Read lubukusu Esek. 1 Bible Online

Esek. 1 - lubukusu bible

Esek. 1

¹ Khu ndaalo eya kharaano eye kumwesi kwe khane kwe kumwiiko kwe kamakhumi kataru[1] Ese Esekieli omusaayi okhwa Busi naba mulala khu baboe be mbaambe eye Bayaudi, naba ndi a luuchi lwa Kebari, mu Babiloni. Nio likulu liekukha mala nabona kamalola ka Wele.

² Khu ndaalo eya kharaano eye kumwesi (kwaba kumwiiko kwa kharaano kwe siboe sie mbaambe sio mwami Yehoyakini)

³Nga naba mu Babiloni ambi ne luluuchi lwa Kebari, naulila Wele Omunyali Owa Bioosi ne andomalomakho mala andaakho kumukhono kwewe.

⁴Nga ne nalola, nabona embembeesi yama ebunaswa. Lueni lwaburukha khukhwama mwifuumbi liboofu, lwakhosia mu ngaaki ne luchiililila. Nga lueni lwabonekhanga, chinjaso che kumulilo chakhosia mala sisiindu nga kumukasa siabonekhana.

⁵ Ne akari we mbembeesi sisiindu siamamo sifwaana nga bibuumbe bine bie bulamu. Mala biaba bifwaana biri: Biafwaana babaandu.

⁶Ne buli silala siaba ne bubweeni bune, buli silala siaba ne chindaa chine.

⁷Bikele biabio bikololofu, ne bikhandakilo biabio biaba nga bikhakayu bie khaafu, mala biang'enang'ena nga kumukasa.

⁸Asi we chindaa chabio chimbeka chine, biaba ne kamakhono nga ko mundu. Bioosi bine biaba birio,

⁹chindaa chabio chaba chetilanakho, chapurukhanga bukololofu ne bibuumbe ebio se biayuukhangakho tawe.

¹⁰ Mu moni mwabio, buli silala siaba ne bubweeni nga bwo mundu, Bioosi bine biaba ne lubeka luseecha lwe mu moni mwabio nga mwe talang'i, ne lubeka lukhasi lwafwaana nga mwe uunwa, lundi biafwaana mu moni nga mwe furuusi lubeka lwe nyuma.

¹¹Mu moni mwabio mwaba murio. Biabambula chindaa chabio mu ngaaki, buli sibuumbe siaba ne chindaa chibili, buli lutaa lwetiila khu lutaa lwe sibuumbe sisiindi ne chindaa chibili chafuuma kimibili kiabio.

¹²Buli silala siapurukha bukololofu ebweeni, biachichanga osi osi niye roho eenyanga ne se biekhebukhakho tawe.

¹³Akari we bibuumbe bie bulamu siabao sisiindu sifwaana nga kumulilo kwe kamaanda, nga chinjaso ne chiicha eyi ne eyi akari we bibuumbe bilamu. Kumulilo kwaba kwesing'eeng'ile lukali lundi kwarusia chimbeni.

¹⁴Bibuumbe bilamu ebio bioosi biatima ne bicha eyi ne eyi khangu nga lueni.

¹⁵ Nono nga ne naloleelela bibuumbe bilamu bino, nabona chingara chine siimbi nende buli sibuumbe silamu.

¹⁶Chingara chine echo chafwaanana, chang'enang'ena nga libaale lie bukusi lilaangwa Sabarachati, chaba chombakhwa nga engara mu kiindi.

¹⁷Nio nga chingara echo ne chatima chacha chimbeka choosi chine ne chikhayuukhakho tawe.

¹⁸ Chingara chine echo chaba ne chingarangarani, ne chingarangarani chaba ne chiwaya, mala chingarangarani echo chaba chechulamo chimoni chimbeka choosi.

¹⁹Ne nga bibuumbe bie bulamu biarekukha, chingara echo charekukhila khulala nabio. Ne nga bibuumbe bie bulamu biarura khu sibala bianiina angaaki, aakhaba chingara chosi chaniina.

²⁰Osi osi niio roho eenya khucha biacha, ne chingara charekukhila khulala nabio, sikila roho owe bibuumbe ebio aaba mu ngara echo.

²¹Buli nga bibuumbe ne biarekukhanga, chingara chosi charekukha, buli nga ne biemanga, chosi chema, ne nga bianiina khukhwama khu sibala chingara chosi chaniina alala nabio, sikila roho owe bibuumbe bilamu ebio aaba mu ngara echo.

²² Angaaki we kimirwe kie bibuumbe bilamu, nabona sisiindu sisiafwaana nga embaka eye likulu, sisiakhosia nga sikioo, sisialaanda khu mirwe kiabio.

²³Ne aasi we mbaka eyo chindaa che bibuumbe chabambulwa chakololokha, buli lutaa lwalola niio luluundi luli. Ne buli sibuumbe siaba ne chindaa chibili chifuumile kumubili kwasio.

²⁴ Ne nga biarekukha, naulila luyoka lwe chindaa chabio ne luuliilikha oli manya kameechi ke nyanja namwe nga luyoka lwe banamae bakali namwe nga liliatulukha lia Wele Omunyali Owa Bioosi. Nga biema, biekhisia chindaa chabio.

²⁵Nio kumumilo kwauliilikhana khukhwama mu mbaka eye khu mirwe kiabio, nga biema biekhisia chindaa chabio.

²⁶ Ne khu ngaaki khwe mbaka eye khu mirwe kiabwe siabakho sisiindu sisiafwaana nga endebe eye bubwami mu lukoondo lwayo nga libaale lie bukusi bwe angaaki lubuusi, ne sisiindu siaba siekhaalekho sifwaana nga omundu.

²⁷ Sifwaanani esio sing'enang'ena oli kumukasa mu mulilo. Khukhwamila abuundu aaba nga mu sibuno, siakhosia nga kumulilo buli abuundu ne buwaanga bukali.

²⁸Buli lukoondo nga lwe lufutu mwileesi biise bie fula. Buno bwaba buwaanga bukali buli abuundu bubwekesia luyali lwe khubao khwa Wele Omunyali Owa Bioosi. Nga nabona kano nakwa asi mafumala. Nio naulila kumumilo kwo mundu ne aloma