Read lubukusu Esek. 11 Bible Online

Esek. 11 - lubukusu bible

Esek. 11

¹Roho owa Wele aniinia angaaki mala andeera khu silibwa sie Lukaangu lwa Wele Omunyali Owa Bioosi sisialoleelela ebukwe. Ne lola, nabona babaandu kamakhumi kabili na baraano amuliango kwe silibwa, ne mu nibo nabona abamo Yaasania okhwa Asuri, Pelatia okhwa Benaya, babemeelesi be babaandu.

²Nio Wele amboolela ali, “Ewe mwana wo mundu, bano bali babaandu babekhochoochanga bumayaanu ne khukaambila kamakhiikha mu lukoba luno.

³Baboola bali, ‘Khuli ambi khwombakha chinju lundi. Lukoba luli nga endekhelo, ne nafwe khulimo nga chinyama. Ne kakhali yakhukhiingilekho kumulilo.’

⁴Nono mwana wo mundu, bekaane.”

⁵Ne Roho owa Wele Omunyali Owa Bioosi amba kamaani mala amboolela ali, “Boola oli, ‘Wele Omunyali Owa Bioosi aloma ali: Enywe Baisiraeli, manyile kaali mu mebaasio kenywe.

⁶Mwerire babaandu bakali mu lukoba luno mala chingila chechuule bafu.’ ”

⁷Khwako Omwami WELE aloma ali, “Ng'ali lukoba luno luli endekhelo, ne kakhali nibo mwirire nibo chinyama ne se mukhabe ano tawe khamurusie mu lukoba.

⁸Omwami WELE aloma ali, Enywe mwaria lifwa? Khareere babaandu bamwire.

⁹Khamurusie enywe mu lukoba mala mure mu makhono ke basiku, namukhalakiile lifwa.

¹⁰Ne enywe mulafwila mwiie mu sibala sienywe. Buli mundu akhamanye ali ndi Wele Omunyali Owa Bioosi.

¹¹Lukoba luno se lukhamukhiinge nga endekhelo ne khiinga enyama tawe, ndamuukuumila osi osi niio mulaba, mu sibala sia Isiraeli.

¹²Ne enywe mulamanya muli ese ndi Wele Omunyali Owa Bioosi, ne nga mwaloondanga kamalaka ke chikholo nicho mwaloondekhana, mwafunanga ne khulekelesia kamalaka kase.”

¹³Nga ese naba ndomaloma, Pelatia okhwa Benaya akwa afwa. Ne ese nakwa mafumala, mala naloma ndi, “Kakhaba kario tawe Omwami WELE we bunyali! Olikhocha khwira buli mundu mu Isiraeli?”

¹⁴Wele Omunyali Owa Bioosi amboolela ali,

¹⁵“Mwana wo mundu, bawandaayo akhaba balebe bowo, baambe basio, be nju eya Isiraeli yoosi, boosi bamenyile mu Yerusalemu baboola bali, ‘Babaandu baali mu mbaambe bali aleeyi lukali ne Yerusalemu khusaaya Wele Omunyali Owa Bioosi. Akhuelesie efwe sibala sino khuba kumukabwa kwefwe.’ ”

¹⁶Khwako boola oli, “Omwami WELE aloma ali, ‘Nakhaba ne nabarusia nabayila mu kholo che aleeyi ne nakhaba ne nabasalanisia mu bibala bibiindi, ne kakhaba kario khulwe siise mu bibala nimwo bacha ndaba ne nabo.’

¹⁷Khwako boola oli, Omwami WELE aloma ali, ‘Khamubuusie murusie mu baandu, mubuusie khukhwama mu bibala nimwo mwasalanisibwa, mala ndamuelesia sibala sia Isiraeli.’

¹⁸Ne nga balikobola, ndarusiao bibiindu binyaalu ne bifwaani bisinyisia.

¹⁹ Ne khabaelesie kumwoyo mulala mala mbareemo bulamu buya. Khabarusiemo kumwoyo kwe sileka kuuli nga libaale mala mbaelesie kumwoyo kumuolu,

²⁰nio bamenye mu khuria kamalaka kase mala bakaliinde, ne balaba babaandu base mala ese ndaba Wele wabwe.

²¹Ne Omwami WELE aloma ali, ‘Ne khwabo nibo kimiooyo kiabwe kiloondanga khu biindu biabwe binyaalu ne bisinyisia, khabaukuume khulwe bikholwa biabwe.’ ”

²² Nono bibuumbe bilamu biapurukha mala chingara chacha nabio, ne luyali lwa Wele owa Isiraeli lwabibakho.

²³Ne luyali lwa Wele Omunyali Owa Bioosi lwalekha Lukoba lwacha khu sikulu ebukwe we Lukoba.

²⁴Mwilola elio, Roho owa Wele ambukula andeera angobosia Babiloni mu malola, khu baali mu mbaambe. Nono kamalola niko naba nemboone kafulafulana.

²⁵Mala naboolela be mu mbaambe bibiindu bioosi nibio Wele Omunyali Owa Bioosi aaba ne anjekesia.