Read lubukusu Esek. 3 Bible Online

Esek. 3 - lubukusu bible

Esek. 3

¹ Wele aamboolela ali, “Mwana wo mundu, lia nisio oelesibwe, lia sitabu sie kamaandiko sino, mala oche olomalome khu be kholo eya Isiraeli.”

²Khwako nasama mala ambelesia liaandike ndie.

³Nio aamboolela ali, “Mwana wo mundu lia sitabu sie kamaandiko nisio ndikho khuelesia sino mala wikure.” Nio nasilia, ne mukhanwa mwase siaba sinulu nga bubuukhi.

⁴Nio aamboolela ali, “Mwana wo mundu, cha mu kholo eya Isiraeli mala obaboolele elomo yase.

⁵Se ndikho khuruma khu kholo eloma lulomo lukeni lundi luandalafu tawe, ne kakhali khu kholo eye Baisiraeli.

⁶Se khuli khu kholo chingali che chinimi chingeni lundi chimbandalafu nicho okhaulila tawe. Ng'ali abanga nakhurumire khu kholo nga echo andi chilakhurekeeresia.

⁷Ne kakhali be kholo eya Isiraeli se balakhurekeeresia ewe tawe, se bakana khu khundekeeresia ese tawe, sikila ekholo eya Isiraeli yoosi yoma emurwe lundi eli ne kumwoyo kwe sileka.

⁸Lola, ese ndakhukhola ewe obe owe sileka khu nibo nga nibo ne bali.

⁹Ese nakhukholile ewe obe omuandalafu nga lulwanda, omulume nga libaale lie bukusi bwe angaaki ling'enang'ena. Okharia babaandu be sileka abo tawe.”

¹⁰Lundi Wele aamboolela ali, “Mwana wo mundu, burume bwase bwoosi nibwo khakhuboolele, buulile bulayi bwene mala obukhebulile mu mwoyo kwowo.

¹¹Lundi cha khu balebe bowo baali mu mbaambe mala obaboolele niko ese Omwami WELE ndikho khuboolela, bauliile balobile khuulila.”

¹²Nio Roho aasuta ese angaaki, mala luyali lwa Wele Omunyali Owa Bioosi lwabaao. Nio naulila enyuma wase luyoka lukali oli manya sibala ne sireenga.

¹³Naulila chindaa che bibuumbe ne chekubanakho mu ngaaki ne luyoka lwe chingara oli manya sibala ne silikho sireenga.

¹⁴Bunyali bwa Wele Omunyali Owa Bioosi bwanjichakho ne kamaani kamakali, ne nga Roho wewe ne asuta angaaki, naambwa lirima ne khubona buubi.

¹⁵Nio noola e Teliabibu aambi ne Luluuchi lwa Kebari niio be mu mbaambe baaba ne bamenyile. Mala namenyayo nabo nekhalao khulwe chindaalo saba ne khiliilwe lukali sikila niko naba ne mboone ne khuulila.

¹⁶Oli chindaalo saba chabira Wele Omunyali Owa Bioosi aamboolela ali,

¹⁷“Mwana wo mundu, ese nakhuroboore obe omuliindi khu kholo eya Isiraeli. Okhababoolele engaani niyo khuelesia.

¹⁸Ese naaba ne mboolela omundu omwoni ndi, ng'ali ewe olafwa, mala ewe se omukaambila tawe, namwe se olomaloma wamukaambila khu limenya liewe lie bubwoni khulwe khuonia bulamu bwewe tawe. Omundu oyo alafwila mu bwoni bwewe, ne ese khakhubanje ewe kamafuki kewe.

¹⁹Ne kakhali ewe waaba ne okaambila omundu omwoni ne se akaluukhana aarura mu bwoni namwe mwimenya liewe lie bubwoni tawe, niye alafwila mu bwoni bwewe, ne kakhali ewe olaonia bulamu bwowo.

²⁰“Lundi, omundu omuluungi ne aukha khu buluungi bwewe aakhola bubwoni, mala namura mu butinyu, alafwa waaba ne okhamukaambila tawe. Alafwa khulwe bubwoni bwewe, ne bikholwa biewe bie buluungi se bilikhebulilwakho tawe, ne ese khakhubanje ewe kamafuki kewe.

²¹Ne kakhaba kario, ewe waaba ne okaambila omundu omuluungi akhakhola bubwoni tawe, mala aalekha khubukhola, ng'ali alaba omulamu sikila aauliile likaambila. Ne nawe olaba waoniisie bulamu bwowo.”

²²Nechusibwa bunyali bwa Wele Omunyali Owa Bioosi, mala aamboolela ali, “Yinyokha oche mwitooma, ebweeneyo ndalomaloma ne nawe.”

²³Nio nenyokha nacha mwitooma, ne ebweeneyo nabona luyali lwa Wele Omunyali Owa Bioosi, bulayi bwene nga nalubona khu Luuchi lwa Kebari mala nakwa asi mafumala.

²⁴Ne kakhali Roho owa Wele aandiila aanjinyosia nema mala Wele Omunyali Owa Bioosi aamboolela ali, “Cha weyikaliilile munju yowo.

²⁵Mwana wo mundu, olabowa ne kimikoye ne se okhanyale khucha mu baandu tawe.

²⁶Ne ese khakhuandie lulimi, se okhanyale khukaambila babaandu be sileka bano tawe.

²⁷Ne kakhali ese khalomalome nawe lundi mala khukhole olomalome, okhababoolele niko ese Omwami WELE khuboolela. Balala bakharekeeresie, ne kakhali babaandi bakhalobe sikila bali ekholo eye sileka.”