Read lubukusu Esek. 17 Bible Online

Esek. 17 - lubukusu bible

Esek. 17

¹Wele Omunyali Owa Bioosi amboolela ali,

²“Mwana wo mundu, boolela Baisiraeli lusimo luno,

³bolaane khumanya niko ese Omwami WELE mboola. Yabao efuruusi emboofu ne kamafumbo kamabalaayi ne chindaa chimboofu chichachalaala. Yapurukha yacha khu ngulu cha Lebanoni yakwa yabuta khasaafu khemusia khu mutarakwa,

⁴nikho yayila mu sibala sie khukusia ne khukulaana mala yakhara mu lukoba luboofu lwe bakusia.

⁵Nio yabukula lumiicho lwe mu sibala sia Isiraeli mala yalumiicha mu maloba ke ngakha a sireende.

⁶Khasaala khamela khachoa khaba kumusabibu kukwalaamila asi, ne chisakia chachoa chaniina chalola niio efuruusi eli, ne kimili kiakwo kiekha asi. Nio kwekela kumusabibu, kwarakho chisakia ne kamasaafu.

⁷“Nekhali yabao efuruusi ekiindi emboofu eye kamaani ne chindaa chimbalaayi ne kamafumbo kamakali. Ne lola, kumusabibu kuno kwayila kimili kiakwo niio efuruusi yino eli, ne kwarusia chisakia chakwo chalola niio eli, ne lilieyikina bali khulanyoola kameechi kamakali khukhila niio kwamela.

⁸Ne kakhali kumusabibu beele kwabiaalwa khale mu ngakha niio kameechi kali kamakali niio kunyala kwaba ne chisakia kwame kamatuunda mala kube kumulayi.”

⁹Omwami WELE areeba ali, “Kumusabibu kuno kulachoa ku? Efuruusi endaayi se lakukhuula ne khufuna chisakia mala kamatuunda kakwo koome ta ku? Se larumikhira kamaani kamakali namwe ekholo emboofu khukukhuula tawe.

¹⁰Kwabiaalwa, ne kakhali kulakhula ku? Se kuloma siimiyu ne siicha tawe ku? Se ali abwene ne abwene niio kulomela tawe ku?”

¹¹Nio Wele Omunyali Owa Bioosi amboolela ese Esekieli ali,

¹² “Reeba Baisiraeli barengu bano kaaba bali bamanyile niko lusimo luno luboola. Baboolele oli, ‘Lola omwami owa Babiloni echa Yerusalemu mala abukula omwami walwo ne babemeelesi balwo, mala abakobosia e Babiloni.

¹³Ne abukulamo mulala owe lisaaye lie bubwami mala bafukiilisiana ne naye, ne amwechubia khuba omusuubilwa. Abukula babemeelesi nga baboe,

¹⁴nio sibala silekhe khuba ne kamaani lundi tawe ne khubona mbo lifukiilisiana liekholekhe.

¹⁵Ne kakhali Omwami owa Yuda aba omureengu khu niye, aruma wamwanda e Misiri asaba chifarasi ne banamae bakali. Alanyala ku? Omundu oyo anyala aona ku? Se anyala aloba khukhola niko bafukiilisiana mala aloba khuba ne siuukuumo tawe!’ ”

¹⁶Omwami WELE echubile ali, “Nga ese nendi Wele omenyile mindali, omwami yuno alafwila mu Babiloni sikila afunaka embuliilisiani ne liliechuba nilio akhola no mwami owa Babiloni owamura khu bwami.

¹⁷Akhaba banamae bo mwami owa Misiri se balamuyeeta mwiie tawe, nga Babiloni babuusia liloba ne khulima buko khulwe khukhwira babaandu bakali.

¹⁸Sikila alekelesia liliechuba liewe ne mbuliilisiani yewe, sikila afukiilila mala khukhola nga nilwo kenyibwa tawe, se alebacha tawe.”

¹⁹Khwako Omwami WELE echuba ali, “Nga ese Wele omenyile mindali, nja khumuukuuma khulwe khulekha khukhola niko elakana.

²⁰Ndareka lurimba lwase mala akwemo. Ndamuyila e Babiloni mala emuukuumileyo sikila sabeele omusuubilwa khwise tawe.

²¹Ne banamae bewe boosi barana balafwila mwiie ne bakhaone bakhasalanisibwe chimbeka choosi nio enywe mulamanya muli Ese Wele Omunyali Owa Bioosi nalomile.”

²²Omwami WELE aloma ali, “Ese nase ndaniina khu mutarakwa kumuleeyi, funakeyo lusakia lwe kamasaafu kamatoro, khalubiaale khu sikulu sileeyi,

²³ndilubiaala khu sikulu sileeyi lukali sia Isiraeli. Kukhareekho chisakia mala kwaame, mala kube kumutarakwa kumulayi. Ne chinyuni cha buli lukano chikhamenyekho, mala chombakhekho biswi.

²⁴Kimirongooro kioosi kie mu sibala kikhamanye kili Ese ndi Wele Omunyali Owa Bioosi. Ndemanga kimirongooro kimileeyi, mala khusia kimirongooro kimitiiti. Nomia kimirongooro kimibisi, mala khola kimiomu kiba kimibisi. Ese Wele Omunyali Owa Bioosi nalomile mala ndalikhola.”