Read lubukusu Esek. 10 Bible Online

Esek. 10 - lubukusu bible

Esek. 10

¹ Nio nabona lulama angaaki we kimirwe kie bibuumbe bilamu, angaaki wabio sisiindu siabao sibonekha nga endebe eyang'oonwa khukhwama khu mabaale ke bukusi bwe angaaki kamabuusi.

² Wele aaboolela omundu owaba ne afwarire engubo eya katani ali, “Cha akari we chingara chibotookhelela chiili aasi we bibuumbe bilamu, obukule kamanda kamakali kakesing'eeng'ile khukhwama akari wabio mala okasalanisie mu lukoba.” Ese namuloleleela ne alikho acha.

³Omundu oyo nga engilamo, chikerubi chaba chemile siafubo we Lukaangu, lifuumbi liafuunikha luuya lwe mukari.

⁴Nio luyali lwa Wele Omunyali Owa Bioosi lwama mu bibuumbe bilamu lwamalatana lwola esilibwa sie Lukaangu, mala luuya lwechula luyali lwa Wele Omunyali Owa Bioosi.

⁵Ne luyoka lwe chindaa che bibuumbe bilamu ebio lwauliilikhana aakhaba enje we luuya nga kumumilo kwa Wele Owe Bunyali Bwoosi ne alikho alomaloma.

⁶Ne nga Wele Omunyali Owa Bioosi ne alaka omundu owaba nafwarire engubo eya katani ali, “Bukula kumulilo khukhwama akari we chingara chilikho ne chibotookheleela khukhwama mu bibuumbe bilamu.” Engila acha ema a ngara.

⁷Ne sibuumbe silamu silala siayila kumukhono kwasio khukhwama akari we bibuumbe bilamu khukhwola khu mulilo kukwaba akari we bibuumbe bilamu akubukulakho kumulilo mala akura mu makhono ko mundu owaba nafwarire engubo eya katani, abukula kumulilo mala arura nakwo enje.

⁸Bibuumbe bilamu biabonekha nga bili ne kumukhono kwo mundu asi we chindaa chabio.

⁹ Ne nalola mala nabona, chabao chingara chine a bibuumbe bilamu buli engara ndala a sibuumbe sie bulamu silala, ne chingara echo chang'enang'ena nga kamabaale ke bukusi.

¹⁰Ne bioosi bine biafwaanana, bulayi bwene busa oli fwaana engara eyaambaasibwa mu ngara ekiindi.

¹¹Ne nga bibuumbe bilamu bianyala khucha chimbeka chosi chosi ne bikhayuukhakho tawe. Niio silala silala siachiichanga bioosi bialoondangakho ne bikhayukhakho tawe.

¹² Mala nabona ndi, chingara ne kimibili kiabwe, akhaba khu mikoongo, khu makhono, khu ndaa biaba biechula chimoni.

¹³Naulila kumumilo ne kuloma kuli, “Chino chili chingara chibotookhelela.”

¹⁴ Ne buli sibuumbe silala siaba ne bubweeni bune, mu moni mwe khunyoa mwaba mufwaana nga euunwa. Ne mwa khabili mwaba mufwaana nga mwo mundu. Ne mwa khataru mwaba mufwaana nga mwe talang'i. Ne mwe khane mwaba mufwaana nga mwe furuusi.

¹⁵Ne bibuumbe bilamu bino biaba busa ne bibieene nibio nabona a Luuchi lwa Kebari. Nga biapurukha

¹⁶mala biacha, chingara chacha nabio. Ne nga biabambula chindaa khupurukha chingara chacha nabio.

¹⁷Nga bibuumbe ne bima, chingara chosi chiima. Nga biapurukha chingara chosi chapurukha sikila kamaani ke bibuumbe kaba mu ngara.

¹⁸Nio luyali lwa Wele Omunyali Owa Bioosi lwarura esilibwa sie Lukaangu lwacha lwema angaaki we bibuumbe bilamu.

¹⁹Nga naba ne ndoleleele bibuumbe biapurukha, ne chingara chosi chacha nabio. Biema a silibwa sie bukwe we Lukaangu ne luyali lwa Wele Omunyali Owa Bioosi lwabao.

²⁰Nabikhebulila nga bibuumbe nibio nabona ebweeni owa Wele owa Isiraeli a Luuchi lwa Kebari.

²¹Buli silala siaba ne bubweeni bune ne buli silala siaba ne chindaa chine, ne asi we chindaa kiabamo kikiafwaana nga kamakhono ko mundu.

²²Ne bubweeni bwabwe bwafwaana busa nga nibwo nabona a Luuchi lwa Kebari. Biarekukha buli silala siachichanga busa ebweeni.