Read lubukusu Esek. 23 Bible Online

Esek. 23 - lubukusu bible

Esek. 23

¹Wele Omunyali Owa Bioosi amboolela ali,

²“Mwana wo mundu, babao bakhasi babili, boombi baba bakhaana bo muloosi mulala.

³Mu buele bwabwe ne basimenyile e Misiri, batibia buyabwana bwabwe mala baaba baeeyi.

⁴Lisina lio mukhulu liaba bali Ohola ne omutiiti aaba bali Oholiba. Bekela babaase mala basaala basoleeli ne bakhaana. Ne khulwe kamasina kabwe, Ohola ali Samaria ne Oholiba ali Yerusalemu.

⁵Ohola akhola bueeyi ne ali owase mala asiima batia bewe Baashuru,

⁶naitiriani babefwarire chingubo chimbuusi, babaami bakhulu nende banaitiriani be kamalaka, baele basiimisia boosi, batimia chifarasi.

⁷Abengisia mu bueeyi bwewe. Babaandu barobore ba Ashuru boosi, mala eefwolobia ne bifwaani bioosi bia buli mundu niye aasiima khuuba omutia wewe.

⁸Se aalekha bueeyi bwewe nibwo aaba ne akholile khukhwama mu ndaalo chewe mu Misiri tawe, sikila mu buele bwewe babaandu bakona naye ne khunyaalutia buyabwana bwewe, ne khukhwolesia liliekoomba liabwe likali.

⁹Khwako namwakaanisia mu makhono ke Baashuru, nibo niye aaba omutia wabwe.

¹⁰Babaandu bano bamufuula chingubo, baamba babaana bewe basoleeli ne bakhaana, mala niye omwene bamwiira ne mbalu. Siuukuumo siewe esio siaaba khu lulimi lwa buli mukhasi buli abuundu.

¹¹“Omukooko wewe Oholiba abona kano, ne kakhaba kario aakhola bumayaanu bukali khukhila bwo mukooko wewe mu khusiima batia mu bueeyi bwewe, aaba omumayaanu khukhila omukooko wewe.

¹²Asiima Baashuru babaami bakhulu, naitiriani be kamalaka, naitiriani bafwara chingubo chimbuusi be bibioki mu bwichufu, batimia chifarasi, boosi baaba babaandu basiimisia.

¹³Ne nabona ndi ali omumayaanu lukali, ng'ali boombi baaba ne kumwiima mulala okwo.

¹⁴“Ne kakhali niye aabisiao mala aacha aleeyi lukali mu bueeyi. Aabona bifwaani bie babaandu biaandikwa khu lisiisi, bifwaani bie Bakalitayo bibiaandikwa mu bubesemu.

¹⁵Beboa chikhoba munda, ne bileemba khu mirwe kiabwe. Boosi babonekha nga bakhulu be bunyali, sifwaanani sie Bababiloni babeene be sibala sia Kalutayo.

¹⁶Nga ne aababona, aabasiima mala aaruma barumwa khu nibo mu Kalutayo.

¹⁷Bababiloni becha niio ali, bacha naye mu sitanda sie butia mala bamukhola sifwabi ne liliekoomba liabwe. Ne nga baaba ne bamalile khumufwolobia mu bueeyi, aabakaluukhanakho aababiila lukali.

¹⁸Nga ne achiililila mu bueeyi bwewe abuwaanga lukali, efuula ekesia sichula siewe, namubiila bulayi bwene busa nga nabiila omukooko wewe.

¹⁹Ne kakhaba kario atasa bueeyi bwewe khukhila mu ndaalo che buele bwewe nga ne akholanga bueeyi mu sibala sia Misiri.

²⁰Asiimisibwa ne batia benabo ebweeneyo ba baaba ne kimibili nga kie chipunda, namwe kamaani ke busecha nga chifarasi.

²¹Khwako wekoomba sifwabi sie buele bwowo, Bamisiri bakhurumikhira mala bonakaka buyabwana bwowo.”

²²Khwako Ee, Oholiba, Omwami WELE aloma ali, “Lola ese ndenyosia basaale bowo nibo ewe wakaluukhanakho wabiila mala ndabareera khukhwama buli lubeka bakhubiile.

²³Babaandu nga Bababiloni ne Bakalitayo boosi, Bapekoti, ne Bashoa ne Bakoa ne Baashuru boosi alala. Baele basiimisia, babaami bakhulu, naitiriani be kamalaka lukali, boosi barangisi nende naitiriani boosi batimia chifarasi.

²⁴Basiku balakhwibwaakala ewe khukhwama e bunaswa alala ne kamakaari ke liie ne kamakaari ke khusuta bibiindu ne babaandu be chikholo bakhabalikha tawe. Balakhwibwaakala khukhwama buli lubeka ne bibiindu bie khukhweteecha, chingabo ne chikofio che sichuuma che khumurwe. Ese khabaelesie bunyali bwe bukhalaki, mala balakhukhalakila khuloondekhana ne bukhalaki bwabwe.

²⁵Sikila ndi ne lirima nawe, ndabalekha bakhukholele ke bukhalafu, Balakhukhala kamoolu ne kamaru, mala beere babaana bowo baramire ne mbalu. Balaamba babaana bowo basoleeli ne bakhaana, ne baramire balosebwa ne kumulilo.

²⁶Akhaba lundi balakhufuula chingubo mala bakhunuule bilayi nibio wisaanga.

²⁷Khwako ndakamia liliekoomba liowo lie bukhobani ne bueeyi bwowo nibwo wamia mu sibala sia Misiri nio okhaloleelela lundi Bamisiri, namwe wabakhebulilakho lundi tawe.”

²⁸Khwako Omwami WELE aloma ali, “Lola ndakhuana khu baandu nibo ewe wabiila waukhakho.

²⁹Ne sikila bakhubiila ewe, balakhuyaaya buli siindu nisio wanyaakhana wanyoola, mala bakhunuule bakhwanjukhe busa ne oli sichula, sichula sie bueeyi silabonekha. Liliekoomba liowo lie bukhobani ne bueeyi,

³⁰biakhurereere kano, sikila waeeyana ne chikholo mala wekhola sifwabi khulwe bifwaani biabwe.

³¹Ewe waloonda mu lung'afuulo lwo mukooko wowo. Khwako ndakhuukuuma ne siuukuumo siewe.”

³²Khwako Omwami WELE aloma ali, “Olanyoola sikoombe sie siuukuumo sio mukooko wowo. Buli mundu alakhuchekheelela, ne khukhukholela siienyameno, sikila silimo kamakali.

³³Silakhumeesia lundi obe mu sibi, sikoombe sie buuri ne libunia, sio mukooko wowo Samaria.

³⁴Ewe olanywa omalemo, mala wikhuule lichuune ne khukhwibwara kamaturu, sikila Omwami WELE aalomile.”

³⁵Khwako Omwami WELE aloma ali, “Sikila ewe wanjibiliile ese ne khukhuumwaata ekoongo, khwako khosute busiro bubwama mu likoomba liowo lie sifwabi ne bueeyi.”

³⁶Wele Omunyali Owa Bioosi amboolela ali, “Mwana wo mundu, ewe onyala wakhalakila Ohola ne Oholiba ku? Nono baboolele abuwaanga bikholwa biabwe bimayaanu.

³⁷Sikila bakholile bueeyi ne sifuki sie bubwiri sili mu makhono kabwe. Lundi bakholile bueeyi ne bifwaani biabwe, ne akhaba lundi baana basoleeli babwe nibo basaala khwise nga embosio eye siakhulia khu bifwaani.

³⁸Khutasa khwako, lundi bakholeele kano: Bafwolobie Lukaangu lwase lutakatifu, ne khu ndaalo ne ng'ene bafufuule chisabato chase.

³⁹Sikila nga ne baaba ne beerire babaana babwe nibo baana nga embosio khu bifwaani biabwe, ne khu ndaalo ne ng'ene becha mu Lukaangu lwase khulufwolobia!

⁴⁰“Baruma omurumwa khulaanga babaandu be siseecha khukhwama aleeyi, ne lola becha. Sikila nibo, wesiinga, werona sia moni mala wefwara kamamili ke bukusi bwe angaaki.

⁴¹Wikhalanga khu sitanda silayi lukali ne mesa yalilwe ebweeni wasio nikhwo warengekha bupani bwase ne kamafura kase.

⁴²Luyoka lwe babaandu bakali babesangaasiisie lwauliilikha niio ali ne babaandu bakhali ne lukoosi tawe, bameesi ba busiele, bareerwa khukhwama mu sichiimi, bafwara bakhasi abo chipangili khu makhono ne khubafwara chikuutwa chichang'oonwa bulayi.

⁴³“Nono ese nareeba ndi, ‘Eku, balakhola bukhobani no mukhasi oweele sio sikila khukhola bueeyi?’

⁴⁴Sikila baba naye nga baseecha ne baba no mukhasi omutamba. Khwako bacha bario khu Ohola nende khu Oholiba bakhasi babelekhuula abo.

⁴⁵Ne babaandu baluungi bakhabekiiche babakhalakile ne likhalaka lie bukhobani ne bukhalaki bwe bakhasi babeeri bachukhanga sifuki sikila bali bakhobani ne sifuki sie bubwiri sili khu makhono kabwe.”

⁴⁶Niko kakila Omwami WELE ne aloma ali, “Reera kiminjoloolo kie babaandu kibebwaakale kibarengie ne khubayaaya kimiaandu.

⁴⁷Kiminjoloolo kie babaandu kilabapa kamabaale ne khubabunia ne mbalu, kileera babaana babwe basoleeli nende bakhaana ne khukhwosia chinju chabwe.

⁴⁸Mu ngila ng'eneyo khakamie bueeyi mu sibala nio bakhasi boosi boole khukaambilwa bakhakhola bueeyi nga enywe ne mwakholile tawe.

⁴⁹Ne enywe mulatiuukhwa busiro bwe bueeyi bwenywe ne khusuta kumuruungo kwe bumayaanu bwe khusaaya bifwaani mala mulamanya muli ese ndi Omwami WELE.”