Read lubukusu Esek. 16 Bible Online

Esek. 16 - lubukusu bible

Esek. 16

¹Lundi Wele Omunyali Owa Bioosi amboolela ali,

²“Mwana wo mundu, boolela Yerusalemu bibiindu bie lisinye nibio lukholile,

³luboolele oli: Omwami WELE aloma ali, “Wasaalwa mu sibala sia Kanaani, raraao aba Omuamori ne maao aba Omuhiti.

⁴Nga wasaalwa se aliio owakhala lulela lwowo tawe. Se wasiingwa ne kameechi ka chumbe, namwe se bakhura mu ngubo tawe.

⁵Se abao omundu owakhukholela ewe siisa, namwe se aliio owakhusiima ewe tawe, ne kakhali wamwaatwa mu ndaa sikila wabiilwa khukhwama khu ndaalo niyo wasaalilwakho.

⁶“Nga nabira nakhubona ne wikalangasia mu mafuki kowo, se nakhulekha wafwa tawe.

⁷Nakhukhola wachoa bulayi nga kumurongooro. Mala waba omukhaana omukhulu. Kamaturu kecha, ne lichuune liakhumba, ne kakhali waba sichula busa.”

⁸Omwami WELE aloma ali, “Nga nabira lundi nakhubona, waba waangaale wolile khuselelwa mala osiili sichula. Nabukula engubo yase nakhubiimba sichula siowo. Ee nakhuselela mala nakhola ne nawe endakaano eye khuyilana nio ewe waba omukhasi wase.

⁹“Nio nabukula kameechi mala nakhusiinga kamafuki mala nakhuakha kamafura.

¹⁰Nakhufwara engubo niyo banabakho kamaua, biraaro, engubo eya katani, nakhufuunikha ne sitaambala silayi.

¹¹Nakhufwara kamamili khu makhono ne mwikosi.

¹²Nakhufwara embete khu lioolu ne bipalakasa khu maru, ne kuutwa eye lukoondo lulayi.

¹³Ewe wafwarwa bibiindu bie sahabu ne efwesa, engubo eya katani ne niyo banabakho kamaua. Siakhulia siowo siaba sie bufu bunosie ne bubuukhi ne kamafura. Ewe wakhomela bulayi, waba ne lukoondo mala waba omwami owe siikhasi.

¹⁴Ne efuma eye lukoondo lwowo lulayi yasalanila mu kholo choosi, sikila naba ese owakhukhola wafwaana orio. Kano niko Omwami WELE aboola.

¹⁵“Ne kakhali ewe wasuubila mu lukoondo ne fuma yowo mala wakhola bueeyi ne khukhwesasia khu buli mundu obira.

¹⁶Wabukula chingubo chowo chindala waboa wang'oona abuundu wowo we khusaayilao, mala wakholelao bueeyi, bukhalikhoo, namwe bukhalibakhoo tawe.

¹⁷Lundi wabukula bie khukhwisaa biowo bie sahabu ne fwesa yase, nibio nakhuelesia mala weng'oonelamo bifwaani bie babaandu mala waeyana nabio bibieene.

¹⁸Ne ewe wabukula chingubo chowo che kamaua wabiimba bifwaani bienebio mala wabiakha kamafura ke kumuseituni ne biiunya kumuya kumulayi.”

¹⁹Omwami WELE aloma ali, “Akhaba siakhulia nisio nakhuelesia nakhuliisia bufu bunosie, ne kamafura, ne bubuukhi mala ewe wabiaana khu bifwaani chana khulwe khubisiimisia.

²⁰“Ne wabukula babaana bowo basoleeli ne bakhaana nibo wasaalila ese, wabeera wabaana nga embosio khu bifwaani. Wibaasia oli bueeyi bwowo bwaba siindu sitiiti?

²¹Ne wibaasia oli khuaana babaana base nga embosio khu bifwaani siindu sitiiti nisio?

²²Ne mu bumayaanu bwowo bwoosi ne mu bueeyi, se wakhebulila chindaalo che mu buele bwowo, nga ne waba sichula busa ne wikalangasia mu mafuki kowo tawe.”

²³Omwami WELE aloma ali, “Ewe wabunile! Wabunile! Wakhola bumayaanu obwo bwoosi mala

²⁴buli khundulo khwe kumuyila wombakha chinju che khusaayilamo bifwaani ne khukholelamo bueeyi.

²⁵Wonaka lukoondo lwowo mukhwefuliaba mu matosi. Welekhuula khu buli mundu owakhureeba mala wakhola bulaaya buli ndaalo.

²⁶Akhaba lundi ewe wakhola bueeyi ne Bamisiri, bachirani bowo babekoomba bueeyi, mala watasa bueeyi khu khumbambia lirima.

²⁷“Khwako lola, nakhukhalaliile ne khukhua kumunaanio ne khu khunuula kumukabwa kwowo nikwo waelesibwa. Nakhureere mu makhono ke bakhaana Bafilisiti, babakhubiila ne khusinyikhwa ne bikholwa biowo bie sifwabi.

²⁸“Wakhola sifwabi, akhaba ne Baashuru sikila sewanyalikha ne babaandi tawe, ee wakhola sifwabi nabo, ne kakhaba kario sewanyalikha tawe.

²⁹Watasa bueeyi akhaba ne Bababiloni be mu sibala sie bubwofuli, ne se wanyalikha nabo tawe.”

³⁰Lino nilio Omwami WELE aboola, “Wakholile bino bioosi nga omueeyi okhali ne chisoni tawe.

³¹Buli khu ngila wombakhakho abuundu niio wesaayila bifwaani ne khukhola sifwabi. Ne kakhali se waruungianga chirupia oli omueeyi owa buli lwosi tawe.

³²Ewe oli nga omukhasi omukhobani, osiimana ne baseecha babaandi khukhila omuseecha wewe.

³³Babaandu be siseecha baruunganga bakhasi baeeyi, ne kakhali ewe waruunga ne khuonga basaale bowo khukhwama buli abuundu.

³⁴Khwako ewe waba lukano mu bueeyi bwowo khukhwama khu bakhasi babaandi. Saliio omundu owakhuyingilila khuba omueeyi tawe, ewe waruunganga, ewe se waelesibwanga kumuruungo kwe bueeyi tawe, khwako ewe waba lukano luluundi busa.”

³⁵Khwako Yerusalemu, mueeyi ewe! Ulila elomo eya Wele Omunyali Owa Bioosi.

³⁶Omwami WELE aloma ali, “Sikila wefuula chingubo chowo nga omueeyi mala chisoni chakhuamba ne batia bowo ne bifwaani, mala wera babaana bowo nga chimbosio khu bifwaani.

³⁷Sikila kano lola ndabuusia batia bowo boosi, nibo ewe wesangaasianga nabo, abo boosi nibo ewe wasiima ne nabo boosi nibo wabiila. Ndababuusia mbareere khukhwama buli lubeka, mala ese ndakhufuula ebweeni wabwe, bakhubone sichula siowo sioosi.

³⁸Ne ese ndakhukhalakila nga omwiiri lundi omukhobani, ne mu lirima ne bukhalafu ndakhua siuukuumo sie lifwa.

³⁹Ne ndakhura mu makhono ke batia bowo, balasambuula niio okholelanga bueeyi ne khutechula abuundu aesuta niio osaayilanga bifwaani. Balakhufuula chingubo ne khukhunuula bie khukhwisaa biowo, mala bakhulekhe sichula elala.

⁴⁰“Ne balaachilisia babaandu bakali khwiwe bakhupe kamabaale, mala bakhutonye mu bitonyi ne chimbalu chabwe.

⁴¹Ne balosia chinju chowo, ne khukhukhalakila ebweeni we bakhasi bakali. Ndakhwakamia khukhola bueeyi mala solaruunga lundi batia bowo tawe.

⁴²Nio lirima ne likhendekha liase biwe ne se khabe nabio lundi tawe.”

⁴³Omwami WELE aloma ali, “Sikila ewe webilila nga ese ne nakhunyoola noli mwana ne kakhali wambambiisie lirima khulwe bikholwa biowo bioosi, kano kakila nekhuukuuma. Ne siina sikila ne watasa sifwabi khu bumayaanu bwowo buno?”

⁴⁴Wele Omunyali Owa Bioosi aloma ali, “Babaandu bakharumikhire lusimo luno khwiwe Yerusalemu. ‘Omukhaana ne maawe nasilala.’

⁴⁵Ewe ng'ali oli omukhaana owa maao, owabiila raraao ne bawandaayo, ne ewe ng'ali oli nga bakooko bowo ba babiila baseecha ne babaana babwe. Ewe ne chingoba chiili siimbi mwaba ne maawenywe Omuhiti ne raraawenywe aaba Omuamori.

⁴⁶“Ne omukooko wowo omukhulu ali Samaria owamenya ebunaswa wowo alala ne bakhaana bewe; ne omukooko wowo omutiiti ali Sodomu owamenya lubeka lwowo lwe siafubo alala ne bakhaana bewe.

⁴⁷Ne ewe waloonda limenya liabwe ne kimiima kiabwe mala waba omubi khukhilakho nibo.”

⁴⁸Ese Omwami WELE nechuba ne ndoma ndi, “Nga ese ne menyile mindali, omukooko wowo Sodomu ne bakhaana bewe se bakhola bumayaanu nga ewe ne bakhaana bowo mukholile tawe.

⁴⁹Lola, buno nibwo bumayaanu bwo mukooko wenywe Sodomu. Niye ne bakhaana bewe bebonia sikila baaba ne biakhulia lundi bamenya bulayi, ne se bayeeta bataambi ne baabanani tawe.

⁵⁰Bebonia lundi baaba ne sileka, bakhola bibiindu bimayaanu mu moni chase, khwako nabarusiao, nga mwesi mumanyile.

⁵¹“Samaria se lwakhola bubwoni bukali nga bubwowo tawe, ewe Yerusalemu wakhola bubwoni bukali khubakhila nibo, ne olekhaasia bubwoni bwowo nende bwe bakooko bowo, nibo baaba balayi khukhila ewe.

⁵²Wakhaba wesi, olachangalaala lukali sikila ewe wababila bakooko bowo sikila bumayaanu nibwo wakhola buli buubi lukali khukhila bubwabwe, nibo balikho balayi khu khukhila ewe. Nono wakhaba wesi khoambwe chisoni, mala ochangalaasibwe sikila wakhola bakooko bowo babonekha khuuba baluungi.”

⁵³Wele Omunyali Owa Bioosi aboolela Yerusalemu ali, “Khakhole Sodomu ne Samaria alala ne bakhaana babwe babe bulayi lundi. Akhaba ewe wesi alala nabo.

⁵⁴Olaambwa chisoni, ne chisoni chowo chilekesia bali bakooko bowo balayi khu khukhila ewe.

⁵⁵Sodomu ne Komora ne bakhaana babwe bakhabe bulayi lundi. Ne akhaba wesi ne bakhaana bowo.

⁵⁶Eku, ewe se wakholanga sieenya meno khu Sodomu chindaalo nicho webonianga,

⁵⁷bubwoni bwowo ne busiili khubonekha tawe? Ewe luno wesi oli nga niye, Baedomu nende Bafilisiti nende boosi bamenyile siimbi nawe balakhuchekheelelanga ewe.

⁵⁸Ese Wele Omunyali Owa Bioosi ndoma ndi, ‘Khukhwola oukuumwe khulwe bikholwa biowo bie lisinye nibio wakhola.’ ”

⁵⁹Omwami WELE aloma ali, “Ndakhukholela nga wolaana khukholelwa sikila waleka niko welakana ne khufuna endakaano.

⁶⁰Ne kakhaba kario ese khakhebulile endakaano yase ne nawe mu ndaalo che buele bwowo mala ese ndakhola endakaano ne nawe eya buli lwosi.

⁶¹Nono ewe olikhebulila liiba liowo mala oambwe chisoni nga ese ne ndibukula bakooko bowo boombi, omukhulu nende omutiiti babe nga bakhaana bowo. Akhaba ne bakhaaba mu ndakaano yase nawe tawe.

⁶²Ese ndakhola endakaano yase ne nawe, mala ewe okhamanye oli Ese ndi Wele Omunyali Owa Bioosi.

⁶³Khakhubeele bubwoni bwoosi nibwo wakhola, ne kakhali olibukhebulila oaambwe chisoni mala okhilwe khulomaloma. Ese Omwami WELE nalomile.”