Read lubukusu Esek. 14 Bible Online

Esek. 14 - lubukusu bible

Esek. 14

¹Babemeelesi Baisiraeli balala banjichakho khukhundeeba lilienya lia Wele Omunyali Owa Bioosi.

²Nio Wele Omunyali Owa Bioosi amboolela ali,

³“Mwana wo mundu babaandu baana kimiooyo kiabwe khu bifwaani ne bafukiilila bifwaani biabwe khubayila mu bumayaanu mala bebaasia bali ese ndabakosia?”

⁴Khwako lomaloma ne nabo obaboolele kano: Omwami WELE aloma ali, “Omundu yesi yesi owe nju eya Isiraeli osuubila bifwaani mu mwoyo kwewe ne afukiilila bifwaani khumuyila mu bumayaanu mala eecha khukhwenya likaambila khu mung'oosi Ese Omwami Wele samwene khamukobosie, likobosio khuloondekhana ne bifwaani biewe.

⁵Bifwaani ebio bioosi biandusisekho kimiooyo kie ba Isiraeli, ne kakhali khulwe likobosia liase balaba basuubilifu khwise.”

⁶Khwako boolela be nju eya Isiraeli kano: Omwami WELE Omunyali Owa Bioosi aloma ali, “Ngobolele mulekhe bifwaani bienywe biisinya.

⁷Sikila yesi yesi khu kholo eya Isiraeli, namwe omukwa yesi yesi omenyile mu Isiraeli ounjaukhakho mala asuubila bifwaani mu mwoyo kwewe ne khubisaaya, mala echa khureeba omung'oosi kakewe, Ese Wele Omunyali Owa Bioosi samwene ndamukobosia.

⁸Ndakhalalila omundu oyo, mukhole abe simanyisio sie khuukia ne khumurusia akari we babaandu base, ne enywe mulamanya muli Ese ndi Wele Omunyali Owa Bioosi.

⁹“Ne kaaba bali omung'oosi aabeiilwe mala yesi abea, aba Ese Wele Omunyali Owa Bioosi natibiisie omung'oosi oyo mala ndamukhalalila niye ne khumwiira murusie akari we babaandu base Baisiraeli.

¹⁰Bombi omung'oosi ne noyo oreebaanga omung'oosi balanyoola siuukuumo sifwaanana.

¹¹Ndakhola kano nio ba Isiraeli bakhandekha ne khukhwefwolobia babeene khulwe bubwoni bwabwe tawe, balaba babaandu baase ne Ese Wele wabwe. Ese Omwami WELE Omunyali Owa Bioosi nalomile.”

¹²Nio Wele Omunyali Owa Bioosi amboolela ali,

¹³“Mwana wo mundu, babaandu be mu sibala ne bakholela Ese bumayaanu khulwe khumenya ne bakhali ne lisuubila tawe, Ese ndapia siibi ne khurusiao linyoola lie siakhulia siabwe ne khureera enjala mala niire babaandu ne chisaang'i.

¹⁴Ne akhaba babaandu bataru abo Noa, Danieli ne Ayubu ne bamenyilemo, bulayi bwabwe bubaonia babeene bong'ene.” Ese Omwami WELE nalomile.

¹⁵Ese naaba ne nduma chisolo chabira mu sibala cheera babaandu mala siaaba sichiimi nisio omundu akhabiramo tawe sikila chisolo.

¹⁶Omwami WELE aloma ali, “Akhaba babaandu bataru bano ne balimo, nga ese ne menyile mindali se banyala baonia babaana babwe basoleeli namwe bakhaana tawe. Ne kakhali bulamu bwabwe babeene.

¹⁷Namwe naruma liie khu sibala esio, mala neera babaandu ne chisaang'i sitube.

¹⁸Omwami WELE aloma ali: Akhaba babaandu bataru bano ne balimo, nga Ese ne menyile mindali, se banyala baonia babaana babwe basoleeli namwe bakhaana tawe. Ne kakhali bulamu bwabwe babeene.

¹⁹Namwe Ese naaba ne nduma lufu mu sibala esio, mala mwirima liase neera babaandu ne chisaang'i sitube,

²⁰Omwami WELE aloma ali: Akhaba Noa, Danieli ne Ayubu ne bamenyilemo, nga Ese ne menyile mindali, se banyala baonia omwana omusoleeli namwe omukhaana tawe. Khulwe buluungi bwabwe, bakhaonie bulamu bwabwe babeene bwon'gene.

²¹ Ne kakhali Ese Omwami WELE ndoma ndi, ‘Kalaba kariena nga ne ndaruma khu Yerusalemu bikholwa biase birafu bine bie likhalaka. Liie, enjala, chisolo ne lufu khukhwira babaandu ne chisaang'i!

²²Ne kakhaba kario, balala bakhasikalemo, basoleeli ne bakhaana baakhareerwe; bakheche khwiwe. Ne obona chingila ne bikholwa biabwe, okhanyoole kamaani sikila butinyu nibwo ese ndeerire khu lukoba lwa Yerusalemu, sikila koosi niko ese kholile khu Yerusalemu.

²³Okhabone chingila ne bikholwa biabwe mala onyoole kamaani; mala omanye oli koosi niko nakhola kali ne sifuno. Ese Omwami WELE nalomile.’ ”