Read lubukusu Esek. 24 Bible Online

Esek. 24 - lubukusu bible

Esek. 24

¹Mu ndaalo eye khumi kumwesi kwe khumi, mu mwiiko kwa tisa kwe mbaambe yefwe, Omwami Wele amboolela ali,

² “Mwana wo mundu, andika chitare che ndaalo yino, yino eng'ene omwami owa Babiloni ebwakaale Yerusalemu endaalo yino ne ng'ene.

³Boolela babaandu base be sileka lusimo luno oli, Omwami WELE aloma ali, ‘Ra endeekhelo khu mayika, chukhamo kameechi.

⁴Raamo bitonyi bie nyama, bitonyi bilayi bie sietakho nende sia mbele, robora bikuumba bilayi wichusiemo.

⁵Bukula enyama eye likheese lilayi lirobore, rekekha chiikhu asi we ndeekhelo, teekha enyama alala ne bikuumba.’ ”

⁶Khwako Omwami WELE aloma ali, “Silaamo khu lukoba luboofu lwe babeeri, luuli nga endeekhelo eye ngekheni, ekhali esiinge tawe! Yomolamo enyama sia ndala ndala, ne kakhali okharoboramo tawe.

⁷Sikila sifuki nisio lwachukha, sisiili akari walwo. Lwachukha sifuki khu lwanda, se lwachukha khwiloba, niio lunyala lwakakisa mwipukhuulu tawe.

⁸Khukhwinyosia lirima liase, niyache, nalekha kamafuki ke babaandu nibo lweera khu lwanda, nio kakhafuunikhwa tawe.”

⁹Khwako Omwami WELE aloma ali, “Silaamo khu lukoba luboofu lwe babeeri! Akhaba seesi khabuungikhe chiikhu chingali.

¹⁰Bungikha chiikhu, bwaana kumulilo, teekha chinyama bulayi, mala oteenyisie esuuto, olasie bikuumba!

¹¹Nono lekha endeekhelo khu maanda kakesing'eng'ile, nio eye, ebeseme lukali, nio kumukasa kuye, engekheni eruremo, mala endeekhelo eng'oone lundi.

¹²Neluisienge khu kia busa, khane kumulilo se kunyala kwarusiamo, engekheni yayo esiro tawe.

¹³Yerusalemu, bikholwa biowo biibi biakhwonake, akhaba ese ne nakhaka khu khukwalaasia, wachiililila busa khuuba omunyaalu. Se olaba omukwalaafu lundi tawe, khukhwola nga ndanyalikha ne lirima liase khwiwe.”

¹⁴Omwami WELE aloma ali, “Ese Omwami WELE nalomile, mala khukhwola likholekhe lirio. Ndalikhola, se ndakobola enyuma tawe, se ndalilekha tawe, lundi se ndesonia tawe. Ndakhuukuuma ne kumunaanio khuloondekhana ne chingila chowo ne bikholwa biowo.”

¹⁵Lundi Wele Omunyali Owa Bioosi amboolela ali,

¹⁶“Mwana wo mundu, lola, ese ndi siimbi khu khuupa omusiime wowo lukali murusieo, ne kakhaba kario okhasooma namwe walila, namwe waalekha kamasika keekha tawe.

¹⁷Sikhiikha busa ne wikhilisia kumwoyo ne okhalila oofwiile tawe. Fwara sileemba ne biraaro, ne okhafuunikha kumunwa tawe, namwe walia siakhulia sie amasika tawe.”

¹⁸Khwako ese Esekieli nalomaloma khu baandu kumutikhinyi, ne ekolooba omukhasi wase afwa. Nga bwasia nakhola nga naba ne mboleelwe.

¹⁹Babaandu bandeeba bali, “Khuboolele, bibiindu nibio okhola bino biboola siina khwifwe?”

²⁰Nono nababoolela ndi, Wele Omunyali Owa Bioosi ambooleele kamakhuwa kano:

²¹Boolela enju eya Isiraeli oli, “Omwami WELE Omunyali owa bioosi aloma ali, ‘Lola ndafwolobia Lukaangu lwase, ekibonio eye bunyali bwenywe, lisiimisibwa lienywe ne liliekoomba lie kimiooyo kienywe. Ne babaana benywe basoleeli ne bakhaana nibo mwalekha e Yerusalemu balererwa mwiie.

²²Ne enywe mukhakhole nga ese nekholile, se mukhafuunikhe bubweeni bwenywe namwe mulie siakhulia sie amasika tawe.

²³Mulafwara bileemba bienywe ne biraaro, se mulasooma namwe se mulalila tawe, ne kakhali mulang'aa mu bumayaanu bwenywe ne khubeleela burafu buli mundu no kundi.

²⁴Khwako ese Esekieli khabe simanyisio khwinywe, mukhakhole koosi niko ese kholile, Wele Omunyali Owa Bioosi aloma ali, nga kano ne kakhakholekhe mukhamanye muli ese ndi Omwami WELE.’ ”

²⁵Ne Omwami Wele aloma ali, “Ne ewe mwana wo mundu, khu ndaalo eyo, nga ese kharusieo esio siili lilieyikina liabwe, ekhoyo yabwe ne lukoosi, sisiindu sibasiimisia ne basibona lundi siili kumwoyo kwabwe alala ne babaana babwe basoleeli ne bakhaana;

²⁶khu ndaalo ng'ene eyo, mulala owiluukhe khukhwama mu busiku akheche akhuboolele ewe kakekholeekhe.

²⁷Khu ndaalo ng'ene eyo, okhekulwe kumunwa olomalome nende oyo owiluukhe khukhwama mu busiku, mala okhalomalome; se okhabe lundi omumiinyi tawe. Khwako okhabe simanyisio khu nibo mala nibo bakhamanye bali Ese ndi Wele Omunyali owa Bioosi.”