Read lubukusu Esek. 13 Bible Online

Esek. 13 - lubukusu bible

Esek. 13

¹Wele Omunyali Owa Bioosi amboolela ali,

²“Mwana wo mundu, kaania bang'oosi ba Isiraeli, bang'oola ke bubeeyi baboolele oli, ‘Rekeeresia elomo eya Wele Omunyali Owa Bioosi!’ ”

³Omwami WELE aloma ali, “Bang'oosi basilu bano babunile, bang'oola ne khubona kamalola kabwe ke bubeeyi!

⁴Ee, Isiraeli, bang'oosi bowo babeele nga chingipwe mu maumbu ke chingoba chichatechulwa.

⁵Enywe se mwachiile khuliinda abuundu niio lisiisi liatechukha tawe, namwe se mwombakha lisiisi nga lumako khulwe be nju eya Isiraeli nilwo enyala yekisamo mu ndaalo eye liie eya Wele Omunyali Owa Bioosi tawe.

⁶Balomaloma bubeeyi mala bang'oola bubeeyi baboola bali, ‘Wele Omunyali Owa Bioosi aloma ali,’ ne Wele Omunyali Owa Bioosi se abarumirekho tawe, mala benya Wele Omunyali Owa Bioosi akhole niko baloma kabe ng'ali.

⁷Ese mbaboolela ndi, kamalola ne bung'oosi bwenywe obwo buli bubeeyi. Muboola muli kali kamakhuwa kase, ne ese se nalomalomekho nanywe tawe!”

⁸Khwako Omwami WELE ababoolela ali, “Kamakhuwa ne kamalola kenywe kali ke bubeeyi. Ese neaanyile khwinywe.

⁹Ndaukuuma bang'oosi be kamalola ne bung'oosi bwe bubeeyi. Se balaba mu siikhasio sie babaandu base tawe. Lundi se balaandikwa mu sitabu sie kamasina ke nju eya Isiraeli, namwe bengile mu sibala sia Isiraeli tawe. Nio mumanye muli ese ndi Omwami WELE Omunyali owa bioosi.

¹⁰ “Bang'oosi batiimia babaandu base ne ba baboolela bali, buli siindu sili silayi, ng'ali koosi se kali bulayi tawe! Khuboola bali, kumuleembe kuliio khana kumuleembe mbao. Babaandu base bombakha lisiisi lirekeya ne bang'oosi babeeyi baliiakha luloongo.

¹¹Ewe Esekieli boolela bang'oosi balikho baakha luloongo oli lisiisi likhatechukhe. Efula engali ekhakwe, kamaarara kakhakwe ne khungu eye mbembeesi ekhaliuuche.

¹²Ne nga lisiisi ne likhakwe babaandu bakhamureebe bali, ‘Luloongo nilwo mwaakha lwayeetakho siina?’ ”

¹³Khwako, Omwami WELE aloma ali, “Mu lirima liase ndakhola embembeesi euuche, ne mu lirima ndakhola efula engali ekwe, ne kamaarara kakwa mu bukhalafu bwase khu khwonaka lisiisi.

¹⁴Ne ndatechula lisiisi nilio mwaakhile luloongo, ne khulikwisia asi, mala kumusiingi kwalio kurame busa khwasie. Ne nga likwa enywe mukhafwilemo, mala mulamanya muli ese ndi Wele Omunyali Owa Bioosi.

¹⁵“Khwako ndakhalalila lisiisi alala ne naabo ba baliiakha erangi ewaanga, mala ndamuboolela enywe ndi: lisiisi se liliio lundi tawe, namwe abo ba babaliiakha luloongo se baliio tawe.

¹⁶Bang'oosi abo babasuubisia Yerusalemu bali buli siindu siaba bulayi khane buli siindu se siaba bulayi tawe!” Omwami WELE alomile.

¹⁷Wele Omunyali Owa Bioosi aloma ali, “Mwana wo mundu, lola bang'oosi be siikhasi babeeyi baali mu kholo yowo. Bakaanie

¹⁸mala obaboolele oli: Omwami WELE aloma ali: “Bakhasi enywe mwabuna! Munabila buli mundu eriisi eboe khu mukhono ne khura khu maleso buli mundu ne efwara khu murwe kwewe nio babe ne bunyali khu bulamu bwe babaandu babaandi. Mwenya mube ne bunyali khu bulamu ne lifwa khu baandu base mala muburumikhire khulwe bukhala bwenywe mwabene.

¹⁹Mundekelesia ebweeni we babaandu base nio munyoole efuusi ndala eye shayiri ne khulwe simesu sie kumukaati. Mwira babaandu bakholaana khukhwirwa tawe. Mulekha babolaana khukhwirwa. Khwako mubea babaandu base mala bamusuubila.”

²⁰Nono kano niko Omwami WELE aboola, “Ngaania chiriisi nicho murumikhiranga khuuba ne bunyali khu bulamu ne lifwa khu baandu base, ndabinabulula khu makhono kenywe mala ndekhe babaandu base babe balekhuule.

²¹Akhaba chingubo chenywe nicho mwanabilakho chirisi ndachifuulaka mala ndeesie babaandu base barure mu bunyali bwenywe, mala enywe mulamanya muli ese ndi Wele Omunyali Owa Bioosi.

²²“Khulwe bubeeyi bwenywe se mutinyilisia babaandu balayi nibo khenya mbumisie tawe. Mukhiingilila babaandu bamayaanu bakhekanila baonia bulamu bwabwe tawe.

²³Khwako kamalola kenywe ne bung'oosi bwe bubeeyi biakaame ao. Ndikho ndeesia babaandu base barure mu bunyali bwenywe. Nio mumanye muli ese ndi Wele Omunyali Owa Bioosi.”