Read lubukusu Lis. 2 Bible Online

Lis. 2 - lubukusu bible

Lis. 2

¹Omwami mu lirima liewe areere babaandu ba Sayuni mu siilima, bulayi nibwo baluelesia khukhwama mwikulu bwaweele, mu siise sie lirima liewe anjukha Lukaangu lwewe.

²Omwami onakake buli sirekere sia Yuda, se abikholelakho siisa tawe, atechuule kamasiisi kakaba ne kakhiingilila babaandu. Areera chisoni khu baami ne khu baruki ba Yuda.

³Mu lirima liewe likali abunia Isiraeli, aloba khukhuyeeta endaalo niyo basiku bechela. Akhwosia oli kumulilo, onakaka buli siindu.

⁴Eerekekha khukhulasa efwe buembo bwewe nga omusiku, eera babaandu befwe nibo khweyiikina. Khwabona lirima liewe likali mu Yerusalemu.

⁵Omwami abuniisie Isiraeli nga omusiku, atechuule kamasiisi kakaliinda babaandu, onakake kamachipi. Arereere babaandu ba Yuda bubeeleli bukhawa tawe.

⁶Atechula Lukaangu niio khwamusaayilanga, akaamie chindaalo chindakatifu ne chisabato. Lirima liewe liabele khu mwami no musaayi.

⁷Omwami alobile alutare yewe ne khurura mu Lukaangu lwewe lutakatifu, afukiilila omusiku khutechula lisiisi lialwo. Basiku basangaalila bukhili bwabwe niio efwe khwasaayilanga ne khoyo.

⁸Wele Omunyali Owa Bioosi beele abisiisie kamasiisi ka Sayuni katechulwe, akapiima khumanya ali buli siindu sioneekhe, se waresiisie kumukhono kwewe kwe khukhwonaka tawe. Akholile enjeko ne lisiisi khusooma, bililila alala.

⁹Bilibwa bialwo biesikhile mwiloba, atechule ne khufunaka kimitalaachi kialwo, Omwami ne babemeelesi balwo bali balala khu Be Chikholo, lilaka se liekisibwa lundi tawe, ne bang'oosi balwo se banyoolanga kamalola khukhwama khu Wele Omunyali Owa Bioosi tawe.

¹⁰Basaakhulu be babaandu ba Sayuni, bekhala asi ne basila busa. Bechukhile lipukhuulu khu mirwe kiabwe, mala befwarire kamakunia. Bakhaana ba Yerusalemu, benamisie kimirwe kiabwe asi.

¹¹Chimoni chase chaluiliile sikila khulila. Kumwoyo kwase kunaanisibwa, naluiliile mu bubeeleli, khulwe linaanisibwa lie babaandu base, sikila babaana batoro ne bang'alia bafwila mu ngila che lukoba.

¹²Balilila bamawaabwe bali, “Khuli ne njala lundi khuli ne bulesia.” Ne bafwa oli babaandu babapilwe mu ngila che mu lukoba, ne bafwila khu bifuba bie bamawaabwe.

¹³Ee ewe owa Yerusalemu, ese ndome siina khwiwe? Khulekhaasia khu siindu siina nio khuolelesie, ee mundu owe Sayuni? Sikila lilionakwa liowo lili libalaayi nga enyanja, naanu onyala akhukobosia niio waba?

¹⁴Bang'oosi bowo bakhubonele, kamalola ke bubeeyi lundi katiimia, se babakaale abuwaanga bumayaanu bwowo, nio okobole niio waba tawe, ne kakhali bakhung'oolela burume bwe bubeeyi lundi butiimia.

¹⁵Boosi babirira khu ngila, bamukhoma enywe, bauka ne khusisiikha kimirwe kiabwe, sikila lukoba lwa Yerusalemu, bareeba bali, “Luno nilwo lukoba lulwalaangwa, lwe mu lukoondo lwoosi, liliekhoya lie sibala sioosi ku?”

¹⁶Basiku bowo boosi bakhuchekheelela ne khukhuloleelela ne libiila, bauka ne khukhwikhana bali, “Khwababunisie! Aa, yino niyo endaalo niyo khwalindilenge, luno yolile khwakibone!”

¹⁷Wele Omunyali Owa Bioosi akholile niko arekekha, akholile niko ariikhirisia nga ne arao khukhwama khale, atechule nakhali ne siisa tawe, akholile omusiku asangaalile kamabi kakekholekha khwise, mala afumisie kamaani ke basiku base.

¹⁸Ee ewe mundu owa Sayuni! Lilila Wele Omunyali Owa Bioosi lukali! Lekha kamasika keekhe nga luluuchi. Siilo ne kumuusi! Okhaolakho tawe, chimoni chowo chikhabakho ne siuluukho tawe!

¹⁹Yinyokha siilo olile, lila buli khase siilo sioosi, ra koosi kaali mu mwoyo kwowo ebweeni wa Wele Omunyali Owa Bioosi, mwikoonjelele mwisaba, khulwe bulamu bwe babaana bowo, balikho bafwa enjala buli abuundu khu ngila che lukoba.

²⁰Ee Wele Omunyali Owa Bioosi, lola mala obone! Naanu nibo wakholelakho kano? Ewe wenya bakhasi balie babaana babwe, babaana nibo basiima? Omusaayi no mung'oosi beererwe Abuundu Atakatifu owa Wele Omunyali Owa Bioosi?

²¹Baele ne basaakhulu, bakonile mwipukhuulu lie chingila, bakhaana ne baele base, beriirwe ne mbalu mwiie, waberiire mu ndaalo eye lirima liowo, wabakhonyile nokhali ne siisa tawe.

²²“Ewe walanga basiku base khu ndaalo eya naikara eyaroborwa, ne khu ndaalo eye lirima liowo Wele Omunyali Owa Bioosi, se aliio owebacha namwe owarama tawe, abo nibo nalela ne khukhusia, beriirwe no musiku wase.”