Read lubukusu Esek. 29 Bible Online

Esek. 29 - lubukusu bible

Esek. 29

¹ Khu ndaalo eye khumi na chibili eye kumwesi kwe likhumi kwe kumwiiko kwe likhumi kwe mbaambe yefwe, Wele Omunyali Owa Bioosi amboolela ali,

²“Mwana wo mundu, biiya omwami owa Misiri. Muboolele nga niye ne sibala sioosi sia Misiri ne sicha khunyoola kumunaanio.

³Rakikha khulomaloma, loma kano: Omwami WELE aloma kano: Lola, Ese nakhweanyilekho, ewe Farao omwami owa Misiri, kukuundu nga kuremu kuboofu, kukwamenya mu luuchi akari, kulomanga kuli, ‘Naili luli lulwase, ese samwene nalubuumba.’ ”

⁴Ndakhukakia kimilobo mu saya chowo, mala khole ching'eeni che mu luuchi, chikhweambekho lukali, ndakhukhwesa orure mu Naili, ne ching'eeni che mu luuchi chikhweambilekho choosi.

⁵Ndakhumwaata mu sichiimi, ewe ne ching'eeni che mu luuchi choosi, olakwa khu sibala sisiangalaamwe, ne se olasiikhwa tawe. Ese ndaelesia chinyuni ne chisolo, kumubili kwowo nga siakhulia.

⁶ Nio boosi bamenyile mu Misiri, balamanya bali, Ese ndi Wele Omunyali Owa Bioosi. Wele Omunyali Owa Bioosi aloma ali, “Baisiraeli bamweyikinanga enywe Bamisiri khulwe buyeeti, khane enywe muli busa nga esiimbo eye khakoyakoye.

⁷Nga ne bamwiambakho ne kumukhono, mwafunikha mala mwabauna kamabeka, ne nga bamweambakho, mwafunikha mala bakwa bafunikha kimikoongo.”

⁸Khwako Omwami WELE aloma ali, “Lola ese ndareera babaandu bakhwibwaakale ne mbalu mala beere babaandu bowo ne bibiaayo.

⁹Ne sibala sia Misiri silanjukhwa sibe sisiangalaamwe. Nio bamanye bali Ese ndi Wele Omunyali Owa Bioosi sikila waloma oli, ‘Naili luli lulwase, ese samwene nalubuumba.’

¹⁰Khwako lola, Ese nakhweanyilekho, ewe nende Naili, ndakhola sibala sia Misiri sibe sisiangalaamwe, khukhwama Mikitoli ebunaswa khukhwola khu lukoba lwa Siyene siafubo khu lwakha lwa Esopia.

¹¹Omundu namwe esaang'i se bilibirakhoomo tawe khu miiko kamakhumi kane.

¹²Ese ndakhola sibala sia Misiri sibe sisianjuukhwe lukali khukhila bibala bioosi. Chingoba chasio chilaba alala ne chingoba chichanjukhwa khulwe kimiiko kamakhumi kane. Ndasalanisia Bamisiri mu kholo chichiindi mala mbasalanisie mu bibala bamenye mu baandu babaandi.”

¹³Omwami WELE aloma ali, “Enyuma we kimiiko kamakhumi kane, ese khabuusie Bamisiri khukhwama mu baandu nimwo basalaanilamo,

¹⁴ese khakobosiele Bamisiri chikhabi chabwe, ne khubakobosia mu sibala sia Paturusi, mu sibala nimwo basaalwa, ne ebweeneyo balaba bubwami butekhele.

¹⁵Buliba bubwami butekhele khukhila bubuundi bwoosi, mala se bukheniiniekho lundi khu kholo chichiindi tawe, ne ese khabakhole babe bakeekhe bakhalinyala lundi bamiia chikholo chichiindi tawe.

¹⁶Ne Baisiraeli se balieyikina lundi Bamisiri khulwe buyeeti tawe. Liiba lie Bamisiri lilikhebusia Baisiraeli nga ne bekhiikha khukhweyikina Bamisiri khulwe buyeeti. Nio Baisiraeli balimanya bali Ese ndi Omwami WELE.”

¹⁷Khu ndaalo eye khunyoa eye kumwesi kwe khunyoa kwe kumwiiko kukhola kamakhumi kabili na saba kie mbaambe, Wele Omunyali Owa Bioosi amboolela ese ali,

¹⁸“Mwana wo mundu, Nebukadinesa omwami owa Babiloni aakhola banamae bewe baakhola kimilimo kimiaandalafu kie khukhwibwaakala Tiro, buli murwe kwobukha sisioole, ne buli libeka liang'uukha ne kakhaba kario niye namwe banamae bewe se banyoola sisiindu siosi siosi khulwe khuruunga kimilimo kie khukhwibwaakala Tiro tawe.

¹⁹Khwako Ese Omwami WELE ndoma ndi, ‘Lola Ese ndaelesia Nebukadinesa omwami owa Babiloni sibala sia Misiri, alayaaya kimiaandu kiasio mala abukule, arekukhe nakio, ne kimiaandu ekio kilaba nga kumuruungo kwe banamae bewe.’ ”

²⁰Omwami WELE aloma ali, “Namueleesie niye sibala sia Misiri sibe kumuruungo kwewe khulwe kimilimo nikio aakhola sikila baakholela Ese.

²¹Khu ndaalo eyo khakhole Baisiraeli babe ne kamaani mala khakhwikule kumunwa ewe Esekieli olomalome mu Baisiraeli niio buli mundu anyala akhuulila, nio bamanye bali Ese ndi Wele Omunyali Owa Bioosi.”