Read lubukusu Esek. 2 Bible Online

Esek. 2 - lubukusu bible

Esek. 2

¹Ali, “Mwana wo mundu, yinyokha wime, ese nenya khulomaloma nawe.”

²Ne nga aba ne alomaloma, roho owo Mwami anjingilamo ne khu khuunjimikha mala naulila ne alomaloma khwise.

³Aamboolela ali, “Mwana wo mundu, ese ndikho khuruma ewe khu baandu ba Isiraeli, khu kholo eye sileka, babaandu babanjekaana. Nibo ne baraara babwe bakholile bumayaanu khwise khukhwola endaalo yino.

⁴Babaandu be siikhanyilisia ne sileka. Ese ndikho khuruma ewe obaboolele oli, ‘Omwami WELE aloma ali.’

⁵Baaba ne baulila namwe ne baloba khuulila (sikila bali be nju eye sileka) bakhamanye bali omung'oosi beele ali akari wabwe.

⁶Ne kakhali ewe mwana wo mundu, okhabaria nibo, namwe waria kamakhuwa kabwe tawe, walute ne kamawa biakhakhubotookhelela, namwe wakhaba nga oomenyile akari we chiwalute; okharia kamakhuwa kabwe tawe. Lundi okharangararwa sikila lukoondo lwabwe tawe, sikila eli ekholo eye sileka.

⁷Ewe olababoolela burume bwase bakhaba ne baulila namwe ne baloba khuulila, sikila eli ekholo eye sileka.

⁸“Ne ewe mwana wo mundu, ulila niko ese khuboolela, ewe okhaba owe sileka nga ekholo eye sileka eyo tawe. Yasama mala olie nisio ese ndikho khuelesia.”

⁹ Nga nalola, nabona kumukhono kwanjekeseleele ne khane beele kwatiilile sitabu sie liaandike.

¹⁰Khwako aasibambula ebweeni wase, siaba ne kamaandiko chimbeka chombi, siabaakho kamakhuwa ke khusooma, ke liliiunamila nende ke ngunyi.