Read lubukusu Yer. 52 Bible Online

Yer. 52 - lubukusu bible

Yer. 52

¹Sedekia aba ne bukhulu bwe kimiiko kamakhumi kabili na mulala ne amiia khuba omwami owa Yuda, mala amiia Yerusalemu kimiiko ekhumi na mulala. Maawe aba bali Hamutali omukhaana owa Yeremia, owamenya mu lukoba lwa Libuna.

²Omwami Sedekia akhola bubwoni khu Wele Omunyali Owa Bioosi, ne bulayi bweene nga nibwo Omwami Yehoyakimu akhola.

³Wele Omunyali Owa Bioosi aba ne lirima likali khu baandu ba Yerusalemu ne Yuda mala abaukuuma ebweeni wewe. Ne Sedekia aba omureengu khu mwami Nebukadinesa owa Babiloni.

⁴ Ne mu mwiiko kwa tisa, khu ndaalo eye khumi eye kumwesi kwe khumi kwe bubwami bwa Sedekia, Nebukadinesa omwami owa Babiloni echa ne banamae bewe boosi khukhwibwaakala Yerusalemu mala balwibuulila, bombakha kamasiisi ke khu khwibuulilamo kalukara.

⁵Nio lukoba lwebuulilwa khukhwola khu mwiiko kwe khumi na mulala kwe liliamiia lio mwami Sedekia.

⁶Oli khu ndaalo eya tisa eye kumwesi kwe khane enjala yaba endafu lukali mu lukoba se siabao siakhulia khu baandu be mu sibala tawe.

⁷ Nio lukoba lwebwaakalwa mala banamae boosi belukha barura mu lukoba mu silo, babirira khu ngila eye silibwa sie akari we kamasiisi engila ebiriira mu siluundu sio mwami, nga Bababiloni ne baba ne bakarire lukoba. Mala belukha balola lubeka lwa Araba.

⁸Ne banamae be Bababiloni batimania omwami Sedekia, bamunyoolela khu mweyeeywe kwa Yeriko, mala banamae bewe boosi bamwanjukha.

⁹Nio baamba omwami Sedekia mala bamureera khu mwami owa Babiloni mu lukoba lwa Ribula mu sibala sia Hamati. Ne ebweeneyo Nebukadinesa akhalakila Sedekia.

¹⁰Omwami owa Babiloni eera basoleeli ba Sedekia mumoni chewe akhaba lundi eera babemeelesi ba Yuda mu Ribula.

¹¹ Enyuma wako afutula Sedekia chimoni, amuboa kiminyololo mala amubukula amuyila e Babiloni. Sedekia arama mu siboe mu Babiloni nabwila afwa.

¹²Khu ndaalo eye khumi eye kumwesi kwa kharaano, kukwaba kumwiiko kwe khumi ne kimiiko tisa kwe bubwami bwa Nebukadinesa, omwami owa Babiloni. Nebusaratani owaba omunamae omukhulu owaliindanga omwami owa Babiloni, becha bengila mu Yerusalemu.

¹³ Osia Lukaangu, lichipi lio mwami owa Yuda, ne chinju chichiindi choosi che babaandu bakhoongo mu Yerusalemu.

¹⁴Nio banamae ba Babiloni ba baaba no munamae omukhulu, batechula kamasiisi koosi kakabotookhelela lukoba lwa Yerusalemu.

¹⁵Ne Nebusaratani omunamae omukhulu abukula baboe babaandu ba baaba bataambi lukali mu baandu babaandi ne babaandu babarama mu lukoba ne babaandi babamulila khu mwami owa Babiloni alala ne bafundi babaandi boosi.

¹⁶Nebusaratani omunamae omukhulu alekha bataambi balala bakile chisabibu ne khulima kimikuunda.

¹⁷ Bababiloni bafunaka chinjeko che kumukasa chichaba mu Lukaangu, ne biteetwe bie kimikasa kikiama mu nyanja kikiaba munju ya Wele Omunyali Owa Bioosi batanya mu bitonyi mala basuta kumukasa kwoosi bayila e Babiloni.

¹⁸Babukula akhaba ne chinyuungu ne chimbako na buano ne chinjelo ne bibuumba bie biiunya bulayi, ne bibiindu bioosi bie kumukasa nibio bakholelanga kimilimo mu Lukaangu.

¹⁹Babukula akhaba bibuumba bikeekhe ne bifuria ne chinjelo ne chinyuungu, ne biteetwe bie chitaa ne bibuumba bie khurakho biiunya bulayi ne bibuumba bie khusutilakho kamalasile ke khuosia. Omunamane omukhulu abukula buli sisiindu sie sahabu nga esahabu ne sie fwesa nga efwesa.

²⁰Ne chinjeko chibili che kumukasa, ne nyanja eyekhala khu uunwa ekhumi na chibili che kumukasa ne biteetwe bie kumukasa bisutibwa, nibio omwami Solomoni akhola khulwe Lukaangu, kumukasa kwe bibiindu bino bioosi kwaba kumusiro lukali.

²¹Ne chinjeko chibili echo chaba chindekhaane, buli ndala yaba buleeyi chimita munaane khucha angaaki ne khubotookhelesia chimita chiraano ne bitonyi bitaru ne buboofu chimilimita ekhumi na chiraano. Chinjeko chaba chayikukha ekhoombe mukari.

²²Buli enjeko yaba ne siukutwa sie kumukasa, buleeyi bwe siukutwa bwaba chimita chibili ne bitonyi bibili, biukutwa bino biaba biaronwa ne bifwaani bie bibiaamo bie kamakomanga, ke kumukasa, kumukasa kwaba kwafuuma khu biukutwa khwoosi.

²³Biabao bifwaani bie bibiaamo bie kamakomanga kamakhumi tisa ne bifwaani sita chimbeka choosi bibiabonekha ne wimile asi ne buli enjeko yaba ne bifwaani bie bibiaamo emia ndala.

²⁴Nebusaratani omunamae omukhulu abukula Seraya Omusaayi Omukhulu Lukali ne Sefania omusaayi oloondela omukhulu, ne baliindi be kumuliango bataru acha nabo ne bali baboe.

²⁵Ne khu barama mu lukoba abukula omunamae ne basaakhulu saba khu be kumuse kwo mwami babanyolekha mu lukoba, no muandiki owa komanda owe banamae owaandikanga babaandu be mu sibala ne babaandu kamakhumi sita khu baandu be mu sibala, babanyolekha mu lukoba.

²⁶Mala Nebusaratani omunamae omukhulu abaamba abareera khu Nebukadinesa omwami owa Babiloni e Ribula.

²⁷Ne omwami Nebukadinesa abapa abeerera e Ribula mu sibala sia Hamasi. Nono Yuda aambwa auyisibwa arusibwa mu sibala siewe.

²⁸Bano nibo baboe nibo Nebukadinesa abukula. Mu mwiiko kwewe kukhola saba abukula Bayaudi chielefu chitaru ne kamakhumi kabili na bataru.

²⁹Mu mwiiko kwewe kwe khumi na munaane abukula baboe mia naane salasina mbili khukhwama mu Yerusalemu.

³⁰Ne mu mwiiko kwewe kwe kamakhumi kabili na kitaru Nebusaratani omunamae wewe abukula baboe mia saba arubaina tano babaandu boosi alala ba babukulwa baba chielefu chine ne chimia sita.

³¹Ne mu mwiiko kwe kamakhumi kataru na saba kwe khuuyisibwa khwa Yehoyakini omwami owa Yuda, mu mwesi kukhola ekhumi na kibili khu ndaalo eye kamakhumi kabili na chiraano mu mwiiko nikwo

³²Ebilimerodaki amiisibwakho aba omwami owa Babiloni arusia Yehoyakini omwami owa Yuda mu siboe mala alomaloma ne naye bulayi mala amuelesia endebe eye lukoosi ekhila chindebe che babaami babaandi nibo aba nabo mu Babiloni.

³³Khwako Yehoyakini afukiililwa khufuula chingubo che mu siboe. Mala khulwe bulamu bwewe bwoosi bubwaba ne buramire, alichanga buli lwosi khu sialwa sio mwami.

³⁴Buli endaalo, omwami owa Babiloni aelesia Yehoyakini chirupia che khurumikhira khuloondekhana ne lilienya lia Yehoyakini khukhwola endaalo eye lifwa liewe.