Read lubukusu Yer. 8 Bible Online

Yer. 8 - lubukusu bible

Yer. 8

¹Wele Omunyali Owa Bioosi aloma ali, “Siise esio bikuumba bie babaami ba Yuda, bie babemeelesi, bie basaayi nende bie bang'oosi nende bie bamenywa ba Yerusalemu bikharusibwe mu biliindwa biabwe.

²Ne bikhabakalwe mu buwaanga bwe nyanga ne kumwesi, ne bibiindu biili mwikulu angaaki bioosi nibio abeele basiima ne khukholela; nibio baloonda lundi nibio bareebanga ne khusaaya. Se bilibusibwa alala namwe bisikhwe tawe. Bikhabe busa nga kamasiisie khu sibala.

³Babaandu boosi barama be nju emayaanu yino bakhekoombe lifwa khukhila bulamu, abuundu oosi niio belukhila bacha, ese Wele Omunyali Owa Bioosi Owe banamae nalomile.”

⁴Wele Omunyali Owa Bioosi amboolela ali, “Okhababoolele oli ese nalomile kano: Babaandu ne bakwile, se benyokhanga lundi tawe ku? Omundu ne auukhe acha se akobolanga tawe ku?

⁵Siina sikila nono babaandu ba Yerusalemu ne barura banjaukhakho ne bakobola enyuma mu lisuubila? Basuubila bubeeyi mala baloba khukhungobolela.

⁶Nauliile ne khurekeeresia ne se balomaloome bung'ali tawe ne se aliio omundu owebiiya bubwoni bwewe, na khuloma ali, ‘Kholile siina sino, tawe?’ Buli mundu aloonda engila yewe bulayi bwene nga efarasi etima lukali ne echa mwiie.

⁷Akhaba likhuyi mungaaki limanyile siise sialio, liuusi, liyoyo ne ng'ooli biamanya siise sie khuuya. Ne kakhali babaandu base se bamanyile lilaka lia Wele Omunyali Owa Bioosi tawe.

⁸Enywe munyala mwelanga muriena muli, ‘Efwe khuli bakesi,’ ne khuli ne lilaka lia Wele Omunyali Owa Bioosi? Bona, baandiki baandike ke bubeeyi.

⁹Bakesi bakhaambwe chisoni, bakharangararwe mala babukulwe, lola, balobile elomo eya Wele Omunyali Owa Bioosi bali na bukesi siina?

¹⁰ Khwako ese ndaelesia babaandu babaandi bakhasi babwe, ne kimikuunda kiabwe ndaelesia ba babaula, sikila khukhwamila khu mutiiti khukhwola khu mukhoongo, buli mulala ayiima bukhala bukhali bwa ng'ali tawe, khukhwamila khu mung'oosi khukhwola khu musaayi, buli mulala arumikhira bubeeyi.

¹¹ Se baoneselia elala kamakoonjo ke babaandu base tawe. Baloma bali, ‘Khuli ne kumuleembe’, ne kakhali kumuleembe mbao.

¹²Babaandu base baambwakho chisoni nga bakhola bumayaanu ku? Tawe, se baambwakho chisoni ne atiiti ene tawe, ne se bamanya khukhwisonia tawe. Khwako bakhakwe nga babaandi ne bakwa, Nga khabae siiukuumo bakhakhilwe.”

¹³Wele Omunyali Owa Bioosi aloma ali, “Nenya khubuusia babaandu base nga omulimi ne busia likesa, ne kakhali bali kimisabibu kikhalikho siindu tawe, lundi nga kimituli kiikhalikho chinduli tawe, akhaba kamasaafu komile, khwako nafukiiliile babaandu be nje, khuliinda kumukuunda okwo.”

¹⁴Babaandu ba Wele bareeba bali, “Siina sikila ne khwikhala busa ano? Khwibuusie alala mala khwingile mu ngoba chisire, mala khufwiile mu bwenomwo. Sikila Wele Omunyali Owa Bioosi, Wele wefwe akhulaamile khufwe, lundi akhuelesie efwe kameechi kalimo bufwisi, sikila khwakhola bubwoni khu Wele Omunyali Owa Bioosi.

¹⁵Khwalindiilila kumuleembe mala khubonakho bulayi tawe, siise sie buonia, ne kakhali khwabona busiku.

¹⁶Khuechela khwe chifarasi khwauliliikhe mu Dani, sibala sioosi silikho siterema sikila buyoka bwe chifarasi che liie. Bechile bonakaake sibala ne bilimo bioosi, lukoba ne bamenyilemo boosi.”

¹⁷Wele Omunyali Owa Bioosi aloma ali, “Lola ndikho nduma chindemu mwinywe nafwo nicho mukhasangaalila tawe, mala chilamuluma enywe.”

¹⁸“Bubeeleli bwase butuuma liioleelesia, kumwoyo kwase kulikho kulwaala.

¹⁹Rekeeresia bililo biili buli abuundu, mbulila babaandu base ne balila bali, ‘Wele Omunyali Owa Bioosi se asiili Sayuni tawe ku? Omwami owa Sayuni achile waena? Wele Omunyali Owa Bioosi, Omwami wabwe abakobosia ali, siina sikila ne mwambambia lirima khulwe khusaaya bifwaani, ne khu khwinaamila bawele babaandi?’

²⁰Babaandu balila bali, ‘Likesa liaweele, siimiyu siakaame, ne efwe se khwaonile tawe.’

²¹Kumwoyo kwase kwabeleele, sikila babaandu base beriirwe, ndikho ndila, narangaraarwe.

²²Kamalesi se kali mu Kileati tawe ku? Se khuli ne basilikhi tawe ku? Siina sikila nono babaandu base ne bakhaona tawe?