Read lubukusu Yer. 7 Bible Online

Yer. 7 - lubukusu bible

Yer. 7

¹Elomo yecha khu Yeremia khukhwama khu Wele Omunyali Owa Bioosi ne burume buno:

²Cha wime mu silibwa sie nju ya Wele Omunyali Owa Bioosi mala wilwachile ebweeneyo elomo yino. Loma oli, “Ulila elomo ya Wele Omunyali Owa Bioosi, enywe mweesi baandu ba Yuda mumwingilanga mu bilibwa bino khusaaya Wele Omunyali Owa Bioosi.

³Wele Omunyali Owa Bioosi, Wele owa Isiraeli aloma ali: Kololosia limenya lienywe ne bikholwa, mala ese ndamulekha mumenye abuundu ano.

⁴Mukhasuubila kamakhuwa ke bubeeyi kaloma kali, ‘Luno luli Lukaangu lwa Wele Omunyali Owa Bioosi, Lukaangu lwa Wele Omunyali Owa Bioosi, Lukaangu lwa Wele Omunyali Owa Bioosi.’ Tawe.

⁵“Sikila mwaba ng'ali ne mukololosia limenya lienywe ne bikholwa, mwaba ng'ali ne mukhalaka mu bung'ali, buli mundu no wasie,

⁶mwaba ne mukhapia omukwa siibi, namwe omufuubi, namwe namulekhwa tawe, namwe mwaba ne mukheera omundu ookhali ne buubi abuundu ano tawe. Lundi mwaba ne mukhasaaya bawele babaandi bakhamuyeeta tawe tawe,

⁷ese ndamulekha mumenye muno, mu sibala nisio naelesia bakuuka benywe khaale khulwa mindali.

⁸“Lola enywe musuubila kamakhuwa ke bubeeyi kakhali ne bukhala tawe.

⁹Enywe muleeba, muleera, mulakhola bueeyi, mulechuba mu bubeeyi, muloselia Baali biiunya bulayi ne khuloonda bawele babaandi nibo mukhamanyile tawe.

¹⁰Enyuma wako, mulecha mwiime ebweeni wase mu Lukaangu luno, lulangilwa khu lisina liase, mala muboole muli, ‘Efwe se khulikho ne butinyu tawe!’ Ne muchiililila khukhola bumayaanu buno?

¹¹ Lukaangu luno lulangilwa khu lisina liase, luno lwekelile abuundu niio banuuli bekisa mu moni chenywe? Wele Omunyali Owa Bioosi aloma ali, ‘Lola ese samwene naboone.’

¹² Nono khemuche abuundu wase, aaba e Shilo niio nakhola lisina liase limenyeo mu khunyoa, mala mubone niko ese nakholao. Nakholao ndio sikila bumayaanu bwe babaandu base Baisiraeli.”

¹³Wele Omunyali Owa Bioosi aloma ali, “Ne luno, sikila enywe mwakholile bibiindu bino bioosi, ne nga nabelelela khumuboolela, se mwandekeeresia tawe, ne nga namulaanga, se mwafukiilila tawe.

¹⁴Khwako ndakhola khunju elaangilwa khu lisina liase, nimwo enywe mwasuubila, alala ne buli abuundu niio ese namuelesia enywe ne bakuuka benywe niko nakhola khu Shilo.

¹⁵Ne ndamuoona enywe murure mu moni mwase bulayi bwene nga naoona balebe benywe boosi, be lisaaye lia Efuraimu boosi.”

¹⁶Wele Omunyali Owa Bioosi aboolela Yeremia ali, “Ne ewe, okhasabila babaandu bano, namwe okhabalilila namwe wanjekoonjelela khulwe khubasabila tawe. Sikila se ndakhuulila tawe.

¹⁷Se waboone niko balikho bakhola mu chingoba cha Yuda ne khu ngila che mu lukoba lwa Yerusalemu ta ku?

¹⁸ Babaana bareenya chiikhu, baraarawabwe babwana kumulilo, bakhasi bapaakha sifu khukholela wele owe siikhasi owe mwikulu chikeki. Ne khuchukhila bawele babaandi biianwa bie khunywa khu khumbambia ese lirima.

¹⁹Wele Omunyali Owa Bioosi areeba ali, ese niye baambia lirima? Se bereereranga babene likoyana ta ku?

²⁰Khwako Omwami WELE aloma ali, nono lola, lirima ne bukhalafu bilachukhwa abuundu ano, khu baandu, khu saang'i, ne khu mirongooro kie mu mikuunda ne kamatuunda ke khu sibala. Lilaburukha ne se liasimisibwa tawe.”

²¹Wele Omunyali Owa Bioosi, Wele owa Isiraeli aloma ali, “Tasa biianwa bienywe bie khukhwosia, khu mbosio chenywe mala mulie chinyama.

²²Sikila khu ndaalo niyo narusilia bakuuka benywe mu sibala sia Misiri, se nababoolela namwe se nabalaka khuloondekhana ne biianwa bie khukhwosia ne chimbosio tawe.

²³Ne kakhali nabaelesia lilaka lino, ‘Ria lilaka liase ese ne ndaba Wele wenywe ne enywe mulaba babaandu base, mala mukeendele mu ngila choosi nicho mulaka nio mube ne kumuleembe.’

²⁴Ne kakhali se baria namwe barekeeresia ne kamaru kabwe tawe. Bakeenda busa mu lienya liabwe babene ne bulume bwe kimiooyo kiabwe kie sileka kimimayaanu, mala bakobola enyuma ne khucha bacha ebweeni tawe.

²⁵Khukhwama khu ndaalo niyo baraara benywe barurira mu sibala sia Misiri khukhwola luno, nachiililila khubarumira bakholi base bang'oosi boosi buli lwosi khukhwola luno.

²⁶Kakhaba kario se bandekeeresia tawe, ne kakhali bakhola sileka bakhola kamamayaanu khukhila baraarawabwe.

²⁷“Nono Yeremia ewe olababoolela kamakhuwa kano koosi, ne kakhali se balakhurekeeresia tawe. Olabalanga ne kakhali se bakhukosia tawe.

²⁸Ne ewe olababoolela oli, ‘Yino eli ekholo eye babaandu bakharia Wele Omunyali Owa Bioosi, Wele wabwe tawe, ne se bafukiilila liukuuma tawe. Bung'ali bwabawamo, bwarura mu minwa kiabwe.’

²⁹“Beka lichuune lienywe mala mulimwaate, yimbila kimienya kie kamasika khu ndeleelwa khwe bikulu, sikila Wele Omunyali Owa Bioosi alobile ne khukhwanjukha, eselukho eyamukhalasia.”

³⁰Wele Omunyali Owa Bioosi aloma ali, “Basoleeli ba Yuda bakholile kamamayaanu mu moni chase. Bengisie bisinyisia munju eyalangilwa khu lisina liase khukinyaalutia.

³¹ Lundi bombaakhe abuundu aesuta khu sikulu sia Tofeti siili mwitooma lia okhwa Hinomu. Benya khukhwoseliao babaana babwe basoleeli ne bakhaana. Lilienelio ese se nabalaka namwe liechakho mu mebaasio kase tawe.”

³²Wele Omunyali Owa Bioosi aloma ali, “Khwako lola chindaalo chilikho chiicha, se lulilaangwa lundi bali ‘Tofeti’ namwe ‘Litooma lia okhwa Hinomu’ tawe, ne kakhali likhalaangwe ‘Litooma lie Lifwa’ sikila balisiikhamo Tofeti, ne bubwangu se bukhasikalekho abuundu aandi osi osi tawe.

³³Ne bafu baliba siakhulia sie chinyuni ne chisolo ne se aliio omundu olichirisiarisia chilukhe tawe.

³⁴ Ne khasisie mu ngoba cha Yuda ne khu ngila cha Yerusalemu kimimilo kie chingano che bubeeyi ne kimimilo kie busangaafu, ne kumumilo kwoyo obeyisie ne kumumilo kwo mwea, sikila sibala silianjukhwa.”