Read lubukusu Esek. 32 Bible Online

Esek. 32 - lubukusu bible

Esek. 32

¹Khu ndaalo eye khunyoa eye kumwesi kwe khumi na kibili mu mwiiko kukhola ekhumi na kibili khukhwama nga khwayilwa mu mbaambe, Omwami Wele aamboolela ese Esekieli kano:

²Mwana wo mundu rakikha lisooma sikila Farao omwami owe Misiri mala omuboolele oli, “Ewe weyibaasia wamwene khuuba etalang'i mu kholo choosi, ne kakhali oli busa nga kukuundu kufwaana kuremu mu nyanja; witumbulanga eyi ne eyi mu njichi chowo, otumbuulanga kameechi ne bikele biowo, ne khunyaalutia chinjichi chowo.”

³Omwami WELE aloma ali, “Ndakhumwaatakho lutiimba lwase, ebweeni we babaandu bakali; mala khuupe ewe khu sikiingi ne lutiimba lwase.

⁴Ndakhumwaata asi khwiloba, ndakhufuruusia okwe mu sikuuri, mala ndareera chinyuni choosi chikhwichulekho, mala ndekhe chisaang'i choosi che mundaa khu sibala sioosi chikhulie.

⁵Khasalanisie chinyama che kumubili kwowo khu bikulu, lundi nichusie chinyama che kumubili kwowo mu matooma.

⁶Ndachukha khwiloba kamafuki kowo kaalikho kachichukha, khukhwola khu bikulu, ne chinjichi chilechula kamafuki kowo.

⁷ Nga ne khakhurusieo, khafuunikhe likulu, mala khole ching'enieesi chimaliie, khafuume enyanga ne lifuumbi, ne kumwesi se kukhakhosie tawe.

⁸Khakhole bibiindu bikhosia khwikulu bioosi, bibe sisiilima, mala ndareera sisiilima khu sibala siowo. Ese Wele Omunyali owa Bioosi nalomile.

⁹“Ndanaania kimiooyo kie babaandu bakali nga bakhaulile kamakhuwa ke mbaambe mu chikholo chichiindi, mu bibala nibio okhamanyile tawe.

¹⁰Ndakhola chikholo chingali chesiinduukhe sikila ewe, ne babaami babwe bakharie lukali ebweeni wowo, nga ne khauche embalu yase ebweeni wabwe. Bakhatereme biise bioosi sikila khuuria lifwa. Buli sia mulala okhakhole ario, khu ndaalo eye libuna liowo.

¹¹“Sikila Ese Omwami WELE ndikho mboolela omwami owa Misiri kano ‘Omwami owa Babiloni alakhwibwaakala ne mbalu.

¹²Ese ndakhola banamae be kamaani bakhwibwaakale ne mbalu, banamae baali barafu lukali mu kholo chichiindi choosi. Balonakaka liliebonia lia Misiri, mala Bamisiri bakali balafwa.

¹³Ndeerera bibiaayo bia Misiri, biili ameechi kamakali, ne sikele sio mundu se sikhakatumbuule, namwe bikhakayu bie chibibiaayo bikanyaalutie lundi tawe.’ ”

¹⁴Omwami WELE aloma ali, “Nono ndakwalaasia kameechi ke Bamisiri ne khuyenjeesia chinjichi chabwe chibisie ne chiseletekha busa nga kamafura.

¹⁵“Nga ne khakhole sibala sia Misiri sianjukhwe nga ne siliba ne siyaayilwe bioosi mala siarama sichula; nga ne ndiba ne niirire bamenywa biasio boosi, nio Bamisiri bamanye bali Ese ndi Omwami Wele.

¹⁶Lino nilio lisooma nilio bakhembe. Bakhasi khukhwama mu kholo choosi bakhembe ne balikho basooma Misiri ne babaandu basio boosi. Omwami WELE aalomile”

¹⁷Khu ndaalo eye khumi na chiraano eye kumwesi kwe khunyoa kwe kumwiiko kwe khumi na kibili kwe mbaambe yefwe, Omwami Wele aamboolela ese Esekieli ali,

¹⁸“Mwana wo mundu, Yesasaara olile Bamisiri bakali, Bayile asi, alala ne babaandu be chikholo che kamaani, bache mu sibala sie asi, alala nende abo baacha asi Mwiloo.

¹⁹Eku, enywe mukhila naanu lukoondo? Khe mwiikhe asi! Mubiikhwe muuluukhile alala nende abo bakhamanyile Wele tawe!”

²⁰Bamisiri babunile alala nende abo babeererwa mwiie. Embalu yarekeekhwe khubunia Misiri ne babaandu basio bakali.

²¹Banamae be kamaani, nende abo ba bayeeta Bamisiri mwiie; ne bali Emakoombe akari bakhalome bali, “Bekhile asi, balambaalile ao, babaandu baakhamanyile Wele tawe, babeererwa mwiie.”

²²Omuasiria ali emakoombe eyo ne biliindwa bie banamae bewe boosi biamubotookhelela. Boosi beerwa ne mbalu.

²³Biliindwa biabwe bili Mwiloo asi. Ne be kumusuumbu bewe babotookheleele siliindwa siewe. Boosi beerwa, beerwa ne mbalu. Bareeranga biriisio bikali mu sibala sie balamu.

²⁴Elamu luliyo, ne babaandu balwo boosi asiliindwa sialwo; abo babeekha asi ne bakhamanyile Wele tawe lundi babaareeranga biriisio bikali mu sibala sie balamu, boosi beerwa, beerwa ne mbalu. Baambwa chisoni alala ne nende abo babeekha asi Mwiloo.

²⁵Elamu lukona akari waabo babeerwa alala ne babaandu balwo boosi. Biliindwa biabwe bialubotookhelela. Boosi baakhamanyile Wele tawe, babeerwa ne mbalu; sikila biriisio biabwe biasalaanila mu sibala sie balamu. Baambwa chisoni alala nende abo babeekha asi Mwiloo; bareerwe akari waabo babeerirwe.

²⁶Mesheki ne Tubali baliyo ne babaandu babwe boosi. Babotookheleelwe ne biliindwa bie banamae babwe. Babaandu abo boosi bakhamanyile Wele tawe, beerwa ne mbalu. Ne basiili balamu basalanisia biriisio mu sibala sie balamu.

²⁷Se basiikhwa alala ne banaitiriani be kamaani babaafwa khale, beekha asi Emakoombe ne bulwaani bwabwe tawe. Chimbalu chabwe charwa emirwe kiabwe lundi nibo chingabo chabwe chali khu bikuumba biabwe. Buuri sikila banaitiriani abo bwaba mu sibala sie balamu.

²⁸Nio enywe Bamisiri mukhafunakakwe mala mukone akari we babaandu bakhamanyile Wele tawe, alala nende abo babeerwa ne mbalu.

²⁹Baedomu baliyo, alala ne babaami babwe ne baruki babaaba be kamaani kamakali, ne kakhali luno bakonile alala nende abo babeerwa ne mbalu; bakonile nende abo bakhamanyile Wele tawe alala nende abo baacha asi Mwiloo.

³⁰Baruki be bunaswa baliyo boosi, ne Basidoni boosi. Babeekha asi mu soni alala nende abo babeerwa, sikila biriisio nibio bareera khulwe kamaani kabwe, bakonile ne basiili khumanya Wele alala nende babeerwa ne mbalu, lundi bali mu soni alala nende abo babeekha asi Mwiloo.

³¹Omwami WELE aloma ali, “Nga Farao ne akhabone babereerwa ne mbalu, niye ne banamae bewe boosi bakhaoleelesibwe khulwe babaandu bwe boosi.

³²“Asalanisia biriisio mu sibala sie balamu; khwako, akhasiikhwe alala nende bakhamanyile Wele tawe, alala nende abo babeerwa ne mbalu, Farao alala ne banamae bewe bakali. Omwami WELE aalomile”