Read lubukusu Esek. 30 Bible Online

Esek. 30 - lubukusu bible

Esek. 30

¹Wele Omunyali owa Bioosi amboolela kano:

²Mwana wo mundu, ng'oola olome oli Omwami WELE aloma ali, “Khemwesasaare, endaalo eye njoli elikho yiicha.

³Sikila endaalo eli siimbi, endaalo eya Wele Omunyali Owa Bioosi eli siimbi, eliba endaalo eye kamafuumbi, siise sie kumunaanio khu kholo.

⁴Liie likhabe mu Misiri, lilieembeelela lilaba mu Esopia, nga babaandu ne bakheererwe mu Misiri, ne kimiaandu kiasio kilayaaywa mala sionakakwe.”

⁵Banamae babaandikwa khukhwama Esopia, Putu, Libia, Arebia sioosi ne Kubu nende abo boosi ba baaba mu bulala bwa Misiri bakhafwiile mwiie.

⁶Omwami WELE aloma ali, “Abo babayeeta Misiri, bakhakwe ne khukhwebonia khulwe kamaani khwabwe khukhakhilwe, khukhwama Mikitoli, khukhwola Siyene, bakhafwiile mwiie.

⁷Ne Misiri silaba sisiaangalaamwe mu bibala biili bibiangalaamwe, ne chingoba chasio chilaba mu ngoba chiili kamakuunda.

⁸Nio bakhamanye bali Ese ndi Wele Omunyali Owa Bioosi, nga khabe ne nosiisie Misiri, ne khumala abo boosi basiyeetanga.”

⁹Khu ndaalo eyo, nga Misiri ne siliba ne sionakaakwe, kharume barumwa bache khangu barikhirisie Baesopia ne bakherekeekhe tawe. Lilieendekhelela likhabechekho khu ndaalo eye njoli eya Misiri, bona liolile.

¹⁰Omwami WELE aloma ali, “Ndarumikhira Nebukadinesa omwami owa Babiloni, khukhwakamia kimiaandu kia Misiri.

¹¹Niye ne babaandu bewe ba Babiloni, ekholo endafu lukali mu kholo choosi, bakhareerwe bonake sibala. Bakhebwaakale Misiri ne mbalu, mala sibala silaba ne bafu bakali.

¹²Ndateenyisia Naili, mala nde sibala sia Misiri, mu bunyali bwe babaandu bamayaanu. Ndakhola sibala sionakakwe, alala nende buli siindu siilimo, khulwe khurumikhira bakeni. Ese Omwami Wele nalomaloome.”

¹³Omwami WELE aloma ali, “Ndonaka bifwaani mala nakamie wele be bubeeyi mu Memufisi, omundu yesi yesi owe nju eye bubwami se alabao mu Misiri tawe. Nono ndakhola Bamisiri babe baari.

¹⁴Ndakhola Paturusi lukoongo lwe siafubo lwanjukhwe, lundi ndoosia Soani lukoongo lwe bunaswa, mala mbukuume Tebesi.

¹⁵Ndarafwira Pelusiumu, lukoba lwe kamaani mu Misiri, mala ndukhole luulile burafu bwase, lundi ndonakaka kimiaandu kia Tebesi.

¹⁶Ndoosia Misiri, Pelusiumu lukhabe mu buchuuni burafu. Tebesi lukhatechulwe, Memufisi lukhebuulilwe ne basiku kumuusi.

¹⁷Babaandu be siseecha baraaka ba Oni ne Pibeseti, bakhafwiile mwiie, ne babaandu bamenyilemo bakhaambwe bayilwe mu mbaambe.

¹⁸Tehafunesi eyo ekhabe sisiilima, nga ne ndionaka bunyali bwa Misiri, ne kamaani niko sieboneseliangakho kakhweo. Sikhafuunikhwe ne lifuumbi, mala babaandu basio bakhaambwe bayilwe mu mbaabe.

¹⁹Ndauukuuma ndio Misiri, mala babaandu bamanye bali Ese ndi Omwami Wele.”

²⁰Khu ndaalo eya saba, eye kumwesi kwe khunyoa kwe kumwiiko kwe khumi na mulala kwe mbaambe yefwe, Omwami Wele aamboolela ali,

²¹“Mwana wo mundu, Ese nafunile Farao omwami owe Misiri kumukhono, mala lola, se kwaboilwe kimikhandaala kwiyonge kuone nio kunyoole kamaani kusute embalu tawe.

²²Khwako Ese Omwami WELE ndoma ndi, ‘Lola, Ese neaanyile khu Farao omwami owe Misiri. Ndafuna kamakhono kewe koombi sitube, kumulamu nende kukwafunwa, mala ndakhola embalu eanukhe ekwe khukhwama mu mukhono kwewe.

²³Ndasalanisia Bamisiri mu kholo choosi lundi ndabasalanisia mu bibala bioosi.

²⁴Ndara kamaani mu makhono ko mwami owa Babiloni mala mwakaanisie embalu yase. Ne kakhali ndafuna kamakhono ka Farao mala alalambaala ebweeni wewe ne alenya nga omundu niye baunile.

²⁵Ndara kamaani mu makhono ko mwami owa Babiloni, ne kakhali kamakhono ka Farao kalakwa, mala balamanya bali Ese ndi Omwami Wele nga ndakaanisia embalu yase khu mwami owa Babiloni, alakibwaakalila sibala sia Misiri.

²⁶Ne ese khasalanisie Bamisiri mu kholo chichiindi lundi mbasalanisie mu bibala bioosi. Nio, bamanye bali Ese ndi Omwami Wele.’ ”