Read lubukusu Esek. 12 Bible Online

Esek. 12 - lubukusu bible

Esek. 12

¹Wele Omunyali Owa Bioosi amboolela ali,

² “Mwana wo mundu, ewe omenyile mu kholo eye sileka, bali ne chimoni ne se babona tawe, bali ne kamaru, ne se baulila tawe. Sikila bali be sileka.

³Khwako mwana wo mundu boa biindu nga oyo ocha mu mbaambe, mala rakikha lukeendo ne bukhelabula tawe. Lekha buli mundu akhubone norekukha wakana be sileka abo bosi bakhubona.

⁴Suta bibiindu biowo kumuusi nga ocha mu mbaambe, nio bakhubone norekukha ekolooba nga omundu ocha mu mbaambe.

⁵Ne basiloleelela, futula enuma mwisiisi lie nju yowo mala obisiliemo bibiindu biowo.

⁶Lekha bakhuloleelele ne ora bibiindu biowo khwibeka mala orekukhe mu siilima ne wefuumile mu moni. Orio se olabona niio ocha tawe. Niko olakhola kalaba simanyisio khu Isiraeli.”

⁷Ne ese Esekieli nakhola nga nalakwa ne Wele Omunyali Owa Bioosi, narusia enje bibiindu biase kumuusi, bulayi bwene nga omundu omwene ne alikho acha mu mbaambe. Oli ekolooba nafutula enuma khwisiisi ne kamakhono kaase. Nasuta bibiindu biase khwibeka, narura enje mu siilima ne bamboone.

⁸Oli kumutikhinyi, Wele Omunyali Owa Bioosi amboolela ali,

⁹“Mwana wo mundu babaandu be nju eya Isiraeli, be nju eye sileka, balakhureebanga bali, ‘Olakholanga siina?’

¹⁰Baboolele oli: Omwami WELE aboola ali, ‘Burume buno buli khu be nju eye bubwami babamiia Yerusalemu ne be nju eya Isiraeli boosi balimo.’

¹¹Boola oli, ‘Ese, Esekieli ndi simanyisio khwinywe nga ne kholile ndio, mulikholwa murio. Mukhaambwe muuyisibwe, muyilwe mu mbaambe.

¹²Ne omwami olikho obamiia alasuta bibiindu biewe khwibeka mu siilima mala akoriookhe. Alafutula enuma ebire mwisiisi mala alabiriramo elukhe. Alebiimba mu moni ne salabona niio alikho acha tawe.

¹³ Ndareka lurimba lwase mala muambilemo. Ne ndamuyila mu lukoba lwa Babiloni niio alifwila ne akhalubona tawe.

¹⁴Ne khasalanisie boosi bali naye, bayeetibewe ne basikari bewe mu mbeka choosi, mala khabaloondiekho babaandu babayima babeere.

¹⁵“ ‘Ne balamanya bali ese ndi Wele Omunyali Owa Bioosi nga ne ndabasalanisia mu kholo ne bibala bikeni.

¹⁶Ne khalekhe batiiti khu nibo belukhe khukhwama mu liie, enjala ne bulwaale, ne boole khu khwiyama sifwabi siabwe sie lisaaya sioosi akari we chikholo nicho bachamo, nio bamanye bali ese ndi Wele Omunyali Owa Bioosi.’ ”

¹⁷Wele Omunyali Owa Bioosi amboolela ali,

¹⁸“Mwana wo mundu, lia nonywa mu khwiendekhelela.

¹⁹Boolela ekholo yoosi oli, lino lili likhuwa lio Mwami WELE Omunyali owa Bioosi khu baandu ba Yerusalemu basiili mu sibala siabwe. Baliendekhelela ne balia ne khunywa, sikila sibala siabwe sikharame busa sikila babaandu babwe boosi bali ne sileka.

²⁰Ne chingoba chimboofu nicho babaandu bakali bamenyamo chilionakwa, ne sibala siliba sichiimi, mala mulamanya muli ese ndi Wele Omunyali Owa bioosi.”

²¹Wele Omunyali owa Bioosi amboolela ali,

²²“Mwana wo mundu, lusimo siina nilwo Baisiraeli balomanga luno bali, ‘Biise bibira, mala buli kamalola se kali ka ng'ali tawe?’ ”

²³Khwako baboolele oli, “Omwami WELE Omunyali owa bioosi aloma ali: Ndakamia lusimo luno, mala se balalurumikhirakho lundi nga lusimo mu Isiraeli tawe. Ne ewe Esekieli baboolele oli, ‘Chindaalo cholile, ne buli kamalola kaleecha khuuba ka ng'ali.’ ”

²⁴Wele Omunyali Owa Bioosi aloma ali, “Kamalola ke bubeeyi ne bufumu bwe bubeeyi se bilaba mu kholo eya Isiraeli tawe.

²⁵Ne ese Omwami WELE khababoolele ne niko mbaboolela kakekholeekhe. Ne khukhiinda se khulabao lundi tawe. Be sileka enywe, nja khukhola niko nalakiilisia, ese nalomile.”

²⁶Lundi Wele Omunyali Owa Bioosi amboolela ali,

²⁷“Mwana wo mundu lola abo be nju eya Isiraeli bebaasia bali, kamalola niko Esekieli aboone kali khulwe chindaalo chingali chichiicha, ne bung'oosi buliicha khale khukhwama luno:

²⁸Khwako baboolele oli, ese Wele Omunyali Owa Bioosi ndoma ndi, ‘Ne khukhiinda se khulabao lundi tawe. Ne elomo niyo ndoma elekholekha. Ese Omwami WELE nalomile.’ ”