Read lubukusu Lis. 3 Bible Online

Lis. 3 - lubukusu bible

Lis. 3

¹Ese ndi omundu oboone buchuuni, asi we siboko sie lirima lia Wele.

²Amboonile anderire mu siilima, niio buwaanga bwosi bwosi bukhali tawe.

³Ng'ali akhupanga lukali endaalo yoosi.

⁴Atofusie kumubili kwase, mala afunakake kamakuumba kase.

⁵Anjibwaakale ne khusira, mu buchuuni ne kumunaanio.

⁶Akholile ese menye mu siilima, nga omundu owafwa khaale.

⁷Angarire ne lisiisi nio khanyala nelukha tawe, amboele kiminyololo kimisiro,

⁸nakhalanga ne khulila khulwe buyeeti, Wele alobile khurekeeresia lisaba liase.

⁹Ekaasie kimiyila kiase ne kamabaale, akoyanisie chingila chase.

¹⁰Khwise ali nga sibulukhu sisiibuulila, nga etalang'i eyikhiinile.

¹¹Andusiisie khu ngila yase andabulaakemo, mala andekhile busa.

¹²Arekekha buyiingo bwewe mala aluungikha luembo lwewe khwise.

¹³Andasile khu mwoyo, buembo bwe mu situukhu siewe.

¹⁴Ese nekelile chinjekho che babaandu boosi, liliamanana lie kimienya kiabwe endaalo yoosi.

¹⁵Anjichusiemo buchuuni, anjikuusie ne nabululu.

¹⁶Akholile kameeno kase kapepene chimbaale, mala akholile nefulafusie mwikokhe,

¹⁷kumuleembe mu mwoyo mbamo, nebiliile busangaafu.

¹⁸Nio ese ndoma ndi “Bulayi bwase bwawa, akhaba nibio nenya khukhwama khu Wele Omunyali Owa Bioosi.”

¹⁹Khebulila butinyu bwase ne buchuuni, bululu nga endurwe!

²⁰Ese njililila khubibaasia, mala neunamila.

²¹Ne kakhali ese khebulila lino, ne khwako ndi ne lilieyikina.

²²Busiime bwa Wele Omunyali Owa Bioosi se buwechanga tawe, siisa siewe se sili ne sisiakamo tawe.

²³Biyia buli mutikhinyi, busuubilwa bwewe buli bukali.

²⁴“Wele Omunyali Owa Bioosi ali kumukabwa kwase, khwako ndimweyikina.”

²⁵Wele Omunyali Owa Bioosi ali omulayi, khwaabo bamweyikina, ne khu muyiima.

²⁶Buli bulayi omundu alindiilile mu liliekhaliilikha, buonia bwa Wele Omunyali Owa Bioosi.

²⁷Buli bulayi omundu khuba ne liliekhaliilikha na siili omuele.

²⁸Wele Omunyali Owa Bioosi ne enyile ario, lekha ekhale yeng'ene mala asile.

²⁹Lekha eboombie, lilieyikina likhola lirio liabao.

³⁰Akhapwa ne khukhomwa, khafukiilile koosi.

³¹Sikila Omwami se alikhulobela ewe elala tawe.

³²Ne akhaba nakhubeelesia, akhakhukholele siisa, khuloondekhana ne busiime bwewe bwa buli lwoosi.

³³Sikila se asiima khuchuunia, namwe khubeelesia babaandu tawe.

³⁴Owe Angaaki Lukali se afukiilila khuswalakilila baboe mu sibala tawe,

³⁵Khukaluukhasia bung'ali bwo mundu, ebweeni wewe tawe,

³⁶namwe se afukiilila bukhalaki khu mundu bukhali ng'ali tawe,

³⁷Naanu onyala alaka likhuwa mala liekholekha, Omwami nakhareerekho kumukhono tawe?

³⁸Bubi ne bulayi, se biama khuyo owe Angaaki Lukali tawe ku?

³⁹Siina sikila omundu omulamu eng'ulung'uunye, ne aukuumwa khulwe bubwoni bwewe?

⁴⁰Lekha efwe khupiime mala khumenieelesie liiba liefwe, nio khukoboleele Wele Omunyali Owa Bioosi!

⁴¹Lekha kimiooyo kiefwe ne kamakhono kalekhuule, ebweeni wa Wele oli mwikulu.

⁴²“Efwe khwakholile bubwoni ne bureengu, mala ewe Wele Omunyali Owa Bioosi se wakhubeeleele tawe.

⁴³“Ewe wakhutimanie mala wakhubunia, lirima liowo liakisa siisa siowo,

⁴⁴khulwe lirima liowo likali, lisaba liefwe se liakhwolela tawe.

⁴⁵Ewe wakhukhola efwe khwaba nga kamandu, mu baandu Be Chikholo.

⁴⁶“Basiku befwe boosi, bakhukhoma ne khukhuchekheelela efwe.

⁴⁷Efwe khwabirire mwibuna ne lilionakaka, khuli mu butinyu ne buuri.

⁴⁸Ndila lukali, kamasika keekha nga luluuchi, khulwe libunia lie babaandu base.

⁴⁹“Se ndalekha khulila tawe, ndachiililila busa,

⁵⁰khukhwola Wele Omunyali Owa Bioosi oli mwikulu, alole asi mala akhukholele siisa.

⁵¹Kumwoyo kwase kuchuuna, ne mbona kakekholeekhe khu bakhasi be mu lukoba.

⁵²“Abo bakhaba ne sifuno khuba basiku base tawe, bambaaya nga enyuni.

⁵³Bamwaata mwiloo ne siili omulamu, mala barayo libaale.

⁵⁴Kameechi kechula kanjola khu murwe, mala nebaasia ndi lifwa liolile.

⁵⁵“Ee Wele Omunyali Owa Bioosi, ese nakhulilila Ewe, ne ndi mwiloo.

⁵⁶Nakhwikoonjelela mala ewe waulila, se waloba khuulila khulila khwase khulwe buyeeti tawe!

⁵⁷Nakhulaanga ewe wecha aembi, wamboolela oli, ‘Okharia tawe!’

⁵⁸“Ee Omwami, ewe waulile kakaase, wasikuule bulamu bwase.

⁵⁹Ee Wele Omunyali Owa Bioosi ewe waboone kamabi niko nakholelwa, ewe khalakile mu bung'ali bwase.

⁶⁰Ewe waboone lichonganila liabwe lioosi, ne kamarekekha kabwe koosi khwise.

⁶¹“Ee Wele Omunyali Owa Bioosi, ewe wauliile khukhoma khwabwe, ne kamarekekha kabwe koosi khwise.

⁶²Endaalo yosi kamakhuwa ne kamebaasio ke basiku base, kali khwise.

⁶³Lola mu likhala ne lilinyokha liabwe, ese ndi sifuno sie kimienya kiabwe.

⁶⁴“Ee Wele Omunyali Owa Bioosi, ewe okhabaukuume, khulwe bikholwa biabwe.

⁶⁵Ewe okhabalendaasie, ne silaamo siowo sikhabe khu nibo.

⁶⁶Ee Wele Omunyali Owa Bioosi mu lirima liowo okhabaoone mala obabunie, barure khu sibala.”