Read lubukusu Yer. 6 Bible Online

Yer. 6 - lubukusu bible

Yer. 6

¹Ee, baandu ba Benjamini, yilukha khukhwama mu Yerusalemu muone, khupa ekhoombi mu Tekoa, ne yekesia simanyilo khu Beti-hakikeremu, sikila butinyu bulikho bwama ebunaswa, alala ne lilionaka liboofu.

²Lukoba lwa Sayuni lulayi, ne kakhali ndikho nja khulubunia.

³Babaami balombakhamo ne banamae babwe, balombakha kamaeema kabwe kamubotookhelele, balombakha buli mundu abuundu niio enya.

⁴Bakhalome bali, “Rekekha liie khu Yerusalemu, yiicha khwibwaakale mwiaangilwe!” Ne kakhali bakhalome bali, “Butinyu bwakhunyoola, sikila endaalo elikho ewa, sikila bibiniini bie ekolooba bilikho bilea!”

⁵“Yiicha khwibwaakale mu silo, mala khwonakake kamachipi kalwo!”

⁶Sikila Wele Omunyali Owa Bioosi. Wele owe bunyali aloma ali, remakakila asi kimirongooro kiabwe, khola lilibwaakala khu Yerusalemu, luno luli lukoba lukhoyeele luukumibwe, sikila mu nilwo sisiindu mbamo tawe ne likhali khukhupisiana sibi.

⁷Nga esebele ne eli ne kameechi kamakwalaafu, akhaba Yerusalemu lukwalaasia bumayaanu bwalwo, sisiayuumba ne lilionakwa bilulimo, bulwaale ne kamakoonjo bili ebweeni wase buli lwosi.

⁸Baandu ba Yerusalemu, lekha bibiindu bino bibe engaani khwinywe, ne busa ndamulekha ao, mala ngaluukhasie lukoba lwenywe lube sisiangalaamwe, kamaloba kakhamenywamo omundu yesi yesi tawe.

⁹Wele Omunyali Owa Bioosi, amboolela ali, “Isiraeli elaba nga kumukuunda kwe kimisabibu, nikwo babutile kimisabibu bamalamo. Khwako, khukhwola oonie buli mulala niye onyala siise ne sisiili.”

¹⁰Ndaboolela naanu nio abakaanie, nio baulile? Lola, bekala kamaru, se banyala baulila tawe, lola, likhuwa lia Wele khu nibo lili busa lie chingacho, se balisangaalila tawe.

¹¹Khwako nechuule lirima lia Wele Omunyali Owa Bioosi, naluiliile khukhwefwiilisia nalio. Wele Omunyali Owa Bioosi amboolela ali, “Lichukhe khu baana be khu ngila che lukoba, ne khu libuusiana lie basoleeli basiili baele, baseecha ne bakhasi sitube balabukulibwa, akhaba basaakhulu bakofule lukali balatiilwa.

¹² Chinju chabwe chikhabe che babaandi, akhaba kimikuunda kiabwe ne bakhasi babwe, sikila ndikho nja khuukuuma babaandu be sibala sino.

¹³Sikila khukhwama khu mutiiti khukhwola khu mukhoongo, buli mundu eyiimila bukhala mungila ekhali ng'ali tawe, ne khukhwama khu mung'oosi khukhwola mu musaayi, buli mundu akhola ke bubeeyi.

¹⁴ Se baonisiilie elala likoonjo lie babaandu base tawe, baloma bali, ‘Khuli ne kumuleembe, kumuleembe’, ne kumuleembe se kuliio tawe.

¹⁵Baambwakho chisoni nga bakhola bumayaanu ku? Tawe, se baambwakho chisoni akhaba atiiti tawe, se bamanyile chisoni nisio siina tawe. Khwako balakwa nga babaandi ne bakwa, siise nisio ndibaelesialiakho siiukuumo, balikhilwa.”

¹⁶ Wele Omunyali Owa Bioosi aloma ali, “Yiima khu chingila, mala mulole. Mala mureebe chingila chikhale, niio engila endayi eli, mala muchiilekho, mala munyoole siiuluukho mu miooyo kienywe.” Ne kakhali baloma bali, “Se khulachiilakho tawe.”

¹⁷Namuelesia baliindi ne khumuboolela ndi, “Rekeeresia kumumilo kwe ekhoombi.” Ne kakhali baloma bali, “Se khulakurekeeresia tawe.”

¹⁸“Khwako ulila, enywe be chikholo, lundi mumanye, liicha khwekholekha khu baandu baase.

¹⁹Ulila, be sibala, lola ndikho ndeera butinyu khu baandu bano, kamatuunda ke bumayaanu bwabwe, sikila se bauliile kamakhuwa kase tawe, lundi balobile akhaba lilaka liase.

²⁰Biunya bulayi khukhwama Sheba, banderera biasi? Namwe bie khuura mu biakhulia khukhwama mu sibala sie aleeyi bili na bukhala siina? Biianwa bienywe bie khukhwosia se bifukiililwa tawe, ne chimbosio chenywe se chisiimisia ese tawe.”

²¹Khwako Wele Omunyali Owa Bioosi aloma ali, “Lola, ndara ebweeni we babaandu bano, bibiindu bie khubakwisia nibio balietuyangakho mala bakwe, ba paapa ne babaana sitube, niye bapakana no musaale bakhabune.”

²²Wele Omunyali Owa Bioosi aloma ali, “Lola, babaandu balikho becha khukhwama mu sibala sie ebunaswa, ekholo eye kamaani khukhwama mu sibala sie aleeyi elikho yirekekhera liie.

²³Babukuule buyiingo bwabwe ne kamafumo, bali barafu ne se bali ne siisa tawe, kimimilo kiabwe kili nga liioloola lie nyanja. Batimia chifarasi, befwarire nga babaandu baberekekheele liie, khukhupana ne nanywe, Ee baandu ba Yerusalemu!”

²⁴Babaandu ba Yerusalemu baloma bali, “Khwauliile kamakhuwa kano, mala kamaani kakhuweele mu khumbo, khuli ne buchuuni bukali, nga buchuuni bwo omukhasi olumwa.

²⁵Mukhacha mu mikuunda, namwe mwakeenda khu muyila tawe, sikila basiku befwe bali ne chimbalu, ne butinyu buli abuundu buliio.”

²⁶Wele Omunyali Owa Bioosi aloma ali, “Ee, baandu base yifwara kamakunia, mala mwikalaangasie mwikokhe. Lila oli mulila omwana omusoleeli omuteelwa, lisooma libe lirafu lukali, sikila omwonaki alikho echa khangu.

²⁷Ese nakhukholile ewe Yeremia khuuba ookela babaandu baase, nio omanye mala okele chingila chabwe.

²⁸Boosi bali bareengu bamiinyi, bakeesia bubeeyi, bali kumukasa ne sichuuma, boosi bakhola ke bumayaanu.

²⁹Sisiooso siburukha lukali, kamabaati kayiila mu mulilo, ne likela lichiililila, sikila bamayaanu se barusibwao tawe.

³⁰Balaangwa bali ‘kamandu ke efwesa,’ sikila Wele Omunyali Owa Bioosi aabalobile.”