Read lubukusu Esek. 27 Bible Online

Esek. 27 - lubukusu bible

Esek. 27

¹Wele Omunyali Owa Bioosi amboolela ali,

²“Luno ewe, mwana owo mundu, yimba kumwenya kwe khusooma sikila lukoba lwa Tiro,

³mala oboolele Tiro luuli ebwingililo we sia nyanja, lulwofuli lwe babaandu khu bibala bikali biili sia nyanja, Omwami WELE aloma kano: Ee, Tiro ewe waloma oli, ‘Ese ndi ne lukoondo lulayi elala.’

⁴Lukoba lwowo luli mu nyanja akari, baboombakhi bowo bang'oona lukoondo lwowo lwaba lulayi po!

⁵Bombakhila kimirongooro kimilayi, khukhwama khu sikulu Seniri, babukula kimitarakwa khukhwama Lebanoni, bakhung'oonela ewe kumuringoti.

⁶Mu mikhoonge kia Bashani, bakhung'oonelamo kimikaango kie khutimisilia kamaaro, bang'oona lulwalo lwowo, khukhwama khu murongooro, kwa kainasi khukhwama sia nyanja, ne Saipurasi ne khukitubaasia ne kimisaanga.

⁷Engubo endayi eya katani, eye kamapala khukhwama e Misiri, enyala yabonekha ne oli aleeyi nga simanyisio, embuusi ne bunapeenda, khukhwama mu ngoongo che sia nyanja cha Elisha.

⁸Bamenywa ba Sidoni ne Aribati nibo babakhutimianga, barana ba Senira baaba bamenya mwiwe, nibo baaba bakhutimia.

⁹Bang'ooni be chimeeli, baaba bamanyile kimilimo kiabwe bulayi khukhwama Kebali babeeseli khukhwama mu buli emeeli ebira khu nyanja, bachitimilamo baaba mwiwe khulwe khukhwofula.”

¹⁰Pasha ne Luti ne Putu baba banamae bowo, baanikhanga chingabo ne chikofio che sichuuma chabwe che mwiie mwiwe; bakhua lukoosi lwe saambo.

¹¹Banamae ba Aribati ne Heleki baba bakarire kamasisi kowo ne banamae ba Kamati baba khu ndeleelwa chenywe che khulindilakho, baanikha chingabo chabwe khu lisiisi liowo liliakhukara bakhola lukoondo lwowo lwaba lulayi elala.

¹²Tarishishi lwakhola bubwofuli ne nawe sikila bukali bwe kimiaandu kiowo kia buli lukano, efwesa, sichuuma, machweenu ne sibia, bakholamo bie bukhala khulwe khukhwofulamo chingubo.

¹³Yabani, Tubali ne Meshaka bakhola bubwofuli bwe bukhala ne nawe, khukusia nasioobi ne bibiindu bie kumukasa khulwe baboofuli bowo.

¹⁴Be nju eya Beti-tokarima bakhola bubwofuli bwe chifarasi che kimilimo, chifarasi che liie ne chinyumbu khulwe bibiindu biowo.

¹⁵Batetani baba baboofuli bowo, chingoongo che khu nyanja chaba nicho ewe wasiima khukholelayo bubwofuli bwowo, bareeranga kimisaanga kie chinjofu ne bupani mukulaasiana.

¹⁶Babaandu ba Edomu bakaananaanga ne nawe sikila bukali bwe bibiindu nibio waba nabio. Bakulaana nawe bibiindu biowo bifwaana lubookha ne binapenda nende bie kamapala, chingubo cha katani, ne kamabaale kamangu ke mu nyanja kamabesemu mawaanga, ne kamabaale, kamaandalafu lukali kaalimo kamapala kamalayi.

¹⁷Babaandu ba Yuda ne Isiraeli bofulana ne nawe khulwe khukulaana ne nawe engaanu, kamafura ka museituni ne chinduli che khunyoa, ne bubuukhi, kamafura ne bibiindu biiunya bulayi.

¹⁸Babaandu ba Damasika bakulaana nawe mu bwofuli sikila bukali bwe bibiindu bie khukusia nibio waba nabio, sikila bukali bwe kimiaandu buli lukano, wareera endali eya Heliboni ne bufumbo bwe kamakheese buwaanga.

¹⁹Vetani ne Yafani basuta bibiindu biowo khukhwama Usali; nga bichuuma bie kamaani lukali ne kumurongooro kuunya bulayi nende bie khunywa niibio bibiaba nibio wanyoola mu khukulaana.

²⁰Babaandu ba Dedani bofulana ne nawe khulwe khukulaana chingubo che khukhwikhalakho khu farasi.

²¹Babaandu be Buarabu, ne babemeelesi be Kedari niibo ba baaba basiime bowo khu nibo wofulanga kamameeme, kamamiiku ne chimbusi.

²²Baboofuli ba Sheba ne Rama bakulaana nawe, bakulaana ne nawe khulwe bibiindu bilayi lukali mu bioosi biiunya bulayi, ne khulwe kamabaale ke bukusi bwe angaaki, ne sahabu.

²³Babaandu ba Harani, Bakani ne Baeteni, Baashuru ne Bakilimati baakhola bubwofuli ne nawe.

²⁴Bano bofula ne nawe mu ngubo chindayi chindobore ne mu ngubo chimbuusi chichanabwa charobarobana, ne kamapala ne kimikeeka kie mu nju kie kamapala kikiabowa ne lusia khulwe khukiliinda bulayi. Mu ngila yino bakulaana ne nawe.

²⁵ Chimeeli cha Tarishishi chakhusutilanga ewe bie khukusia. Khwako ewe wechusibwa mala wasitoa lukali mu nyanja akari.

²⁶Babaandu bowo batimia emeeli bakhureerire, bakhwingisie mu nyanja, mu meechi kamakali. Ekhuungu eye bukwe yakhuuchile, wachiile aleeyi mu nyanja.

²⁷Buyiinda bwowo, bibiindu biowo bie bubwofuli, bakholi bowo be khu meeli nende batimia emeeli, bafundi be meeli nende bakusia bibiindu. Ne banamae boosi baali mwiwe, nende boosi baali ne nawe, besiikha mu meechi khu ndaalo niyo ewe olibunilakho.

²⁸Liilila lie babaandu bowo batimia chimeeli liateremia lukoongo.

²⁹Bayuusia kimikaango kie meeli, nende batimia emeeli, beekha barura mu meeli chabwe, bema khu sikiingi sie nyanja.

³⁰Bakhulila ewe burafu, mu mumilo kwe angaaki. Bechukha lipukhuulu khu mirwe kiabwe, ne khukhwikalaangasia mwikokhe.

³¹Bachwenula lichuune liabwe lioosi sikila ewe, befwara kamakunia ne bakhulila burafu, khulwe bubeeleli burafu bwe mu mwoyo, ne khukhwiunamila khukali.

³²Mu liesasaara liabwe basooma sikila ewe, bakhusooma ewe lukali ne baloma bali, “Naanu owabunakho nga Tiro akari we nyanja.”

³³Nga bibiindu biowo nibio wofulanga biechanga khukhwama mu nyanja, ewe wakholanga babaandu bakali ne banyalikha, ne bukali bwe kimiaandu kiowo nende bie khukhwofula, ewe wayindaasia babaami be khu sibala.

³⁴Luno enyanja yakhutimbiisie, ewe wabuniile mu lusiba lwe kameechi, bie khukhwofula biowo ne bakholi be mu meeli bowo boosi, besiikhile ne nawe.

³⁵“Baamenyile mu ngoongo che sia nyanja boosi, besiindukhiile butinyu bwowo, babaami babwe bariire lukali ne khurangararwa, bubweeni bwabwe bwakaluukhaane.

³⁶Babaandu balala khu bofuli bakhupila ewe sikhoe, ne baloma bali, ‘Ewe wolile khu siakamo simayaanu, mala mindali na mindali se olinyokha lundi tawe.’ ”