Read lubukusu Esek. 19 Bible Online

Esek. 19 - lubukusu bible

Esek. 19

¹Wele Omunyali Owa Bioosi aamboolela ali yiimba kumwenya kwe bubeeleli kuno khuloondekhana ne baruki ba Isiraeli.

²Maao aaba etalang'i enyindaafu ekhasi mu talang'i chiseecha! Aakhusia ching'ana chewe mu talang'i chiseecha chisiili khukofula.

³Aakhusia eng'ana ndala mala aakiekisia khuaaya, eng'ana eyo yamanya khulia babaandu.

⁴Chikholo chaulila kakaayo chakukuula. Yarekwa yakwa mu buko bwabwe, mala bakirusia mu buko ne bibiindu nga kimilobo bakiyila mu sibala sie Misiri.

⁵Nga maawe ne yabona eli yamuliindile lukali, yarusiisiekho kumwoyo, yabukula eng'ana ekiindi mu ng'ana chayo, yakikhusia mala yaba etalang'i eseecha endafu.

⁶Nga yakhula yakeenda ne chitalang'i chichiindi. Yosi yeyika yamanya khuaaya ne khuulia babaandu.

⁷Yacha mu ngoba chabwe che kamaani mala yatechula chingoba chimboofu babaandu be mu sibala esio baria lukali ne nabo boosi bababaamo nga baulilanga ne ulukhuma.

⁸Nio chikholo chakiibwaakala, chakireka buli lubeka. Bareka lurimba lwabwe ebweeni wayo yakwa mu buko.

⁹Bakirusilia chingaki mala bakira mu kutabuku, bakireera khu mwami owa Babiloni, bakireera bakira mu siboe, niio kumumilo kwayo kukhauliilikha khu bikulu bia Isiraeli tawe.

¹⁰Maao aba nga kumusabibu mu mukuunda, kukwasiuulwa kwabiaalwa ameechi, kwama kamatuunda ne khusabia chisakia chingali, khulwe khuba ne kameechi kamakali.

¹¹Siisina siakwo sie kamaani siekela esiimbo eyo mwami kumusabibu kwachoa kwalea lukali mu bichakha bibiindi kwabonekha khulwe buleeyi bwakwo ne chisakia chingali.

¹²Ne kakhali kumusabibu kwafunwa mu bukhalafu kwakwa asi, luucho lwe bukwe lwakwomia, kamatuunda kakwo kamululwa, siisina siakwo sie kamaani sioma, mala kumulilo kwasiosia.

¹³Luno kwabialiilwe mu sichiimi, mu sibala sisioomu siikhali ne kameechi.

¹⁴Ne kumulilo kwamile mu sisina siakwo kwosiisie chisakia chakwo ne kamatuunda se sili sie kamaani lundi tawe, se sinyala siaba esiimbo eyo mwami tawe. Kuno kuli kumwenya kwe bubeeleli mala kwimbwa buli siise.