Read lubukusu Esek. 18 Bible Online

Esek. 18 - lubukusu bible

Esek. 18

¹Wele Omunyali Owa Bioosi andeeba lundi ali,

² “Lusimo siina luno nilwo babaandu babeelelela khuloma mu sibala sia Isiraeli? ‘Basaasi balia chisabibu chindulu, ne kakhali babaana bamila bululu.’ ”

³Omwami WELE echubile ali, “Nga ese Wele omenyile mindali se mukharumikhirekho lusimo luno lundi mu Isiraeli tawe.

⁴Bulamu bwa buli mundu bwama khwise, bubeele bwe basaasi namwe bwe babaana. Omundu okhola bubwoni niye okhafwe.

⁵“Omundu aaba nali ng'ali omulayi, omuluungi lundi omusuubilwa.

⁶Omundu oyo aaba nakhasaaya bifwaani bia Isiraeli, namwe nalia chimbosio nicho bakaania mu namwima, namwe sareebanga omukhasi owo wasie tawe, namwe se abechanga no mukhasi mu nyaanga chewe chimbi tawe.

⁷Se abea namwe anuula omundu yesi yesi tawe, ne kakhali akobosiangayo nibio atililila bie likobi. Alisianga be njala, mala afwara bali sichula.

⁸Se ekopianga chirupia khulwe khurakho bukhala namwe khunyoolelakho sie ngelu siosi siosi tawe. Sakholanga ke sifwabi tawe lundi aananga likhalaka lia ng'ali niio bulomani buli.”

⁹ Omwami WELE aloma ali, “Omundu lukano olwo ofukiilila kamalaka kase ne khukaloonda, ali omuluungi ne alamenya.”

¹⁰“Aaba no mwana omusoleeli omunuuli lundi omwiiri, okhola bibiindu nibio,

¹¹raraawe akhakholakho tawe. Olichanga chimbosio chichakaanisibwa mu namwima, oreebanga bakhasi babeene.

¹²Apia babanani ne bataambi siibi, anuula babaandu bibiindu se akobosia nisio ekopile tawe. Acha mu binamwima ne asaaya bifwaani,

¹³ekopa khulwe khunyoola bukhala. Omundu nga yuno amenya ku? Se alamenya siise sileeyi tawe. Aakholile bibiindu bie lisinye bino bioosi khwako alafwa. Omwene ereerere lifwa.

¹⁴“Ne aaba ne omwana omusoleeli okundi obona bubwoni bwoosi nibwo raraawe akholile mala aria khu bukhola.

¹⁵Okhalia chimbosio chiaanilwe khu bifwaani tawe, namwe sasaaya bifwaani bie kholo eya Isiraeli, namwe sareebanga omukhasi owo mundu tawe.

¹⁶Sakholela omundu kamabi tawe. Akobosiayo nisio atililile, sanuula omundu siindu tawe ne kakhali alisia be njala ne khufwara bali sichula.

¹⁷Ekhiingililanga khukhola bubwoni. Sabukulanga bukhala khu siindu namwe satasakho siindu tawe. Aloleelesianga kamalaka kase mala akeendela mu lilakiilisia liase, yuno salafwa sikila bubwoni bwa raraawe tawe, alamenya.

¹⁸Ne khuka raraawe oyo sikila anyekhela babaandu, wanuula kimiaandu kia wandaaye ne akhola kakhali kamalayi tawe, mu baandu bewe, lola alafwa khulwe bubwoni bwewe.”

¹⁹Nekhali enywe mureeba muli, “Siina sikila omwana nakhafwa khulwe bubwoni bwa raraawe?” Likobosio lili bali omwana akhola kang'ali ne kamalayi. Aliinda lilaka liase ne khuliloondela elala, khwako alamenya.

²⁰ Omundu okhola bubwoni niye olafwa, omwana salafwa khulwe bubwoni bwa raraawe namwe raraawe salafwa khulwe bubwoni bwo mwana tawe. Omundu omulayi akhanyoole kumuruuru khulwe bulayi bwewe ne omwoni alafwa khulwe bubwoni bwewe.

²¹“Omundu omwoni nalekha khukhola bubwoni mala aloonde kamalaka kase, akhole kaali kamalayi, alamenya ne se alafwa tawe.

²²Bubwoni bwewe bwoosi nibwo akhola bulabeelwa, alamenya sikila akholile kamaluungi.”

²³Omwami WELE areeba ali, “Ese sangaalilanga lifwa lio mundu omwoni ku? Ne kakhali nenya ekanile bubwoni bwewe mala amenye.

²⁴“Ne omundu omuluungi nalekha khukhola kamalayi mala arakikhe khukhola kamabi, ke lisinye niko babi bakholanga, omundu oyo alamenya ku? Tawe! Se silikhoo na silala silayi nisio akhola silikhebulilwa tawe. Akhafwe sikila khuloba khuba omusuubilwa ne khulwe bubwoni bwewe.

²⁵“Ne kakhali enywe muboola muli, ‘Niko Omwami akhola se kali kang'ali tawe,’ Baisiraeli ndekeresie. Enywe mwibaasia muli engila niyo kholelamo bibiindu seli ng'ali tawe? Chingila chenywe nicho chikhali cha ng'ali tawe.

²⁶Ne omundu omuluungi nalekha khukhola kamalayi mala arakikhe khukhola bubwoni, alafwa sikila bubwoni bwewe.

²⁷Omundu omwoni nalekha khukhola bubwoni mala arakikha khukhola kamalayi aleonia.

²⁸Namanya niko alikhakhola mala alekhe bubwoni, alamenya se alafwa tawe.

²⁹Ne kakhali Baisiraeli enywe muboola muli, ‘Engila yo Mwami seli ng'ali tawe.’ Baisiraeli, mwibaasia muli engila yase seli ng'ali tawe? Chingila chenywe nicho chikhali cha ng'ali tawe.

³⁰“Khwako ese Omwami WELE muboolela enywe Baisiraeli ndi, khakhalakile buli sia mulala khuloondekhana ne bikholwa biewe. Lekha bubwoni nibwo mulakholanga mukhalekha bwamubunia tawe.

³¹Lekha bubwoni bwenywe bwoosi nibwo mwakholilenge, mube ne kamebaasio ne kimiooyo kimiya. Baisiraeli siina sikila ne mwenya khufwa?

³²Omwami WELE aloma ali, ‘Se sangaalila lifwa lio mundu yesi yesi tawe, khwako yekanila bubwoni mala mumenye.’ ”