Read lubukusu Lis. 1 Bible Online

Lis. 1 - lubukusu bible

Lis. 1

¹Lie khuukia, lukoba lwa Yerusalemu lulwaba lwechula babaandu, luno luli busa! Lulwaba ne fuma mu sibala sioosi, luno lwekelile nga namulekhwa, Lulwaba lukoosi mu ngoba choosi, luno lwekelile nasioobi.

²Lukoba lulila lukali siilo sioosi, kamasika keekha. Mu basiime balwo boosi, se aliio oluoleelesia tawe. Basaale balwo baluchonganiile, mala boosi bakwile basiku balwo.

³Babaandu ba Yuda bachiile mu mbaambe, mu butinyu ne khuuba banasioobi. Bamenyile mu Be Chikholo, se bali nende niio baolela tawe. Basiku babwe babakariire akari we butinyu bwabwe.

⁴Kimiila kicha Sayuni kieteleelile, sikila se aliio ocha mu naikara chicharoborwa tawe. Bilibwa bialwo bioosi bianjuukhwe basaayi be lukoba baana. Bakhaana balwo bapisibwa sibi, ne lulwene luli ne buchuuni bukali.

⁵Basiku balwo balwamiie, luno luli mu bunyali bwabwe. Sikila Wele Omunyali Owa Bioosi alukholile lunaanisibwe sikila bukali bwe bubwoni bwalwo. Batilile babaana balwo, mala babayilile aleeyi.

⁶Bulayi bwa Yerusalemu obwo bwaweele. Babemeelesi balwo bawelemo kamaani, nga chimboongo chiili ne njala, chiboombeleelwe kamaani, ne chilukha abo bachaaya.

⁷Mu ndaalo che butinyu ne buchuuni bwa Yerusalemu, Yerusalemu lukhebulila bulayi bubwabaao. Bibiindu bie bukusi bioosi, bibiaba bialwo khukhwama khale. Nga babaandu balwo ne bakwa, mu bunyali bwo omusiku, omundu se abao oluyeeta tawe. Omusiku asangaala, ne khuchekheelela khukwa khwalwo.

⁸Lukoosi lwalwo lwawele, luli sichula lundi lwalekiilwe, lulila mu buchuuni ne khuambwa chisoni. Yerusalemu lwenyaalutisie ne bubwoni bubi lukali.

⁹Bunyaalu bwalwo bweyaniikhiile, ne se lweendekhelela libuna lialwo liliicha tawe. Likwa lialwo lili lie khuriisia ne se aliio onyala aluoleelesia tawe. Basiku balwo baluulile, mala lulilila Wele Omunyali Owa Bioosi alukholele siisa.

¹⁰Basiku balwo balunuulile kamabiikhilo kalwo koosi, lwababona ne bengila akhaba mu Lukaangu, abuundu niio Wele Omunyali Owa Bioosi yaba akaania Be Chikholo khucha.

¹¹Babaandu balwo boosi beloocha ne bayiima siakhulia. Boofula kamabiikhilo kabwe khulwe siakhulia nio babe ne kamaani. Lukoba lulila luli, “Wele Omunyali Owa Bioosi, bona siibi nisio ndimo.”

¹²Lukoba lulilila buli obira luli, “Lola salikhoo owabona buchuuni nga bubwase buno tawe. Buchuuni nibwo Wele Omunyali Owa Bioosi andeerera mu siise sie lirima liewe.

¹³“Wele Omunyali Owa Bioosi areera kumulilo khukhwama mungaaki, kwanjosiisie akhaba mu bikuumba. Andekire luriimba, mala lwakhupile asi, anjanjukhe ne khukhundekha mu buchuuni.

¹⁴“Abala bubwoni bwase mala abura alala, mala abura mwikosi mwase, mala nabombelelwa kamaani. Omwami anda mu makhono ke basiku base, ne se nanyala khubakholakho siosi siosi tawe.

¹⁵“Omwami achekheelela banamae base boosi be kamaani, aruma banamae bewe khukhwira babase. Aswalakiliile babaandu base oli osuura endali.

¹⁶“Ese ndila sikila bibiindu bino, kamasika keekha, sikila Omuoleelesi wase ali aleeyi nase, oyo oundamo kumwoyo, babaana base banjuukhwe sikila omusiku ambulile.

¹⁷“Sayuni lwasutile kamakhono kalwo mungaaki, ne se aliio oluoleelesia tawe. Wele Omunyali Owa Bioosi abisiisie siiukuumo khunju eya Yakobo. Ali bachirani khukhwola babe basiku bewe. Yerusalemu lwekelile sisiindu sinyaalu mu nibo.

¹⁸“Wele Omunyali Owa Bioosi ali owa ng'ali, sikila nalobile khuria likhuwa liewe, ne kakhali ulila, enywe babaandu mweesi, mala mubone linaanisibwa liase, basoleeli ne bakhaana base baele bachiile mu mbaambe.

¹⁹“Ese nalaanga basiime base ne kakhali bambea, basaayi base ne babemeelesi babuniile mu lukoba, nga baba ne balikho bayiima siakhulia balie banyoole kamaani.

²⁰“Ee Wele Omunyali Owa Bioosi, lola ese ndi mu buchuuni ne bubeeleli, ne kumwoyo kwase kwesiindukhe sikila bubwoni bwase. Bubwiri buli khu ngila che lukoba, akhaba munju lifwa lilimo.

²¹“Ulila nga ne ndila, se aliio onyala amboleleesia tawe. Basiku base boosi baulile butinyu bwase. Basangaale sikila ewe obureerire. Lekha endaalo niyo wabisia yoole, ne lekha basiku base bapwe sibi nga ese.

²²“Bakhalakile khulwe bumayaanu bwabwe, baukuume nga ne wambukuuma ese sikila bubwoni bwase. Ndi mungunyi mala ndila mu buchuuni.”