Read lubukusu Esek. 20 Bible Online

Esek. 20 - lubukusu bible

Esek. 20

¹Yaba endaalo eye likhumi kumwesi kwa kharaano mu mwiiko kukhola saba kwe khuuba mu mbaambe. Babemeelesi balala ba Isiraeli banjichakho khureeba lilienya lia Wele Omunyali Owa Bioosi, mala bekhala ebweeni wase.

²Ne Wele Omunyali Owa Bioosi aamboolela ali,

³“Mwana wo mundu, lomaloma khu bemeelesi ba Isiraeli mala obaboolele oli: Omwami WELE areeba ali, ‘Enywe mwechile khukhundeeba lilienya liase?’ Omwami WELE eechubile ali: Nga ese Wele omenyile mindali, se ndamufukiilila enywe mundeebekho sisiindu siosi siosi tawe.” Ese Omwami WELE.

⁴“Mwana wo mundu, ewe werekeekhe khubakhalakila? Khola orio. Bakhebusie bibiindu bie lisinye nibio bakuukawabwe bakhola.

⁵ Baboolele niko ndikho ndoma, ‘Nga narobora Baisiraeli, nechubila lisaaye lie nju eya Yakobo. Neyekesia khu nibo ne bali e Misiri, nabechubila ndi, Ese ndi Omwami WELE, Wele wenywe.

⁶Mu ndaalo niyo nabechubilamo ndi khabarusie mu sibala sie Misiri, mbareere mbengisie mu sibala nisio nabarekekhera. Sibala silayi nisio kamabeele ne bubuukhi biseleetikhanga. Sibala silayi lukali mu bibala bioosi.

⁷Nababoolela bamwaate bifwaani nibio basiima nio balekhe khukhwefwolobia ne bifwaani bie bubeeyi bie Misiri. Sikila Ese ndi Wele Omunyali Owa Bioosi, Wele wenywe.

⁸Ne kakhali baba be sileka khwise mala se bandekeeresia tawe. Buli sia mulala se aalekha bibiindu bisinyisia tawe, namwe se balekha khusaaya bifwaani bie Misiri tawe. Nono nebaasia khubakhalalila lukali ne khubaambila lirima mu sibala sia Misiri.

⁹Ne kakhali se nakhola ndio tawe, sikila lisina liase se liakhafumile tawe. Sikila beele babaandu nibo Baisiraeli bamenyilemo babona ese ne nemanyisia khu Baisiraeli khubirira mu khurusia Baisiraeli abo e Misiri.’ ”

¹⁰Nio nabarangirira nabarusia mu sibala sia Misiri mala nabareera mu sichiimi.

¹¹ Nabaelesia lilakiilisia liase ne khubekisia kamalaka kase. Omundu ne akaloonda alamenya bulayi.

¹² Khutasa khwako nabaelesia Esabato, nga simanyisio akari wase ne nabo, nio boole khumanya bali Ese Wele Omunyali Owa Bioosi, mbakhola baba batakatifu.

¹³Ne kakhali Baisiraeli baba ne sileka khwise mu sichiimi, se baloonda lilakiilisia liase tawe, ne kakhali baloba kamalaka kase niko abeele omundu ne aloonda amenya bulayi. Ne Esabato yase bakifwolobia lukali. Mu lirima liase nenya khubabunisilia mu sichiimi.

¹⁴Ne kakhali se nakhola ndio tawe sikila abeele lisina liase likhakhola lirio liafwocholwa mu kholo nicho nabarusiamo e Misiri.

¹⁵ Khutasa khwako nabechubila mu sichiimi ndi se ndibareera mu sibala nisio naba ne nabaelesia tawe. Sibala silayi nisio kamabeele ne bubuukhi biseleetikhanga. Sibala silayi lukali mu bibala bioosi.

¹⁶Sikila baloba kamalaka kase, lundi se baloonda lilakiilisia liase tawe ne khufwolobia esabato yase sikila kimiooyo kiabwe kiaba khu bifwaani.

¹⁷Ne kakhaba kario, nabakholela siisa, mala se nababunia namwe nabeerera mu sichiimi tawe.

¹⁸Nakaania babaana babwe ndi, “Mukhaloonda kamalaka ke bakuukawenywe tawe, mukhaloonda kimiima kiabwe, namwe mwenyaalutia khulwe bifwaani biabwe tawe.

¹⁹Ese Wele Omunyali Owa Bioosi ndi Wele wenywe, loonda lilakiilisia liase mala murie lukali kamalaka kase.

²⁰Khola esabato ebe endaalo endakatifu nio sibe simanyisio sie ndakaano yase nanywe, nio mumanye muli ese ndi Wele Omunyali Owa Bioosi, Wele wenywe”.

²¹Ne kakhali eselukho eyo yandekeelesia. Se baloonda lilakiilisia liase tawe, lundi se baba ne sinani mu khuria kamalaka kase tawe, kamalaka kareeranga bulamu khu buli mundu okaloonda. Bafwolobia esabato yase. Khwako nebaasia khubakhalalila lukali mu sichiimi ne khubabunia boosi.

²²Ne kakhali se nakhola ndio tawe, nio lisina liase likhakhola lirio liafwocholwa mu kholo nicho naba ne mbarusiisiemo e Misiri tawe.

²³ Khwako nabechubila mu sichiimi ndi ndibasalanisia mu kholo ne khubayila mu bibala bioosi,

²⁴sikila se baloonda kamalaka kase tawe, nekhali baba balobile lilakiilisia liase ne khufwolobia esabato yase, ne khuloleelela busa bifwaani nibio bakuukawabwe basaayanga.

²⁵Nio nabaelesia kamalaka kakhali kamalayi tawe ne lilakiilisia nilio omundu ne aliloonda se anyala aamenya tawe.

²⁶Nabakhola benyaalutia babeene ne biianwa biabwe mala barusia babaana babwe babele nga chimbosio, sino siaba siuukuumo siriisia khu nibo nio bamanye bali, Ese ndi Wele Omunyali Owa Bioosi.

²⁷Khwako mwana wo mundu, boolela Baisiraeli oli, “Omwami WELE Omunyali Owa Bioosi aloma ali, ‘Yino eli engila ndala niyo bakuukawenywe baakholela ese embelekeu, khulwe khuloba khuuba busuubilwa khwise.

²⁸Nabareera mu sibala nisio nabalaka. Nga babona chingulu ne kimirongooro, baana chimbosio chabwe khu nibio bioosi. Bambaambia lirima khulwe chimbosio nicho boosia nende endali niyo baana nga biianwa’.

²⁹Nabareeba ndi, ‘Abuundu siina aesuta niio muchichanga ao?’ Khukhwama endaalo eyo khukhwola luno balangaanga abuundu ao bali ‘Aesuta’.

³⁰Boolela Baisiraeli niko ese Omwami WELE Omunyali Owa Bioosi ndikho ndoma. Siina sikila mwenyaalutie mwabeene bulayi bwene nga bakuukawenywe baakholanga, ne khutiima ne muli mu bueeyi bwe khuloonda bibiindu biabwe biisinya?

³¹Muaana biianwa ne khukhwenyaalutia mwabeene ne bifwaani bienywe biiunya ebio bioosi khulwe khuaana babaana benywe nga chimbosio mu mulilo khukhwola luno. Eku Baisiraeli enywe, ese nyala nafukiilila mwandeebakho likhuwa? Ng'ali busa nga ne ndi Omwami WELE Omunyali Owa Bioosi, Wele omenyile mindali, se ndamufukiilila enywe mundeebekho likhuwa liosi liosi tawe.

³²Niko mwibaasia muli kalekholekha se kalekholekha tawe. Mwibaasia muli, ‘Lekha fwesi khube nga be chikholo ne bibala bibiindi mala khusaaye kimirongooro ne kamabaale.’ ”

³³Omwami WELE Omunyali Owa Bioosi aloma ali, “Nga ese ne ndi Wele omenyile mindali, ng'ali mu lirima liase ese khabamiie enywe ne kamaani kase koosi.

³⁴Khamwekesie bunyali bwase ne lirima liase nga khamubuusie enywe alala khukhwama mu bibala nibio mwasalanisibwamo.

³⁵Khamureere enywe mu siangalaamwe sie chikholo mala ebweeneyo khamukhalakile enywe moni na moni.”

³⁶Omwami WELE Omunyali Owa Bioosi aloma ali, “Khabakhalakile busa bulayi bwene nga ne nakhalakila bakuukawenywe mu siangalaamwe sia Sinai.

³⁷“Khamure mu bunyali bwase mala mukhole enywe murie endakaano yase.

³⁸Kharusie mwinywe be sileka nende abo babakholelanga ese bubwoni. Khabarusie mu sibala sie mbaambe ne se bakhengile mu sibala sia Isiraeli tawe. Nio enywe mumanye muli Ese ndi Wele Omunyali owa Bioosi.”

³⁹Omwami WELE Omunyali Owa Bioosi aloma ali, “Ne luno enywe Baisiraeli mweesi, khola niko mwenya! Chiililila khusaaya bifwaani bienywe biiunya ebio! Ne kakhali enyuma wa kano, ne mukhandekeeresia tawe, khukhwola mulekhe khufwochola lisina liase litakatifu khulwe biianwa bienywe ne bifwaani bienywe biiunya ebio.

⁴⁰Mu sibala esio khu sikulu siase sitakatifu, khu sikulu sileeyi mu Isiraeli, ese Omwami WELE ndoma ndi, Baisiraeli enywe mweesi mukhasaayilekho. Mukhasiimisie mala mundeerere chimbosio chenywe, biianwa bienywe bilayi lundi bitakatifu.

⁴¹Nga ne khamurusie mu baandu ne khu mubuusia enywe khukhwama mu bibala nibio mwasalanisibwamo, khafukiilile embosio yenywe eye khukhwosia esiimisibwa. Mala khekesie butakatifu bwase mwinywe mu moni mwe chikholo.

⁴²Ne mukhamanye muli Ese ndi Wele Omunyali Owa Bioosi nga ne khamukobosie mu sibala sia Isiraeli, sibala nisio nechuba ndi khaelesie bakuukawenywe.

⁴³Ne ebweeneyo mukhakhebulile likeenda lienywe ne bikholwa bienywe biibi nibio mwenyaalutisiliamo, ne mukhesonie khulwe bumayaanu bwoosi nibwo mwakhola.

⁴⁴Enywe mukhamanye muli ese ndi Omwami WELE, nga ne khakhole sikholwa khwinywe khulwe lisina liase, se khuli khuloondekhana ne chingila ne bikholwa bienywe bimayaanu tawe, ee Baisiraeli Omwami Wele aboola.”

⁴⁵Omwami Wele amboolela ali,

⁴⁶“Mwana wo mundu loleleela siafubo yilwacha kamabi khu be siafubo, mala ong'oole kamabi khu sibala sie kumusiru kwa Nekebu.”

⁴⁷Boolela kumusiru kwa Nekebu oli, “Ulila elomo eyo Omwami WELE.” Khwako Omwami Wele aboola ali, “Lola ndabwana kumulilo mwinywe mala kuloosia buli murongooro kumubisi ne kumwoomu mwinywe. Lilierika ne chimemu che kumulilo okwo se chilisimisibwa tawe, kumulilo kulosia buli mundu khukhwama siafubo khukhwola e bunaswa.

⁴⁸Babaandu boosi balamanya bali Ese Wele Omunyali Owa Bioosi nakubwanile ne se kukhasimisibwe tawe.”

⁴⁹Nio naboolela Omwami ndi, “Omwami WELE Omunyali Owa Bioosi, okhakila nabikhola tawe! Buli mundu alikho eloocha khale ali ndomanga mungano buli lwosi.”