Read lubukusu Esek. 22 Bible Online

Esek. 22 - lubukusu bible

Esek. 22

¹Wele Omunyali Owa Bioosi amboolela ali,

²“Mwana wo mundu! Ewe werekeekhe khukhalakila lukoba lulwechula babeeri? Luboolele bikholwa bioosi bie lisinye nilwo lukholile.

³Luboolele oli, Omwami WELE, Omunyali Owa Bioosi aloma ali, ‘Sikila mwerire babaandu benywe bakali mala mwenyaalutiisie mu khusaaya bifwaani, siise sienywe silikho siicha.

⁴Enywe muli ne kumusaango sikila babaandu nibo mweera ne khukhwenyaaluutia khulwe bifwaani nibio mwakhola mala mwakholile endaalo yenywe yabeele siimbi, siise sisiaroborwa sie kimiiko kienywe siolile. Khwako nakhuambiisie chisoni mu kholo choosi. Ne bibala bioosi bilakhuchekheelela.

⁵Babaandu bali siimbi ne naabo baali aleeyi khukhwama khwiwe balakhuchekheelela ewe ookhali ne fuma tawe, owechula sisiayuumba.

⁶Lola, babemeelesi benywe ba Isiraeli, buli mundu eyikiine kamaani kewe, mala ali ne silukuluku sie khukhwira.

⁷ Enywe babaandu be mu lukoba luboofu se muria basaasi benywe tawe. Mubea bakeni, mubukula bufuubi ne bunamulekhwa khunyoolelakho bukhala.

⁸ Mwalekeelesia bibiindu biase bitakatifu ne se muloonda chisabato chase tawe.

⁹Balala mwinywe bayingila babaandi bubeeyi bubwirisia. Babaandi balia chimbosio che bifwaani, ne babaandi bakhola bueeyi mwinywe.

¹⁰ Balala bacha khu bamaawabwe ba mukha raraawabwe. Balala baang'inya bakhasi baali mu ndaalo chabwe chimbi babe ne nabo.

¹¹Okundi akhola sifwabi nende mukho wasie, ne okundi acha khu mukho musaani, ne okundi naye acha khu mukooko wewe, omwana owa raraawe.’ ”

¹² Omwami WELE aloma ali, “Balala mwinywe bakaanila asoya khukhwira babaandi. Ne balala mwinywe babukula bukhala khu nibo bekopiisie mala baindiaala khu nibio banyoolile. Ne banjibilile ese.

¹³“Ndekhisia kumukhono kwase mala salanisie bukhala bwoosi nibwo mwanyoola mu ngila ekhali yang'ali tawe, eye bunuuli ne bubwiri.

¹⁴Mwibaasia muli mukhabekho ne bunyindaafu namwe kamaani kakoola khusuta kumukhono ne malile khubaukuuma ku? ‘Ese Wele Omunyali Owa Bioosi nalomaloome mala kalaba kario.’

¹⁵Ndasalanisia babaandu benywe boosi mu buli kholo mala ndakamia bikholwa bienywe bimayaanu.

¹⁶Mulaambwa chisoni mumoni mwe chikholo chichiindi ne kakhali mulamanya muli Ese ndi Wele Omunyali Owa Bioosi.”

¹⁷Wele Omunyali Owa Bioosi amboolela ali,

¹⁸“Mwana wo mundu Baisiraeli se balikho ne bukhala khwise lundi tawe. Bali nga kamasengeli kakaama khu mukasa, machweenu, sichuuma, ne sibia.”

¹⁹Ese Omwami WELE ndikho mbaboolela ndi, “Se balikho ne bukhala tawe, bali busa oli kamasengeli ako. Khababuusie boosi mu Yerusalemu.

²⁰Bulayi bwene busa nga babaandu ne babuusianga burare bwe fwesa, bwe kumukasa, bwe sichuuma, sibia ne machweenu nibio bareere mu mulilo kwe kumukuba nio binukulukhile mu mulilo, nio mu lirima liase ndamumwaata mu mulilo mufwe.

²¹Khababuusie mu Yerusalemu, mbwane kumulilo mala kuboosie bafwe.

²²Bakhafwiile mu Yerusalemu nga efwesa ne yinukulukha mu mulilo kwe kumukuba, mala bakhamanye bali Wele Omunyali Owa Bioosi abaambile lirima.”

²³Lundi Wele Omunyali Owa Bioosi amboolela ali,

²⁴“Mwana wo mundu boolela Baisiraeli kano: Enywe muli sibala sie sifwabi, khwako mu lirima liase ndikho mbaukuuma.

²⁵Babemeelesi bali nga chitalang'i chiulukhuma ne chiira chisaang'i nicho chiaayile. Beera babaandu babukule chirupia choosi nende buli nisio banyala khunyoola, khulwe bubwiri bwabwe bareerao bunamulekhwa bukali.

²⁶ Basaayi ba Isiraeli bafunile lilaka liase mala banyaaluutiisie bibiindu biase bitakatifu. Se baukhasia akari we bibiindu bitakatifu nende birumikha busiele tawe, namwe se bekisia bubwabukhani buuli akari we sinyaalu ne sikwalaafu tawe. Lundi balekeelesia chisabato chase ne khu khuufwolobia.

²⁷Babemeelesi mu Isiraeli bali nga bisuuche biilikho ne biira esaang'i. Beera babaandu, bachukha sifuki khulwe khunyoola bukhala bukhali bwa ng'ali tawe.

²⁸Ne bang'oosi ba Isiraeli bakisile bubwoni buno nga baakha lisiisi luloongo, babona kamalola ke bubeeyi ne khung'oola bubeeyi. Bekhola khulomaloma likhuwa lio Mwami WELE Omunyali Owa Bioosi ne kakhali ese Omwami WELE se nalomaloomekho nabo tawe.

²⁹Bayiinda babea lundi banuula, bapia bataambi ne babanani siibi, ne lundi banyoola bukhala mu khubea bakeni.

³⁰Nayiima omundu mu nibo oonyala oombakha lisiisi, mala eema akari we sibaanga sie lisiisi litechuukhe nio ndekhe khubunia sibala, ne kakhali se namunyoolamo tawe.

³¹Ese Omwami WELE ndoma ndi, ‘Nabaambiile lirima, ndaboosia ne kumulilo, ndababunia khulwe bikholwa biabwe.’ ”