Read lubukusu Lis. 4 Bible Online

Lis. 4 - lubukusu bible

Lis. 4

¹Esahabu epuukhile eriena, Esahabu emiliiu ekaluukhane eriena! Kamabaale kamatakatifu kasalanile khu ngila choosi.

²Baele be siseecha ba Sayuni, baba ne bukhala khwifwe nga esahabu, ne kakhali luno babalwa nga chinyuungu.

³Akhaba chingipwe chinunianga ching'ana chacho, ne kakhali babaandu base babeele barafu, nga chinyeefwe mu sichiimi.

⁴Balekha batoro babwe bafwa khulwe njala ne bulesia, ne babaana basaba siakhulia ne se aliio obaelesia tawe.

⁵Abo babalichanga naikara che biakhulia bilayi, balikho bafwila khu ngila che mu lukoba, ne abo babachoela mu buiinda bakonile khu mabuumbi.

⁶ Sikila siiukuumo khu baandu siabeele sikali khukhila sisiaba khu Sodomu, lukoba lulwakwa siise sikeekhe siri, omundu nakhaluambilekho tawe.

⁷Babemeelesi balwo baba bakwalaafu khukhila liaarara bawaanga khukhila kamabeele, baaba babesemu khukhila liloba asi we nyanja, lukoondo lwe kimibili kiabwe oli libaale lie bukusi lia samawi.

⁸Luno bamaliie khukhila embilo, babira khu ngila ne babaandu se babamanya tawe. Sikhoba siabwe siekhunaare khu bikuumba biabwe, mala bomile busa nga chiikhu.

⁹Bali ne busangaafu abo babafwila mwiie, khukhila nibo enjala yeera, nibo enjala yeera kalaa sikila se baba ne siakhulia tawe.

¹⁰ Libuna lilianyoola babaandu base liabariisia lukali, bakhasi be busiime bateekhile babaana babwe khulwe siakhulia.

¹¹Wele Omunyali Owa Bioosi akhalala lukali, ekesia lirima likali, mala aambia kumulilo mu lukoba lwa Sayuni, kwalosia lwakubukha.

¹²Babaami be khu sibala, namwe yesi yesi khu ba baamenya mu sibala se basuubila, bali omusiku anyala engila mu bilibwa bia Yerusalemu tawe.

¹³Lino liekholekha sikila bubwoni bwe bang'oosi ba Yerusalemu, ne bubwoni bwe basaayi balwo, babachukha sifuki sie babaandu baluungi akari walwo.

¹⁴Babemeelesi balwo bayiiyayiiya khu ngila nga babofu, se abao yesi yesi owabatiilakho tawe, sikila baba beakhile kamafuki.

¹⁵Babaandu babayokelela bali, “Cha eyo! Enywe babeeri! Mukhakhwichao tawe!” Khwako bayiiyayiiya mu bibala ne se abao owabakaanila tawe.

¹⁶Wele Omunyali Owa Bioosi omwene abasalanisie, se alibebaasiakho lundi tawe, Basaayi se baebwa lukoosi tawe, ne basaakhulu se basiimwa tawe.

¹⁷Efwe khwaluilila khukhwikhala meso, mu khulindiilila buyeeti bukhaliio tawe, mu khwikhala khwefwe khwalindiilila ekholo ekhanyala yakhuonia tawe.

¹⁸Basiku befwe bakhwibuulila, se khwakeendakho khu ngila tawe, chindaalo chefwe chaba chaweele, lifwa liefwe liaba liolile.

¹⁹Bakhutimania efwe baba ne chimbilo chingali, khukhila waasio chiili angaaki, bakhutimanisilia mu bikulu, bakhwibuulila mu sichiimi.

²⁰Baamba sinoko sie bulamu bwefwe, omwami owaroborwa ne Wele Omunyali Owa Bioosi, niye khweyikina khukhuabina efwe khukhwama khu buli musiku.

²¹Enywe baandu Baedomu, yekhoya mala musangaale, enywe mumenyile mu sibala sia Usi ne kakhali wesi butinyu bukhakhwichekho, olimeela mala wefuule orame sichula.

²²Ee ewe owa Sayuni, siiukuumo khulwe bubwoni bwowo siawele, Omwami se alalekha muchiililile khuba mu mbaambe tawe, ne kakhali ewe mukhaana wa Edomu, Wele Omunyali Owa Bioosi alaukuuma bumayaanu bwowo, mala asiimbule bubwoni bwowo.