Read lubukusu Esek. 33 Bible Online

Esek. 33 - lubukusu bible

Esek. 33

¹Omwami Wele amboolela ese Esekieli ali,

²“Mwana wo mundu lomaloma ne babaandu bowo mala obaboolele oli, ‘Ese naaba ne ndeera liie mu sibala ne babaandu be mu sibala esio babukula omundu mulala mu baandu babwe, ne khumukhola omuliindi wabwe;

³ne omundu oyo aaba nabo, busiku ne bwiicha mu sibala akhupa ekhoombi lundi aboolela babaandu.

⁴Nono omundu yesi yesi oulila ekhoombi ne yiipa, mala se abukulamo lukeendo tawe, omusiku ne eecha eera omundu oyo. Aba sifuki siewe sili khu mwene.

⁵Aaulila ekhoombi ne yiipa mala aaleka; lifwa liewe lilaba khu niye omwene. Ne kakhali abanga aabukalomo lukeendo, andi omwene aaonia bulamu bwewe.

⁶Ne kakhali omuliindi ne abona liie ne liicha ne se akhupa ekhoombi nio babaandu bamanye tawe, mala omusiku eeche eere omundu yesi yesi khu nibo, aba omundu oyo eereerwe mu bwoni bwewe, ne kakhali Ese khabanje omuliindi lifwa lio mundu oyo.

⁷“ ‘Nio mwana wo mundu, ese nakhukholile omuliindi owe nju eya Isiraeli buli lwoosi ne oulila burume khukhwama mukhanwa mwase khukhwola obakaambile.

⁸Ese naaba ne mboolela omwoni ndi, ee mwoni ewe, ng'ali olafwa mala ewe se olomaloma khu mwoni oyo omukaambila aukha alekha engila yewe tawe, omundu omwoni oyo alafwila mu bwoni bwewe, ne ese khakhubanje ewe kumurwe kwewe.

⁹Ne ewe waaba ne okaambila omumayaanu alekhe bubwoni bwewe, ne kakhali se abulekha tawe, alafwila mu bwoni bwewe ne kakhali ewe olaba weonisie wamwene.’ ”

¹⁰Wele Omunyali Owa Bioosi amboolela ese Esekieli kano: Ne ewe mwana wo mundu, boolela enju eya Isiraeli oli, “Enywe mwalomile muli, ‘Bamayaanu ne bubwoni bwefwe buli bukali. Khulikho khuwa sikila bumayaanu ne bubwoni; nono khunyala khwaba balamu khuriena?’ ”

¹¹Baboolele kano: Omwami WELE, Wele oomenyile mindali aloma ali, “Ese se sangaalilanga lifwa lio mwoni tawe, ne kakhali omwoni alekhe bubwoni bwewe mala amenye. Ee, enju eya Isiraeli lekha, lekha bubwoni bwowo! Siina sikila ofwe?

¹²“Ne ewe mwana wo mundu, boolela Baisiraeli bowo kano: Omundu omuluungi ne akhola bubwoni, buluungi bwewe se bulamuonia tawe. Ne omundu omumayaanu ne akaluukhana aalekha bumayaanu, se alafwa tawe. Omuluungi ne akhola bubwoni se alamenya sikila buluungi bwewe tawe.

¹³Ese nakhaba ne suubisia omuluungi ndi, ‘Ng'ali olamenya,’ ne akelao asuubila mu buluungi mala akhola bubwoni se siliio na silala khu bikholwa biewe bie buluungi siilikhebulilwa tawe. Alafwila mu bwoni nibwo akholile.

¹⁴Lundi ese nakhaba ne mboolela omumayaanu ndi, ‘Ng'ali ewe olafwa,’ ne kakhaba kario aaba ne akaluukhana aalekha bubwoni mala aakhola liili lie lilaka ne lilayi;

¹⁵omumayaanu ne akalusia nisio aambiiliile ne khukobosiayo nisio eebile, mala amenye mu lilakiilisia lie bulamu ne se akhola bubwoni tawe; ng'ali alamenya, se alafwa tawe.

¹⁶Bubwoni bwewe bwosi bwosi nibwo akhola se bulikhebulilwa khulwe khumureerera butinyu tawe. Aakholile lie lilaka lundi lilayi, ng'ali alamenya.

¹⁷“Ne kakhaba kario babaandu bowo baloma bali, ‘Niko Omwami Wele akhola se kali kamalayi tawe,’ khane niko nibo bakhola niiko kamamayaanu.

¹⁸Omundu omuluungi ne akaluukhana aalekha buluungi mala aakhola bubwoni, alafwa sikila bubwoni bwewe.

¹⁹Ne nga omwoni ne akaluukhana aalekha bubwoni mala aakhola kamalayi ke lilaka, alamenya sikila bikholwa bilayi biewe.

²⁰Ne kakhaba kario enywe muloma muli, ‘Niko Wele Omunyali owa Bioosi akhola se buli bung'ali tawe.’ Ee enju eya Isiraeli, Ese ndakhalakila buli mulala khwinywe khuloondekhana ne bikholwa biewe.”

²¹ Khu ndaalo eya kharaano eye kumwesi kwe khumi kwe kumwiiko kwe likhumi na kibili kie khuyilwa khwefwe mu mbaambe, omundu owaba ne eelukha khukhwama Yerusalemu eecha mala aamboolela ali Lukoba lwakwile.

²²Nono kamaani ka Wele Omunyali owa Bioosi kaaba khwise ekolooba omukwa oyo ne asiili khwicha, ne Wele aaba aanjikuule kumunwa mu siise nisio omundu oyo aulukhilakho ne se naanda lulimi lundi tawe, nanyala khulomaloma.

²³Omwami Wele amboolela ese Esekieli ali,

²⁴“Mwana wo mundu, babaandu bamenyile mu ngoba chichanjukhwa che mu sibala sia Isiraeli bachiililila khuloma bali, ‘Aburahamu aaba mulala yeng'ene, kakhaba kario aelesibwa sibala sioosi. Ne kakhali luno efwe khuli bakali, ng'ali khwaelesiibwe sibala sibe sisiefwe.’

²⁵“Khwako baboolele kano: Omwami WELE aloma ali, ‘Enywe mulia enyama ne kamalasile. Musaaya bifwaani, lundi muchukha sifuki. Eku, mwibaasia muli mulaebwa sibala sino sibe sisienywe?

²⁶Mweyikina chimbalu chenywe, mukhola bibiindu biisinya ne buli museecha mwinywe akhola sifwabi no mukhasi wo wasie! Eku, mwibaasia muli mulaebwa sibala sino sibe sisienywe?’

²⁷Baboolele kano: Omwami WELE echubile ali, ‘Nga ese ne menyile mindali, ng'ali abo baali mu ngoba chichonakakwa kane beerwe ne mbalu, ne abo baali enje we chingoba ndabaana khu saang'i che mundaa chimulie ne abo baali mu ngoba che kamaani ne mu mabina balafwa luufu.

²⁸Ndakhola sibala sianjukhwe ne khukhwonakakwa, ne liliebonia liasio lie sileka liloola khu siakamo. Bikulu bia Isiraeli bilanjukhwa lukali, se aliio oolibiramo tawe.

²⁹Nio bakhamanye bali Ese ndi Wele Omunyali owa Bioosi nga ne khabe ne kholile sibala khukhwanjukhwa ne khukhwonakakwa, sikila bibiindu bie khusinya nibio bakholile.’ ”

³⁰“Ne ewe mwana wo mundu, babaandu bowo bakachula khwiwe e masiisi nende emiliango kie chinju. Baboolanila; omundu mulala khu wasie bali, ‘Yiicha khuche khuulile burume siina bubwama khu Wele Omunyali owa Bioosi.’

³¹Mala becha khwiwe nga babaandu ne becha mala bekhala ebweeni wowo nga babaandu base ne baulila niko obaboolela, ne se bakhola nga obaboolela tawe, sikila mu lilomaloma liabwe bekesia busiime bukali ne kimiooyo kiabwe kili khu ke bukhala bwabwe.

³²Ne lola, ewe khu nibo oli nga omundu owimba kimienya kie busiime mu mumilo kumulayi mala okhupa lituungu bulayi, sikila baulila niko oloma, ne se bakakhola tawe.

³³Ne nga burume bwowo ne bukhoole, mala khukhwola bwole! Bakhamanye bali omung'oosi aabelenge akari wabwe.”