Read lubukusu Yer. 9 Bible Online

Yer. 9 - lubukusu bible

Yer. 9

¹Andi kumurwe kwase kuli esebele, ne chimoni chibe esebele eye kamasika, andi ndilanga kumuusi ne siilo, khulwe khufwa khwe babaandu base!

²Andi ndikho ne abuundu niio menya mu siangalaamwe, aleeyi ne babaandu base! Sikila boosi se bali basuubilwa tawe, bali busa sipupu sie bachaami.”

³Wele Omunyali Owa Bioosi aloma ali, “Buli lwosi berekekha khuloma bubeeyi, bubacha bwechuule mu sibala, Babaandu base bakhola bumayaanu ne batasa khu buundi. Ne se baamanya ese nga Wele wabwe tawe.

⁴“Buli mundu akhasuubila owasie tawe, ne akheyikina mu wandaaye yesi yesi tawe, sikila buli mundu ali omubeeyi nga Yakobo, ne buli musaale ali omuchongani.

⁵Buli mundu abea owasie, ne se aliio oloma bung'ali tawe, beyikia chinimi chabwe khuloma bubeeyi, bakhola bumayaanu ne baluilila khukhwekanila.

⁶Batasa buwanangali khu buundi, lundi batasa bubeeyi khu buundi, baloba khu khumanya ese.”

⁷Khwako Wele Omunyali Owa Bioosi aloma ali, “Sikila kano, ndabakwalaasia ne khubakhaka, sikila se liliio liliindi nilio nyala nakholela, babaandu base tawe.”

⁸Chinimi chabwe chili nga luembo, balomaloma bubeeyi, buli mundu alomaloma ne kumunwa kwewe khu wasie mu muleembe, ne kakhali mu mwoyo amwibaasilia kamabi.

⁹Wele Omunyali Owa Bioosi aloma ali, “Ese se ndabaelesia siiukuumo khulwe bibiindu bino tawe ku?” Ne se ndeyacha khu kholo nga yino eri tawe ku?

¹⁰Lilila ne khukhwesasaara khulwe bikulu, ne khukhwiunamila khulwe kamayilwe ke mu sichiimi sikila bianjukhwe se aliio ochayo tawe, khumoloola khwe chikhaafu se khuuliilikhanilayo tawe, chinyuni ne chisaang'i che mundaa cheluukhe.

¹¹Wele Omunyali Owa Bioosi aloma ali, “Ese ndakhola Yerusalemu lube kamakuunda, abuundu niio chingipwe chimenya, ne ndakhola chingoba cha Yuda chibe sichiimi, abuundu niio omundu akhamenya tawe.”

¹²Mundu siina oli omukesi lukali onyala aulila lino? Naanu niye Wele Omunyali Owa Bioosi abooleele nio aboolele babaandi? Siina sikila kamaloba ne konakaakwe mala kanjukhwe nga sichiimi, nio mbao obiramo tawe?

¹³Ne Wele Omunyali Owa Bioosi akobosia ali sikila balobile lilaka liase nilio nabaelesia ne se bandiire namwe baloondile niko nababoolela tawe.

¹⁴Ne kakhali babeele bamiinyi ne khuloonda lilienya liabwe ne khusaaya bifwaani bia Baali nga bakuuka babwe ne babeyikia khukhola.

¹⁵Khwako, Wele Omunyali Owa Bioosi Wele owa Isiraeli, aloma ali lola ndaliisia babaandu bano nabululu ne khubaelesia kameechi ke bufwisi banywe.

¹⁶Ndabasalanisia mu chikholo nicho nibo namwe baraarawabwe bakhamanya tawe. Ne ndibaloondiakho banamae babeere khukhwola nga ne mbabunia.

¹⁷Wele Omunyali Owa Bioosi aloma ali: “Yibaasia mala mulange bakhasi balila beche, rumania mulange bakhasi babemba chinyimbo che kamasika beche.

¹⁸Lekha bakhole khangu bakukuule sikila efwe, nio kamasika kalengalenge mu moni chefwe, mala bisike biefwe bichukhe kamasika nga kameechi.”

¹⁹Biililo biauliilikhanile Sayuni: “Efwe khwabunile! Khwanyoolile chisoni lukali, sikila khwalekha sibala, sikila batechula bumenyo bwefwe.”

²⁰Ee, bakhasinywe, ulila elomo ya Wele Omunyali Owa Bioosi, ne lekha kamaru kenywe kaulile elomo yewe, yekisia bakhaana benywe khukhwiunamila, ne buli mulala khwinywe ekisie owasie, kimienya kie kamasika.

²¹Sikila lifwa liengiile khubirira mu matirisia kefwe, mala liengiile mu chinju chefwe, lierire babaana baweele khukhwama khu ngila che chingoba, ne liamalile babaana basoleeli khu soko.

²²Wele Omunyali Owa Bioosi aloma ali, “Lomaloma, kimibili kie bafu kilakwa nga kamasisie mu mukuunda, nga kumukhebo kulekhwa enyuma we likesa, ne se aliio olababuusia tawe.”

²³Wele Omunyali Owa Bioosi aloma ali, “Bakesi bakhebonia sikila bukesi bwabwe tawe. Ne owe kamaani akhebonia sikila kamaani kewe tawe. Ne omuiinda akhebonia sikila buiinda bwewe tawe.

²⁴ Ne kakhali oyo owebonia ebonie khu likhuwa lino: ali ambulila ne khukhumanya ese. Lundi amanye ali ese ndi Wele Omunyali Owa Bioosi owe busiime bukali bwa buli lwoosi, owa ng'ali lundi omuluungi mu sibala. Wele Omunyali Owa Bioosi aloma ali ‘sikila asiimisibwa ne bibiindu bino.’ ”

²⁵Wele Omunyali Owa Bioosi aloma ali, “Lola chindaalo chilikho chiicha nicho khaukuumilemo babaandu babakhebwa busa kimibili kiabwe kiong'ene.

²⁶Ndaukuuma babaandu ba Misiri, Yuda, Edomu, Baamoni, Moabu, ne naabo boosi bamenyile mu siangalaamwe babekanga lichuune liabwe. Babaandu bano boosi bali babaandu ne kakhali se batiila kumwiima kwe busaani tawe. Se aliio owatiila likhuwa liase tawe.”