Read lubukusu Esek. 34 Bible Online

Esek. 34 - lubukusu bible

Esek. 34

¹Omwami Wele amboolela kano:

²Mwana wo mundu, ng'oola wibwaakale babaayi ba Isiraeli. Ng'oola mala obaboolele oli, “Omwami WELE Omunyali owa bioosi aloma ali, ‘Ee! Enywe babaayi ba Isiraeli mumwelisiisienge mwabeene! Eku, babaayi se benyekhana baaye kamakheese?

³Mulia kamafura, mufwara bulayi bufumbo bwe kamakheese, mwiira kamakhomefu ne mulia, ne kakhali se mwaaya kamakheese chana tawe.

⁴Se muliinda kamatekhele tawe, se muonia kamalwale tawe, se muboa kayikila keyonga tawe, se mukobosia katibile tawe, se muenja katibile tawe. Mukayia ne kamaani ne burafu.

⁵ Nono, kasalanisibwa, sikila omwayi se alio tawe, mala kabe siakhulia sie chisang'i che mundaa choosi.

⁶Kamakheese kase kasalanisibwa, kayiiya mu bikulu bioosi ne khuucha buli khu khakulu khaleeyi. Kamakheese kase kasalanisibwa khu sibala sioosi, ne kakhali se aliio ookalola namwe aakaenja tawe.’ ”

⁷“Khwako enywe babaayi ulila burume nibwo Ese Wele Omunyali Owa Bioosi ndikho muboolela enywe.

⁸Ese Omwami WELE nechubile ndi, ‘Nga Ese ne menyile mindali, sikila kamakheese kase kabeele ke khukhwira mala kekeele siakhulia sie chisaang'i che mundaa khukhwama nga omwayi ne akhabao tawe; lundi sikila babaayi base se baenja kamakheese kase tawe. Ne kakhali babaayi belisiisie babeene ne se baayile kamakheese kase tawe.

⁹Khwako, enywe babaayi ulila burume bwo Mwami Wele,

¹⁰Ese Omwami WELE ndoma ndi lola, Ese neaanyile khu baayi, mala ndabanuula kamakheese kase, ndabakania bakhaaya kamakheese tawe. Babaayi se baleliisia lundi tawe. Ndareesia kamakheese kase khukhwama mukhanwa mwabwe, kakhaba siakhulia siabwe tawe.’ ”

¹¹“Ese Omwami WELE ndoma ndi, ‘Lola, Ese samwene ndalola kamakheese kase lundi ndakaenja.

¹²Bulayi bwene nga omwayi ne aenjanga kamakheese kewe ne kasalaanile ese khaenje kamakheese kase, mala ngareesie khukhwama buli abuundu niio kasalanisiibwe khu ndaalo eye kamafuumbi ne sisiilima kotokoto.

¹³Khakareere khukhwama mu kholo chingali ne khukabuusia khukhwama mu bibala bikeni. Khakakobosie mu sibala siako, mala ngaaye khu bikulu bia Isiraeli ne khu njichi ne mu ngoba choosi nicho babaandu bamenyilemo.

¹⁴Khakaaye mu maayilwe kamalayi, ne bikulu bileeyi bia Isiraeli niibio bilaba kamaayilwe kamalayi kaako. Ebweeneyo kalakona asi mu sibala silayi sie kamaayilwe lundi kalaaya mu maayilwe kamalayi lukali khu bikulu bia Isiraeli.

¹⁵Ese samwene khabe omwaayi owe kamakheese kase lundi Ese samwene khakakhole kakone asi khunyoola siuluukho. Ese Omwami WELE nalomile.

¹⁶Ese khaenje kakatiba, lundi khakobosie kakatiima, lundi khasilikhe kaumiie, mala ndinyilisie kaali kamatekhele ne kakhali khabunie kaali kamanefu lundi ke kamaani. Khakaaye mu bung'ali.’ ”

¹⁷“Ne khwinywe lituuli liase, Ese Omwami WELE Omunyali owa bioosi ndoma kano: Lola Ese khalaka akari we likheese ne likheese, kamamiiku ne chindurume.

¹⁸Eku, enywe se mwanyaliikhe khukhwaaya mu maayilwe kamalayi tawe, nio khukhwola muswaalakilile ne bikele bienywe kamaayilwe kenywe kaaramire? Eku, ne munywa kameechi kamakwalaafu, khukhwola mutumbuule kaaramire ne bikele bienywe?

¹⁹Eku, khukhwola kamakheese kase kalie nibwo enywe muswaalakiliile ne bikele bienywe ne khunywa kameechi niko mutumbuulile ne bikele bienywe?

²⁰Khwako, Ese Omwami WELE ndoma kano: Lola Ese samwene khakhalake akari we kamakheese kamanefu ne kamang'au.

²¹Sikila musindikhila lubeka ne kamabeka lundi muuna kamatekhele ne chinjika chenywe khukhwola nga ne mukasalanisia buli lubeka aleeyi.

²²Ese khaonie kamakheese kase. Se kalachiililila khuuba ke khu khupisibwa siibi tawe, lundi Ese khakhalake akari we likheese ne likheese.”

²³“Ese khabaelesie omwayi mulala, omukholi wase Daudi. Akhakaliisie ne khuuba omwaayi wako.

²⁴Ne Ese Wele Omunyali Owa Bioosi khabe Wele wako ne Daudi omukholi wase akhabe omwami mu niko. Ese Omwami Wele nalomile.

²⁵Khakhole ne nabo endakaano eye kumuleembe, mala mbuuyisie chisaang'i che mundaa njirusie mu sibala nio bamenye mu sichiimi mala bakone mu bichakha mu muleembe.”

²⁶“Khabakhole bamenye ne khukara sikulu siase sitakatifu ne khubabiita chikhabi. Ndekhisia efula mu siise siayo, elaba efula eye chikhabi.

²⁷Kimirongooro kie mu mukuunda kilanenekha bibiaamo, ne kamaloba kalarusia bibiaamo biako mala bakhamanye bali Ese ndi Omwami Wele nga ne khafune biibia bie lichooki liabwe ne khubasikula khukhwama mu makhono kaabo babaabakhola nibo khuuba banasioobi babwe.

²⁸Se bakhabe lundi be khu khuupisibwa siibi ne bibala bibiindi tawe; lundi chisolo che mundaa se chilabeera ne khubalia tawe. Balamenya mu muleembe, ne se aliio oolabariikhirisia tawe.

²⁹Khabaelesie kamaloba ke ngakha ne kamaruuti mala ndusieo enjala mu sibala. Ne chikholo chichiindi se chikhabakhomekho lundi tawe.

³⁰Bakhamanye bali ese ndi Omwami WELE, Wele wabwe, ndi ne nabo ne nibo, be nju eya Isiraeli bali babaandu base. Ese Omwami WELE nalomile.”

³¹Ese Omwami WELE ndoma ndi, “Ne enywe muli kamakheese kase, kamakheese ke mu maayilwe mwase, ne Ese ndi Wele wenywe.”