Read lubukusu Esek. 28 Bible Online

Esek. 28 - lubukusu bible

Esek. 28

¹Wele Omunyali Owa Bioosi amboolela kano:

²“Mwana wo mundu, boolela omwami owa Tiro oli, Omwami WELE aloma ali: Sikila kumwoyo kwowo kuli kwe khukhwibonia mala ewe oloma oli, ‘Ese ndi wele nikhalanga khu ndebe eye bawele babaandi mu nyanja akari,’ ne kakhali ewe oli omundu busa, se oli wele tawe akhaba ne weibaasia oli, oli omukesi nga wele.

³Ewe ng'ali oli omukesi khukhila Danieli, se siliio sisiekisa khwiwe tawe.

⁴Khulwe limanya liowo, ne liiulila liowo, wenyoolela buiinda mala wabuusia esahabu ne fwesa mu mabiikhilo kowo.

⁵Khulwe limanya liowo likali mu bwofuli, watasa kimiaandu kiowo, mala kumwoyo kwowo kwiboneselia khu miaandu nikio oli nakio.

⁶Khwako Ese Omwami WELE ndoma kano: Sikila ewe weyibaasia oli, oli omukesi nga bawele,

⁷khwako, lola ndareera bakeni khwiwe, bariisia lukali khu be chikholo, mala balapana liie khu bulayi bwe limanya liowo, mala balafwolobia lukoosi lwowo.

⁸Balakhumwaata asi mwiloo, mala olafwa lifwa lie babaandu babeererwa mu nyanja.

⁹Eku, ewe olachiililila khuloma oli, ‘Ese ndi wele,’ ebweeni wabo bakhwira, akhaba ne oli omundu busa ne se oli wele tawe mu makhono kaabo bakhwira?

¹⁰Ese Omwami WELE ndoma ndi, ‘Olafwa lifwa lie basiinde mu makhono kwe bakeni sikila ese nalomile.’ ”

¹¹Lundi Omwami Wele amboolela ali,

¹²“Mwana wo mundu lilila butinyu bubwiicha khu mwami owa Tiro, mala omuboolele kano: Omwami WELE aloma ali, ‘Ewe waba simanyisio silayi elala sisiechula bukesi, ne lukoondo lulayi elala.

¹³Ewe waba mu Edeni, mu mukuunda kwa Wele. Buli libaale lie bukusi liaba sisibiimbilo siowo, liwaanga ling'enang'ena, lie lubookha nga limali, lifwaana liiki, nende libuusi lirandaafu ne libuusi ling'enang'ena, limali libesemu nende lie lubookha lufulaafulane, nende esahabu, yaba kimilimo kie bulayi bwe lukoondo lwowo. Khu ndaalo niyo wabumbilamwo, biabumbwa biarekekhwa sikila ewe.

¹⁴Alala ne malaika owachukhwakho kamafura omuliindi kerubi nakhurao, waba khu sikulu sitakatifu sia Wele, mala ewe wakeendanga akari we kamabaale ke kumulilo.

¹⁵Ewe se waba ne buubi bwosi bwosi, khukhwama khu ndaalo niyo ewe wabumbilwakho, khukhwola nga bumayaanu ne bwanyoolekha mwiwe tawe.

¹⁶Mu bukali bwe bubwofuli bwowo, waba wechula sisiayuumba, mala wakhola bumayaanu, nio nakhumwaata nga sisiindu sinyaalu, nakhurusia khu sikulu sia Wele, nio malaika oliindanga aakhuoona ewe, aakhurusia akari we kamabaale ke kumulilo.

¹⁷Kumwoyo kwowo kwaba kwe khukhwebonia, sikila bulayi bwe lukoondo lwowo, wonaka limanya liowo khulwe luyali lwowo. Nakhumwaata asi nakhubakala ebweeni we babaami, obe naikara eye khuliisia chimoni chabwe.

¹⁸Khulwe bukali bwe bumayaanu bwowo, mu bwofuli bwowo bukhali buluungi tawe, wafwolobia abuundu atakatifu, nio nabwaana kumulilo akari wowo, kwakhwosia mala wekela likokhe khu sibala, ebweeni wabo boosi babakhubona.

¹⁹Babaandu boosi mu baandu babakhumanya ewe, barangararwe mu buuri bukali, nga bakhuboone ne wolile khu siakamo siibi lukali, mala se olibao lundi khulwa mindali na mindali tawe.’ ”

²⁰ Wele Omunyali Owa Bioosi amboolela ali,

²¹“Mwana wo mundu, suta chimoni chowo olole khu Sidoni mala ong'oole kamabi khu nibo,

²²mala oboole kano: Omwami WELE aloma ali, ‘Ewe lola, ee Sidoni, Ese nakhweanyilekho, Ese ndekesia luyali lwase akari wowo. Ne balimanya bali Ese ndi Omwami WELE, ne khakhole likhalaka liase khwiwe, mala khekesie butakatifu bwase mwiwe.

²³Sikila kharume lufu luubi mwiwe, ne sifuki khu ngila chowo, ne baliirwa bakhakwe busa akari wowo, ne mbalu buli lubeka, nio balimanya bali Ese ndi Wele Omunyali owa Bioosi.’ ”

²⁴Omwami WELE aloma ali, “Mbao ekholo mu kholo chichabotookhelela Isiraeli, chichabachekheelelanga chiili nga kamawa ne mbululwe ekhabachuunisie lundi tawe. Mala balimanya bali Ese ndi Omwami WELE.”

²⁵Omwami WELE aloma ali, “Nga ne khabuusie be nju eya Isiraeli khukhwama mu kholo nicho Ese nabasalanisiamo ne khukhwekesia butakatifu bwase mu nibo ebweeni we chikholo, nono bakhamenye mu sibala siabwe nisio naelesia Yakobo omukholi wase.

²⁶Ne bakhamenye mu muleembe, mala bombakhe chinju ne khubiaala kimisabibu. Bakhamenye mu muleembe nga ese ne khabe ne ndikho mbisia bukhalaki khwabo boosi ba babachekheelelanga mala Baisiraeli bakhamanye bali Ese ndi Wele Omunyali owa Bioosi, Wele wabwe.”