Read lubukusu Esek. 31 Bible Online

Esek. 31 - lubukusu bible

Esek. 31

¹Khu ndaalo eye khunyoa eye kumwesi kwa khataru kwe kumwiiko kukhola ekhumi na mulala, Omwami Wele amboolela ese Esekieli ali,

²“Mwana wo mundu, boolela Farao omwami owe Misiri, ne babaandu bewe oli, Bunyali bwenywe bufwaananisibwa ne bwa naanu?

³Lola, Ese ndamufwaananisia ne kumurongooro kumutarakwa kwa Lebanoni, kwe chisakia chindayi, che sisiniini silayi, kumurongooro kumuleeyi lukali.

⁴Kameechi kabao kakakukhola kwachoa, chimoni che chinjichi mwiloba asi niio kwabiaalwa, kwabisia kameechi, kolela kimirongooro kikiindi kioosi kie mu musiru.

⁵Nio kwalea kwacha mu ngaaki, kwakhila kimirongooro kioosi kie mundaa, chimbasaana chakwo chachoa chaboofua, chisakia chakaliia chaaba chindeeyi, khukhwamanana ne kameechi kamakali mu bisaafu biakwo.

⁶Chinyuni cha buli lukano, chombakha biswi biacho mu mbasaana, chisaang'i che mundaa choosi, chasaalilana asi we chisakia, babaandu bakali po, bekhalanga mu siniini siakwo.

⁷Kwaba kumulayi lukali mu bukali bwakwo, mu buleeyi bwe chisakia chakwo, sikila kimili kiakwo kiaba kiacha asi, khukhwola khu meechi.

⁸ Kimirongooro kimitarakwa mu mukuunda kwa Wele, abeele se kinyala kiakukhila tawe, namwe kimirongooro kimiamori se kiaboofua chisakia chaaba nga chakwo tawe, kimirongooro kie mundaa se kianyala khulekhaasibwa, ne chisakia che kumutarakwa tawe. Kumurongooro se kwabao mu mukuunda, kukwafwaana bulayi nga nikwo tawe.

⁹Nakukhola kwafwaana bulayi, kwaaba ne chisakia chingali chichakalaasia, mala kimirongooro kioosi kie mu Edeni, kie mu mukuunda kwa Wele, kiakukholela siikhalikhali.”

¹⁰Khwako Omwami WELE aloma ali, “Sikila kwachoa kwalea lukali kwola mu maleesi, mala kumwoyo kwakwo kweniinia sikila buleeyi bwakwo.

¹¹Ese ndakwakanisia owe kamaani owe chikholo. Ng'ali alakukhola khuloondekhana ne bubwoni bwakwo. Nakumwaatile enje.

¹²Bakeni, be kholo endafu lukali mu kholo, balakurema mala bakulekhe. Khu bikulu ne mumatooma koosi chisakia chakwo chilakwa ne chimbasaana chiakwo chilakwa chifunikhakile mu maloba nimwo kameechi kamaangamo mala babaandu be mu liloba belukhe barure mu siniini siakwo bakwanjukhe.

¹³Chinyuni choosi chilamenya mu kusina kwakwo ne chisolo choosi chilamenya mu mbasaana chakwo.

¹⁴Nono khukhwama luno kumurongooro kuuli ameechi kuulachoa kulee, namwe chisakia chilee choole mu maleesi se kulabao tawe. Kimirongooro kilanywa kameechi kilee kibe nga nikwo se kilabao tawe. ‘Sikila kioosi kiaanilwe kifwe, kiche mu sibala sie asi, alala ne babaandu boosi babeekha asi mwiloo.’ ”

¹⁵Omwami WELE aloma ali, “Endaalo niyo kumurongooro kweekha asi Emakoombe, nalaka kamasika kabeo, nakhiingilila chisiba chichakubaakho mala nakufuunikha; nemekha chinjichi chakwo mala kameechi kamakali kateenya. Nakhola Lebanoni lweunamila sikila nikwo, ne kimirongooro kioosi kie mundaa kianiaala sikila nikwo.

¹⁶Nakhola chikholo chaterema sikila luyoka lwe likwa liakwo khu ndaalo niyo nakumwaatilakho asi Emakoombe alala nende abo babeekha asi Mwiloo; ne kimirongooro kioosi kia Edeni kimirobore lundi kimilayi lukali mu Lebanoni, kioosi kikianyoola kameechi kakolaana, kiaolela mu sibala sie asi.

¹⁷Bosi beekha asi Emakoombe alala ne nakwo, babeerwa ne mbalu, alala ne naabo ba baaba lubeka lwakwo, babamenyanga mu siniini siakwo akari we babaandu bakali.”

¹⁸Omwami WELE aloma ali, “Murongooro siina mu mirongooro kia Edeni kukwaba ne luyali ne bunyali nga ewe? Ewe okhekhisibwe asi alala ne kimirongooro kia Edeni mu sibala sie asi. Okhakone alala nende abo bakhamanyile Wele tawe, alala nende abo bareerwa ne bali mwiie. “Kano niiko kakhanyoole Farao ne babaandu bewe boosi.”