Read lubukusu Yer. 51 Bible Online

Yer. 51 - lubukusu bible

Yer. 51

¹Wele Omunyali Owa Bioosi aloma ali, “Lola ese ndenyosia kumwoyo kwo mwonaki khu Babiloni ne khu bamenywa basio.

²Ndaruma baseesa e Babiloni mala balaseesa sibala esio basilekhile busa ne balisibwaakala buli lubeka khu ndaalo eye butinyu bwasio.

³Omulasi owe buembo akhalasa tawe, namwe akhabanuula bulwaani tawe, mukhalekha basoleeli basio baele baona tawe yirira elala banamae basio.

⁴Baleererwa mu sibala sie Bakalitayo ne balaumiila mu ngila che chingoba chabwe.

⁵Sikila babaandu ba Isiraeli ne Yuda se balianjukhwa ne Wele, Wele Omunyali Owa Bioosi tawe, ne kakhali sibala sia Babiloni siechula bumayaanu khu Mutakatifu owa Isiraeli.

⁶Yilukha murure mu Babiloni, buli mundu eonie omwene. Omundu akherwa sikila bumayaanu bwa Babiloni tawe sikila sino sili siise sie liliiyacha lia Wele Omunyali Owa Bioosi. Alaruungia Babiloni nisio sikhoyela siruungwe.

⁷ Sibala sia Babiloni siaba nga sikoombe sie sahabu mukhono mwa Wele Omunyali Owa Bioosi. Siakhola liloba lioosi liameela chikholo choosi chanywa endali yasio chalalukha.

⁸Babiloni siakwiile khangu mala sionaakwe lila sikila Babiloni! Siilile kamalesi sikila buchuuni bwasio wakana sinyala siaona khukhwama khu bulwaale bwasio.”

⁹ Bakeni mu Babiloni baloma bali: “Khukhakile khusilikha Babiloni ne kakhali se siiona tawe. Khusianjukhe lekha khusianjukhe mala khuche buli mundu mu sibala siewe sikila bukhalaki bwasio bwolile mwikulu lundi bwaniinile bwolile mu ngaaki.

¹⁰Wele Omunyali Owa Bioosi ekesia bung'ali bwefwe khemwiche khulaangilile mu Sayuni kimilimo nikio Wele Omunyali Owa Bioosi, Wele wefwe akholile.

¹¹Akala buembo! Banula chingabo! Wele Omunyali Owa Bioosi enyoosie kimiooyo kie babaami ba Medesi, sikila enya abunie Babiloni. Lilienelio lili lilieyacha lia Wele Omunyali Owa Bioosi, lilieyacha khulwe Lukaangu lwewe.

¹²Suta e pendera eye khukhwibwaakala kamasiisi ka Babiloni tasa banamae raao baliindi. Rekekha babebuulila Omwami Wele Omunyali Owa Bioosi akholile niko aarekekha lundi niko aalaka khu bamenywa ba Babiloni.

¹³ Enywe mumenyile sia nyanja mala muli baiinda mu mabiikhilo kenywe, khumaliilikha khwenywe khwolile bulamu bwenywe bwakituukhe nga buusi.”

¹⁴Wele Omunyali Owa Bioosi echubile ali, “Alareera babaandu bakali bebwaakale Babiloni nga chisike mala balekhoya sikila bamuulile.”

¹⁵Wele Omunyali Owa Bioosi abuumba sibala khulwe bunyali bwewe, mala emia sibala khulwe bukesi bwewe ne khulwe limanya liewe abalaayia likulu.

¹⁶Ne alomaloma ne kameechi ke mungaaki kaoloola ne abuusianga kamafuumbi khukhwama buli lubeka khwiloba. Akhola lueni ne lumeniuukhila mu fula, mala areera ekhuungu khukhwama alibiikhilo liewe.

¹⁷Buli mundu ali omusilu ne se ali ne limanya tawe, buli omubasi aambwa chisoni, khulwe bifwaani biewe bie bawele sikila bifwaani ebio bili bie bubeeyi ne se bili ne bulamu tawe.

¹⁸Bili bibiindu biikhali ne bukhala tawe, bikhoyeele bialekwa mu biise bie bukhalaki bwa Wele Omunyali Owa Bioosi bikhabune.

¹⁹Wele owa Yakobo se ali nga nibio tawe. Sikila niye ali Omubuumbi owe bibiindu bioosi ne Isiraeli eli ekholo eye kumukabwa kwewe, lisina liewe lili bali Wele Omunyali Owa Bioosi.

²⁰Wele Omunyali Owa Bioosi aloma ali, “Babiloni ewe oli enyundo yase ne bulwaani bwe liie khurumikhira ewe khukhwarakaka chikholo mu bitonyi khurumikhira ewe khukhwonakaka bubwami.

²¹Khurumikhira ewe chifarasi ne bachitimia, khurumikhira ewe khukhwonakaka kamakaari ke liie ne bakatimia.

²²Khurumikhira ewe khukhwira babaandu be siseecha nende be siikhasi khurumikhira ewe khukhwira basaakhulu ne baele khurumikhira ewe khukhwira basoleeli ne bakhaana,

²³khurumikhira ewe khukhwira babaayi ne kamakheese kabwe, khurumikhira ewe khukhwira balimi ne chieeyi chabwe. Khurumikhira ewe khukhwira babaami ne banamae babemeelesi.”

²⁴Wele Omunyali Owa Bioosi aloma ali, “Kharuunge Babiloni ne bamenywa bamwo enywe ne muloleleele. Khakhole ndio sikila bumayaanu bwoosi nibwo bakhola mu Sayuni.

²⁵Babiloni, oli nga sikulu sinyala sionaka sibala sioosi. Ne kakhali ese Wele Omunyali Owa Bioosi nakhakwa omusiku wowo. Ndakhutiila khuupe mala khukhuruurire asi, mala khulekhe mwipukhuulu.”

²⁶Wele Omunyali Owa Bioosi aloma ali, “Mbao libaale lilibukulwa khukhwama khwiwe liche liombakhilwe tawe okhabe nga sichiimi khulwa mindali, Ese Wele Omunyali Owa Bioosi nalomile.”

²⁷Suta ependera khu sibala, khupa ekhoombi mu kholo choosi Rekekha chikholo chipane ne Babiloni laanga babaami ba Ararati, Mini ne Ashikenasi balwibwaakale. Robora banamae babemeelesi balwibwaakale ruma chifarasi chingali nga chisike.

²⁸Rekekha chikholo chipane ne Babiloni, babaami ba Medesi ne babaami be chingoongo ne bayeeti babwe alala ne bibala bioosi nibio bamiia.

²⁹Sibala sirenga ne khuterema mu buchuuni, sikila Wele Omunyali Owa Bioosi akhalaake kamabi khu Babiloni, asikhole sibe sichiimi, omundu akhasimenyamo tawe.

³⁰Banamae ba Babiloni balekhile khukhupana, bali busa mu ngoba chabwe che kamaani, kamaani kabawelemo babeele busa nga bakhasi, bumenyo bwa Babiloni bulikho buyia, mala chinjeko chalwo chafuniikhe.

³¹Omutimi atima ne akaanana no kundi, ne omurume akaanana no murume wasie, bacha khuboolela omwami owa Babiloni bali, lukoba lwewe lwebwaakaalwe buli lubeka.

³²Kamafubukho kaambiilwe ne chingoba che kamaani chosiibwe, ne banamae balikho barenga.

³³Wele Omunyali Owa Bioosi, Wele owa Isiraeli aloma ali, “Babaandu ba Babiloni bali nga luuya lwe khuulilakho biakhulia, mu siise nisio baliswalakililwakho ne enyuma we siise sitiiti siri biise bie likesa bioola.

³⁴Nebukadinesa omwami owa Babiloni akhwonakaka efwe akhubunia akhukhola khwaba nga enyuungu ekhalimo siindu tawe, akhumila nga endemu, echuusie enda yewe ne bibiindu biefwe mala akhukhasile.

³⁵Babaandu ba Babiloni balaruungwa bumayaanu nibwo bakhukholela efwe, lekha babaandu ba Sayuni balome bali, ‘Sifuki siefwe sikhoya sibe khu baandu ba Babiloni.’ Lekha Yerusalemu lubole lurio lwoosi.”

³⁶Wele Omunyali Owa Bioosi aloma ali, “Lola, ndamupanila enywe, mala neyache sikila enywe. Ndateenyisia enyanja eya Babiloni ne khukhola esebele yabwe eteenye,

³⁷mala Babiloni lulaba nga libuumbi lie kamakuunda, abuundu niio chingipwe chisamila abuundu ariisia lundi e khuukia niio omundu akhamenya tawe.

³⁸Babaandu ba Babiloni balaulukhumila alala nga chitalang'i balabuluula busa nga ching'ana che talang'i.”

³⁹Wele Omunyali Owa Bioosi aloma ali, “Ne basiekoomba ndabarekekhera naikara mbameesie bachekhe lukali mala bakone liilo nilio bakhenyokha tawe, ne se balisisimukha tawe.

⁴⁰Khabareere nga kamameeme kacha khwirwa nga kamamiiku ne chindurume.”

⁴¹Wele Omunyali Owa Bioosi aloma ali, “Khu Babiloni lukoba nilwo sibala sioosi siafumia! Iwaambilwe! Babiloni lwabeele lwe khuukia mumoni mwe chikholo chichiindi.

⁴²Enyanja yechile mu Babiloni, yalufuunikha ne bibuli bie kameechi bisiuubulukha.

⁴³Chingoba cha Babiloni chabeele che khuriisia, siabeele sibala sie enjala lundi sisiangalaamwe, sibala nisio omundu akhamenyamo tawe, lundi nisio omwana wo mundu akhanyala abiramo tawe.

⁴⁴Ne ese ndaukuuma wele owa Babiloni bali Beli, mala mukhole afuche nisio efuunda. Chikholo se chilamwichakho chingali lundi tawe, lisiisi lia Babiloni liakwiile.

⁴⁵Baandu base, rura mu Babiloni lekha buli mundu eonie khukhwama khu burafu bwe lirima lia Wele Omunyali Owa Bioosi.

⁴⁶Mukhafwa kimiooyo namwe mwaria, sikila niko muulile khuloondekhana ne sibala esio tawe, likhuwa liicha khu mwiiko mulala, likhuwa liliindi liicha kumwiiko kuloondakho kamakhuwa khuloondekhana ne sisiayuumba mu sibala, ne khuloondekhana no mwami okhupana no kundi.

⁴⁷Khwako, lola chindaalo chilikho chiicha, nicho ndaukuumilamo bifwaani bia Babiloni sibala sia Babiloni sioosi siliaambwa chisoni, ne baliirwa boosi balibamo bakali.”

⁴⁸ Wele Omunyali Owa Bioosi aloma ali, “Nio likulu ne liloba, ne nebio bioosi bilimo bilimba ne khukhwekhoya sikila khukwa khwa Babiloni. Sikila balibunia Babiloni baliama ebunaswa.

⁴⁹ Babiloni lukhoya lukwe sikila babeerwa mu Isiraeli, bulayi bwene nga babeerwa mu sibala sioosi ne bakwa sikila Babiloni.”

⁵⁰Wele Omunyali Owa Bioosi aloma ali, “Enywe mumwebacha lifwa, cha mukhema tawe! Khebulila Wele Omunyali Owa Bioosi ne muli mu sibala sie aleeyi, mala mwibaasie Yerusalemu.

⁵¹Muloma muli, ‘Efwe khwaambwa chisoni sikila khwachangalaasibwa sikila baakwa becha mala bengila Abuundu Atakatifu munju eya Wele Omunyali Owa Bioosi.’ ”

⁵²Wele Omunyali Owa Bioosi aloma ali, “Khwako lola chindaalo chilikho chiicha, nicho ese ndikholelamo bukhalaki khu bifwaani ne mu sibala sia Babiloni sioosi bauniilwe baleundukuma ne khuraacha.

⁵³Babiloni siakhaniina mungaaki tibotibo, mala siombakheyo chingoba che kamasiisi che kamaani ese ndaruma babonaki basibwaakale.”

⁵⁴Wele Omunyali Owa Bioosi aloma ali, “Ulila bililo biama Babiloni kumuulo kwe lilionakwa liboofu kuuliilikha khukhwama mu sibala sie Bakalitayo!

⁵⁵Sikila Wele Omunyali Owa Bioosi alikho onaka Babiloni, alasisia luyoka lwalwo lukali. Bibuli bie basiku bilasiubulukha busa nga kameechi kamakali kimimilo kie khuoloola khwabwe kilauliilikha lundi.

⁵⁶Sikila omwonaki aleecha khukhwibwaakala Babiloni banamae bakhulu ba Babiloni balaambwa ne buyiingo bwabwe bulafunakwa sikila Wele Omunyali Owa Bioosi ali Wele oruunga bumayaanu ng'ali alaruungia Babiloni mu bwichufu.

⁵⁷Ndameesia baruki basio babaandu be limanya, babemeelesi, ne banamae balacha khukona ne se balenyokha tawe, ese Wele Omunyali Owa Bioosi nalomile. Lisina liase bali Omwami Wele Omunyali Owa Bioosi.”

⁵⁸Omwami Wele Omunyali Owa Bioosi owe banamae aloma ali, “Lisiisi lia Babiloni liboofu lilayaasibwa liole khu liloba, ne bilibwa bialwo bileeyi bilosibwa. Babaandu bakhola kia busa, chikholo cheluya busa, khulwe khukhwosibwa ne kumulilo kwong'ene.”

⁵⁹Omung'oosi Yeremia alaka Seraya okhwa Neria omwichukhulu owa Maiseya, omukholi owo mwami Sedekia owa Yuda, mu mwiiko kwe khane kwe bubwami bwewe nga ne aaba nalikho aronga no mwami khucha e Babiloni.

⁶⁰Yeremia aba aandike mu sitabu bumayaanu bwoosi bubwaba khukhwola bwiche khu Babiloni, kamakhuwa koosi kakaba ne kaandikwa khu Babiloni.

⁶¹Yeremia aboolela Sereya ali, “Nga ne woola Babiloni lola oli osoma kamakhuwa kano ne kumumilo kwe angaaki,

⁶²mala oboole oli, ‘Ee Wele Omunyali Owa Bioosi, ewe waboola oli okhonake abuundu ano, nio omundu namwe esaang'i akhamenyamo tawe, alanjukhwa khulwa mindali na mindali.’

⁶³ Nga ne omala khu soma sitabu sino, boakho libaale mala osimwaate akari mu luuchi lwa Efurati,

⁶⁴mala oboole oli, ‘Babiloni lukhesiikhe lurio mala se lukhasiubulukhe lundi tawe, sikila bumayaanu nibwo ese ndikho nja khulureerera.’ ” Kano niko kamakhuwa ka Yeremia.