Read lubukusu Esek. 21 Bible Online

Esek. 21 - lubukusu bible

Esek. 21

¹Wele Omunyali Owa Bioosi amboolela ali,

²“Mwana wo mundu, lola Yerusalemu, yilwacha khu bubi bwe abuundu niio basaayilanga, ng'oola kamabi khu Baisiraeli

³mala obaboolele oli, Ese Wele Omunyali Owa Bioosi ndoma ndi, ‘Lola, ese nakhaba omusiku wenywe, ndachoola embalu yase mu sibaabi, ndamwiira enywe mweesi, omuluungi nende omumayaanu.

⁴Ndarusiao omuluungi nende omumayaanu, khwako ndarusia embalu yase mu sibaabi siayo khulwe khukhwira babaandu boosi khukhwama siafubo khukhwola ebunaswa.

⁵Ne babaandu boosi bakhamanye bali Ese Wele Omunyali Owa Bioosi nachoolile embalu yase khukhwama mu sibaabi siayo, se ndakikobosiamo lundi tawe.’

⁶“Khwako mwana wo mundu, yeloocha, yeloocha ebweeni wa buli mundu khulwe buchuuni bwe kumwoyo ne bubeeleli burafu.

⁷Ne bakhureeba bali, ‘Siina sikila ne weloocha?’ Baboolele oli, ‘Sikila kamakhuwa kamakeni kalikho kecha. Ne koolile, kimiooyo kiabwe kilechula buuri ne kamakhono koosi kakhekoye, bunyindaafu bwabwe bukhawe ne kamasikamo kosi kakhatereme busa. Siise sioolile, nisio sino. Ese Omwami WELE nalomaloome’ ”

⁸Ne Omwami Wele amboolela ali,

⁹“Mwana wo mundu, ng'oola oboolele babaandu niko ese Omwami Wele ndoma, Embalu! Ee embalu yaakaalwe mala elikho emeniuukha.

¹⁰Yaakaalwe khukhwira, emeniuukha nga lueni! Eku, efwe khunyala khwekhoya? Mwalekeleesie kumukhomwa ne liikololosia lioosi.

¹¹Embalu elikho emeniuukha, bakirekeekhe erumikhwe, yaakaalwe lundi elikho emeniuukha, nio bakiakaanisie omwiiri.

¹²Mwana wo mundu, lila lundi yeloocha, sikila embalu yino yechile khukhwira babaandu base, ne babemeelesi ba Isiraeli boosi. Embalu elabeera nibo alala ne babaandu base. Khupa sifuba siowo khulwe bubeeleli.”

¹³Omwami WELE aloma ali, “Ndikho ngela babaandu base, baaba ne bakheenya khukhwekanila tawe, bibiindu bino bioosi bilabekholekhakho.

¹⁴“Nono mwana wo mundu, ng'oola. Khupa chimbi mala embalu elarema lundi ereme. Eli embalu eye khukhwira, eriisianga lundi esiinjanga.

¹⁵Khwako babaandu base batibiisie bunyindaafu, lundi bakali bakwiile. Nareere bubwoki bwe embalu khu miliango kiabwe. Yaakaalwe, elikho emeniuukha nga lueni. Yasingibwe khukirekekha khulwe khusiinja.

¹⁶Elarema lubeka luseecha ne lukhasi nende osi osi niio bubwoki bulolile.

¹⁷Akhaba ese ndapa chimbi, ne lirima liase lilawa. Ese Wele Omunyali Owa Bioosi nalomile.”

¹⁸Lundi Wele Omunyali Owa Bioosi amboolela ali,

¹⁹“Mwana wo mundu, loleelela chingila chibili nicho omwami owa Babiloni anyala echelakho ne mbalu yewe. Chombi chikhame mu sibala silala. Lundi ng'oona simanyisio sie lupao khu ngila, sire niio chingila chaukhanila.

²⁰Kumukhono mulala kukhekesie omwami engila echa Raba mu lukoba lwe Baamoni, ne kukuundi kwekesie engila echa Yuda mu lukoba lusire lwa Yerusalemu.

²¹Omwami owa Babiloni emile niio chingila chaukhanila; niio chilola eyi neeyi amwate asi chisiimbi. Khumanya ngila siina niyo akhoya achiilekho, asisiikha buembo, areeba bifwaani biewe lundi emenieelesia siini sie saang'i niyo baanile nga embosio.

²²Mu mukhono kwewe kumuseecha aba ne buembo nibwo baandikakho bali ‘Yerusalemu,’ bumuboolela khucha khubukula bibiindu bie khutechula, arusia lilaka bubwiri ne luyoka lwe liie bibeo, khura bibiindu bie khutechula asilibwa ne khubuusia liloba khu masiisi ne khukhwombakha kiminaara.

²³Babaandu ba Yerusalemu se balasuubila kano tawe, sikila embuliilisiani niyo bakhola. Ne kakhali bung'oosi buno bukhabakhebusie bubwoni bwabwe bukhakile bayilwe mu mbaambe.”

²⁴Lino nilio ese Omwami WELE ndoma ndi, “Bubwoni bwenywe bwamanyikhaane, buli mundu amanyile kumusaango kwenywe. Mwekesia bubweeni bwenywe mu buli sikholwa sienywe. Mulakhalakilwa, lundi ndamura mu bunyali bwo musiku.

²⁵“Ewe omwami owa Isiraeli omumayaanu, okhali omuluungi tawe, endaalo yowo emaliilisi eye siuukuumo yolile.

²⁶Ese Omwami WELE ndoma ndi, ‘Fuula ekuutwa ne sileemba. Buli siindu se silaba nga sibechanga tawe. Abo baali asi balaniinisibwa ne baali angaaki balekhisibwa!

²⁷Lukoba lwatechuulwe, lwatechuulwe, ndalutechula. Ne kakhali kano se kalekholekha tawe, khukhwola nga niye narobora ne echa. Nio ese nde lukoba luno mu makhano kewe.’ ”

²⁸ “Ne ewe mwana wo mundu, ng'oola. Langilila niko ese Omwami WELE ndikho mboolela Baamoni baalikho balekelesia Isiraeli. Baboolele oli, ‘Embalu yarekeekhwe khubunia, yang'oonilwe khukhwirwa ne khumeniuukha nga lueni.’

²⁹Kamalola niko mubona kali ke bubeeyi, lundi mung'oola ke bubeeyi. Muli bamayaanu lundi baabi; ne ndaalo yenywe eye siuukuumo simaliilisi elikho yiicha.

³⁰“Kobosia embalu mu sibaabi. Ndakhukhalakila abuundu niio wasaalilwa.

³¹Mulabona burafu bwe lirima liase bulayi bwene nga ne mubona bumemu bwe kumulilo. Ndamura mu makhono ke babaandu baabi, barafu lukali, baali ne limanya mu bwonaki.

³²Kumulilo kulababunia enywe. Kamafuki kenywe kalachichukha mu sibala sienywe. Se alikhowo oolimukhebulila enywe lundi tawe. Ese Wele Omunyali Owa Bioosi nalomile.”