Read lubukusu Lis. 5 Bible Online

Lis. 5 - lubukusu bible

Lis. 5

¹Ee Wele Omunyali Owa Bioosi, khebulila butinyu bwefwe, bona nga khuli mu soni!

²Kimiaandu kiefwe kiakabilwe bakeni, chingo chefwe chabeele che baakwa.

³Efwe khwabeele bafuubi, bamaayi befwe bali nga banamulekhwa.

⁴Khukula kameechi ke khunywa, chiikhu nicho khutekhela.

⁵Khukhola kimilimo nga chipunda, khwaluile, ne se khunyoola siuluukho tawe.

⁶Khwakholeele Bamisiri ne Baashuru kimilimo nio khunyoole siakhulia sisioola.

⁷Bakuuka befwe bakhola bubwoni mala bafwa, ne efwe khunaanisibwa sikila bubwoni bwabwe.

⁸Nasioobi bakhwamiia efwe, se aliio onyala akhurusia efwe mu bunyali bwabwe tawe.

⁹Khunyoola siakhulia siefwe mu butinyu, sikila basiku bali buli abuundu.

¹⁰Bikhoba biefwe bibila nga sisiooso, khwang'aile lukali sikila enjala elikho ekhulia.

¹¹Babaandu bakwa khu bakhasi befwe mu Sayuni, akhaba khu bakhaana befwe be mu ngoba cha Yuda.

¹²Babemeelesi basuungwa kamakhono kabwe mungaaki, mbao oria basaakhulu tawe.

¹³Basoleeli befwe bayingililwa khusia khu lususi, ne babaana be siseecha bataalitaala ne chiikhu khu mirwe.

¹⁴Basaakhulu balekhile khucha mu chikoti, ne basoleeli balekhile khukhwimba.

¹⁵Busangaafu mu miooyo kiefwe bwaweele, bukhino bwefwe bwabeele sibeela.

¹⁶Ekuutwa eye lukoosi lwefwe yakwile, khuli mu sibi sikila khwakholile bubwoni!

¹⁷Kimiooyo kiefwe kilwaala sikila kano, sikila bibiindu bino chimoni chefwe chabofuule.

¹⁸Sikulu sia Sayuni sianjuukhwe, luno chingipwe chikeendakho busa.

¹⁹Ee Wele Omunyali Owa Bioosi, ewe wamiia buli lwoosi, endebe yowo eye bubwami eliio khu selukho choosi.

²⁰Siina sikila Ewe nokhwibilila efwe buli lwoosi? Siina sikila nokhwanjukhe efwe khulwe siise sileeyi?

²¹Ee Wele Omunyali Owa Bioosi khekhukhukobolele khube nga khwaba! Kalukhasia chindaalo chino, chibe nga yaba khaale!

²²Namwe ewe wakhwekaaniile elala? Ewe osikhuambila lirima likali?