sie chikholo chimboofu khukhwama mu sibala sie bunaswa mala balebwaakala Babiloni. Balalwibwaka mulala sia mulala mala baluule. Bali banamae barana bakhaloota busa tawe.

¹⁰Babiloni lulanuulwa ne boosi balunuula balibukula bioosi nibio benya. Ese Wele Omunyali Owa Bioosi nalomile.’ ”

¹¹Wele Omunyali Owa Bioosi aloma ali, “Babaandu ba Babiloni, mwanuula ekholo yase, mwasangaalile lundi mwekhoyile nga emoosi mu mayilwe lundi nga chifarasi ne chichina.

¹²Ne kakhali lukoba lwenywe luboofu lulaambwa chisoni mala luchangalaale. Ekholo eya Babiloni elaba ekholo eye asi khu kholo choosi, sibala silaba sisiangalaamwe sisioomu siikhalimo kameechi tawe.

¹³Sikila bukhalafu bwa Wele Omunyali Owa Bioosi, se silimenywamo tawe. Ne kakhali silianjukhilwa elala. Buli mundu osibiramo akhesiindukhe, mala auke sikila kasiekholekhakho.

¹⁴Enywe mweesi banamae kara lukoba lwa Babiloni mulwibwaakale lulase buembo ne mukhasikasiakho luembo tawe, sikila lwakholile bubwoni khu Wele Omunyali Owa Bioosi.

¹⁵Langilila liie khu Babiloni buli abuundu, babaandu ba Babiloni, chinjeko chalwo chakwiile, kamasiisi kalwo katechuulwe, sikila lino lili liliyacha lia Wele Omunyali Owa Bioosi Yiyacha Babiloni, bakholele niko bakholela babaandi.

¹⁶Omumiichi akharamakho mu Babiloni tawe, namwe okesa akhabukula engeso akese mu siise sie likesa tawe, sikila liie lio musiku, buli mundu alikobola ewabwe, ne buli mundu aliilukha akobole mu sibala siewe.”

¹⁷Wele Omunyali Owa Bioosi aloma ali, “Babaandu ba Isiraeli bali nga kamakheese kayiimwa ne chitalang'i. Omwami owa Ashuru niye owanyoa abebwaakala, ne ekhumaliilikha omwami Nebukadinesa owa Babiloni abafunaake kamakuumba.”

¹⁸Khwako, Wele Omunyali Owa Bioosi, Wele we Baisiraeli aloma ali, “Lola ese ndikho ndeera siiukuumo khu mwami owa Babiloni ne mu sibala siewe bulayi bwene nga ne naukuuma omwami owa Ashuru.

¹⁹Khakobosie Baisiraeli mu sibala siabwe, bakhalie biakhulia bimiichwa khu sikulu sia Karimeli ne mu lukoongo lwa Basiani, mala bakhalie biakhulia bioosi bimiichwa mu bibala bia Efuraimu ne mu Kileati bekure.

²⁰Ne siise esio ne sikhoole, bubwoni se buliba mu Isiraeli namwe bumayaanu mu Yuda tawe. Kaliba kario sikila ese ndibeela abo nibo naramia. Ese Wele Omunyali Owa Bioosi nalomile.”

²¹Wele Omunyali Owa Bioosi aloma ali, “Cha mwibwaakale sibala sia Merataimu ne bamenywa ba Pekoti. Beere mala mubabunisilie elala, mala khola koosi niko ese mulakiliisie.

²²Lukukuulo lwe liie lulikho luuliilikha mu sibala, mala lilionaka likali liliio.

²³Babiloni siebwaakala sibala sioosi, ne luno kamaani kabwe kabaweele. Chikholo choosi chesiinduukhe khu sibala esio.

²⁴Ee, Babiloni nakhureka buko mala bwakhuamba, ne se wamanya tawe, wanyolekhana mala watiilwa sikila wayingana ne Wele Omunyali Owa Bioosi.

²⁵Wele Omunyali Owa Bioosi erekeekhe ne bulwaani bwewe, mala arusiisie bulwaani mu lirima liewe, sikila Omwami WELE we banamae ali ne kumulimo khukhola mu sibala sie Bakalitayo.

²⁶Khemwiche khukhwama chimbeka choosi mwibwaakale Babiloni, funaka bibiaki bialwo buunga nibio munuulile nga mubuunga biakhulia. Yonakaka sibala, siikharamakhomo sisiindu tawe.

²⁷Yiira banamae babwe boosi, beere Babaandu ba Babiloni balamiilwe, siise siolile sie khubaukuuma.

²⁸“Bamula khukhwama mu sibala sia Babiloni ne becha Yerusalemu, mala baboola nga Wele Omunyali Owa Bioosi, Wele wefwe ne eacha khu niko Babiloni siakhola khu Lukaangu lwewe.

²⁹ “Laanga balasi be buembo ne nabo boosi bamanyile khukhwesa luyiingo bebwaakale Babiloni. Lubotookhelele. Omundu yesi yesi akhebachakho tawe. Rungia Babiloni khuloondekhana ne bikholwa bialwo. Sikila mu khwebonia lwafwochoole Wele Omunyali Owa Bioosi Omutakatifu owa Isiraeli.”

³⁰Wele Omunyali Owa Bioosi aloma ali, “Khwako baele ba Babiloni balererwa khu ngila che mu lukoba, ne banamae balwo boosi balabuna khu ndaalo eyo.”

³¹Omwami WELE we banamae aloma ali, “Ese nakhufutariire ewe, ewe we sileka, sikila endaalo yowo yolile, siise nisio ndakhuukuumilakho.

³²Owe sileka aletuya mala akwe ne se aliio olamwinyosia tawe, ndabwana kumulilo mu ngoba chewe, mala kulosia boosi bamukara.”

³³Wele Omunyali Owa Bioosi, aloma ali, “Babaandu ba Isiraeli alala ne babaandu ba Yuda boosi balikho bapisibwa sibi. Abo ba babaamba babaliindile siimbi mbo se banyala belukha tawe.

³⁴Ne kakhali oyo olabasikula ali ne kamaani, Wele Omunyali Owa Bioosi. Omwene alemeelela buli siindu mala areere kumuleembe khu sibala ne kakhali khu Babiloni ndareera butinyu.”

³⁵Wele Omunyali Owa Bioosi aloma ali, “Liie liechile khu Bakalitayo ne khu bamenywa ba Babiloni, ne khu bemeelesi balwo ne babaandu balwo bakesi.

³⁶Liie khu bang'oosi balwo babeeyi mala balaba basilu liie khu banamae balwo mala balabuna.

³⁷Liie khu farasi chabwe ne khu makaari kabwe ke liie, ne khu banamae babwe bakeni boosi, mala balaba nga bakhasi! Liie khu miaandu kiabwe kioosi mala balanuulwa!

³⁸Siimiyu silaba khu njichi chabwe mala chilateenya Sikila sili sibala sie bifwaani mala kimiooyo kiabwe kioosi kili khu bifwaani.

³⁹ “Khwako chisaang'i che mundaa chilamenya ne namuunyu mu Babiloni, akhaba chinyefwe chilamenyamo. Babaandu se balibamo namwe bamenyemo lundi mindali na mindali tawe.

⁴⁰ Nga Wele Omunyali Owa Bioosi onakaka Sodomu ne Komora ne chingoba chichaba siimbi, nio se aliio omundu yesi yesi olimenya mu Babiloni tawe, ne mbao omundu olibiramo tawe.

⁴¹“Lola babaandu balikho becha khukhwama ebunaswa, ekholo eye kamaani, ne babaami bakali balikho basokosia khukhwama mu sibala sie aleeyi.

⁴²Babanuule buyiingo ne kamafumo, bali bakhalafu lundi se bali be siisa tawe. Bauuma busa nga enyanja, batimia chifarasi, Befwarire oli baberekekhele liie khumwibwaakala enywe, ee baandu ba Babiloni!

⁴³“Omwami owa Babiloni auliile khukhwicha khwabwe, mala kamakhono kewe kalikho kareenga, bireengo biamuambile buchuuni oli bwo mukhasi olumwa.

⁴⁴“Lola, nga etalang'i ne yama mu sichiimi sia Yoritani khukhwibwaakala litaala liboofu lie kamakheese, sesi ndabakhola belukhe sibala sia Babiloni mala ndarobora omwami niye nenya amiie sibala esio. Sikila naanu oli nga ese? Ne naanu onyala wanyala ese? Ne mwaayi siina onyala akhingiilila ese?

⁴⁵Khwako ulila kamarekekha kamabi niko Wele Omunyali Owa Bioosi akholile khu Babiloni, nende niko abisiisie khu maloba ke Bakalitayo. Ng'ali babaana balakhuruurwa bayilwe aleeyi mala ng'ali buli mundu alelaliila sikila butinyu bwabwe.

⁴⁶Liloba lilareenga sikila likwa lia Babiloni, ne bikukuulo bia Babiloni bilauliilikha mu kholo chingali.”