Read lubukusu Esek. 26 Bible Online

Esek. 26 - lubukusu bible

Esek. 26

¹ Khu ndaalo eye khunyoa eye kumwesi, kumwiiko kwe ekhumi na ndala eye khuyilwa khwefwe mu mbaambe; Wele Omunyali owa Bioosi amboolela ali,

²“Mwana wo mundu sikila Tiro luchekheelela Yerusalemu ne luloma luli, ‘Aha, Silibwa siboofu sie Chikholo, siabaayuulwe sikila ese, nono ese ndanyoola bubweyaangu, sikila buiinda bwalwo bwonakaakwe.’ ”

³Khwako Omwami WELE aloma ali, “Lola ee Tiro, ese nakhweanyilekho! Ndakhureerera chikholo chingali chikhwibwaakale, bulayi bwene busa nga bibuli bie nyanja ne biichanga.

⁴Balatechula kamasiisi ke lukoba lwa Tiro ne khutechula chindeleelwa chalwo che khuliindilakho. Ndaarakara liloba lialwo ndusiemo, mala ndukhole lube busa khwasie nga lulwanda.

⁵Lulaba mu nyanja akari, abuundu e khureka chindiimba. Ese Omwami WELE, nalomile. Chikholo chilaluyaaya,

⁶ne bakhaana balwo mu lukoongo, balabunisibwa ne mbalu. Nio bamanye bali ese ndi Omwami Wele.”

⁷Sikila Omwami WELE aloma ali, “Lola, ese ndareera khu Tiro Nebukadinesa omwami owa Babiloni khukhwama ebunaswa, nende chifarasi nende kamakaari ke liie, nende banamae be khu farasi nende kiminjolooli kie banamae.

⁸Alereera mwiie bakhaana bowo, baaliba ne baramire enje khu sibala. Omusiku alayaba lukhwakhwa akhukare, abuusie liloba libe lisiisi akhukare, mala akhwibuulile, akhukare ne chingabo chewe nga lulama.

⁹Alalosia bitechula lisiisi, khu masiisi kowo, lundi alatechula chindeleelwa ne chiaywa.

¹⁰Chifarasi chewe chilaba chingali lukali, ne lutamuusi lwacho lulakhufuunikha, kamasiisi kowo kalanikina sikila lutiri lwe batimia chifarasi, nende endiri eye kamakaari ke khusuta bibiindu, ne kamakaari ke liie. Alengila mu bilibwa biowo, bulayi bwene nga omundu owingila mu lukoba, abuundu aatechulwa.

¹¹Alabisia batimia chifarasi chiswalakilile, chingila che mu lukoba choosi ne bikhakayu biacho. Aleera babaandu bowo ne mbalu, ne lisiisi liboofu liili nga enjeko lilayabulukha.

¹²Balayaaya kimiaandu kiowo, bakhaatule basute bibiindu biowo nibio okusianga, bakhatechule kamasiisi kowo, mala bonakake chinju chowo chindayi. Bakhabukule kamabaale kowo, chimbao chowo ne liloba, mala bamwaate mu nyanja.

¹³ Ndakamia kimienya kienywe, ne liuliilikha lie kamatuungu, se lilabao lundi tawe.

¹⁴Ndakhukhola wekele lulwanda busa, olekela abuundu niio banikhila chindiimba. Se oliombakhwa lundi tawe. Ese Omwami WELE nalomile.”

¹⁵Khwako, Omwami WELE aloma khu Tiro ali, “Bibala bie sia nyanja se bilaterema nga ne bilaulila likwa liowo, nga baumiie ne balila, lundi nga khufwa ne khulibao tawe ku?

¹⁶ Nono babemeelesi bakhulu be sia nyanja balarura khu ndebe chabwe che bubwami, mala befuule chingubo chabwe che bubwami, ne khukhwifuula chingubo chabwe chichanabwa mu ngila eye lukoosi lukali lwe khuchisaa. Bakhabe mu literema likali, bakhekhale asi mu maloba mala batereme buli siise ne khuuka lukali sikila kakekholeekhe khwiwe.

¹⁷Bakhasute kumumilo bakhwimbile kumwenya kwe lisooma bali, ‘Ee, lukoba luboofu, ewe wakoriokhile sia nyanja! Lukoba lulwamanyikha, lulwaba ne kamaani khu nyanja, ewe ne babaandu bowo wareera buuri khu buli mundu mu sibala.

¹⁸Luno kamakenga kalikho katerema khu ndaalo eye likwa liowo, yee kamakenga kaali mu nyanja karangaraarwe sikila liiela liowo!’ ”

¹⁹Sikila kamene ako Omwami WELE aloma ali, “Ne khukhola ewe khuuba lukoba luboofu lwanjuukhwe nga lukoba lukhamenywamo tawe, nga khakhusiikhe mu lusiba lwe nyanja, mala kameechi kamakali kakhusiikhe;

²⁰abwenao khakhumwaate asi emakoombe alala nende abo babeekhayo khale, khakhukhole oche omenye ne nabo mindali mu sibala sie asi mu makubili kakatechukha. Nono omundu se alakhumenyamo tawe, lundi se olaba ne bumenyo mu bibala bie balamu tawe.

²¹ Ese Omwami WELE ndoma ndi, ‘Ndakhureera khu siakamo siriisia mala olafwa, wakhaenjwa se olinyoolwa lundi tawe.’ ”