Read lubukusu Esek. 25 Bible Online

Esek. 25 - lubukusu bible

Esek. 25

¹ Wele Omunyali Owa Bioosi amboolela ese Esekieli kamakhuwa kano:

²Mwana wo mundu suta chimoni chowo ololeelele Baamoni mala ong'oole kamabi khu nibo.

³Boolela Baamoni oli, “Ulila elomo eyo Mwami WELE, Omwami WELE aloma ali: Sikila nga Lukaangu lwase lwaba ne lufwolobisiibwe, lundi nga mwabona sibala sia Isiraeli ne sianjukhwe, lundi nga mwabona enju eya Yuda ne ambilwe yayilwa mu mbaambe, enywe mwasangaala.

⁴Khwako, ese ndikho mwakaanisia babaandu be bukwe enywe mube babaabwe. Balamwombakhamo mala bamenye akari wenywe. Balalia bibiaamo bienywe ne khunywa kamabeele kenywe.

⁵Ndakaluukhasia lukoba lwa Raba lube kamaayilwe ke chingamia, ne chingoba chimboofu che Baamoni chibe biko bie kamakheese. Nono enywe mulamanya muli ese ndi Wele Omunyali Owa Bioosi.”

⁶Omwami WELE aloma ali, “Enywe mwapile chimbi ne khu khuupa chindiri che bikele bienywe ne khukhwekhoya ne kumwoyo kwe khuchekheelela sibala sia Isiraeli.

⁷Sikila mwakhola kano, ndamuaana khu kholo chichiindi chiilamunuula ne khumwiira enywe lundi ndamubunisilia elala, se mulaba ekholo lundi namwe mube ne sibala sienywe tawe. Nio mumanye muli Ese ndi Wele Omunyali Owa Bioosi.”

⁸ Omwami WELE aloma ali, “Moabu eloma eli, ‘Lola enju eya Yuda eli nga chikholo chichiindi choosi.’

⁹Khwako ndekula sibaanga mu Moabu khukhwama mu ngoba chimboofu che khu lwakha khwayo Beti-yeshimoti, Baalimeoni ne Kiriataimu; chingoba chiili luyali lwe sibala.

¹⁰Ndasiakaanisia alala ne Baamoni khu baandu be bukwe mube babaabwe kumukabwa nio Baamoni bakhakhebulilwakho lundi mu kholo tawe.

¹¹Ne ndakhalakila Bamoabu. Nio bamanye bali Ese ndi Wele Omunyali Owa Bioosi.”

¹² Omwami WELE aloma ali, “Sikila Edomu beyacha khu be nju eya Yuda mala bambeeleesie lukali khukhola kamabi mu khwiyacha khu nibo,

¹³khwako ese Omwami WELE ndoma ndi, ‘Ndaukuuma Edomu mala niire babaandu ne bibaywa. Ndasikhola sianjukhwe busa khukhwama Temani khukhwola Dedani, balafwila mwiie.

¹⁴Ese ndeyacha khu Edomu khubirira khu mukhono kwe babaandu base Isiraeli. Balakhola bario mu Edomu khuloondekhana ne lirima ne bukhalafu bwase. Balamanya bukali bwe liliiyacha liase. Ese Omwami WELE nalomile.’ ”

¹⁵ Omwami WELE aloma ali, “Sikila mu sikhoonde siikhawa, Bafilisiti bakholile khukhwiyacha ne lirima likali ne kumwoyo kwe khukhechakhecha,

¹⁶ese Omwami WELE ndoma ndi, ‘Lola ndauukuuma Bafilisiti; ndeera Bakereti ne khubunia bamenyile sia nyanja boosi.

¹⁷Ndabawesieliakho lirima liase likali ne siuukuumo sie bukhalafu. Khwako balamanya bali Ese ndi Wele Omunyali Owa Bioosi.’ ”