Read lubukusu Esek. 35 Bible Online

Esek. 35 - lubukusu bible

Esek. 35

¹ Wele Omunyali Owa Bioosi amboolela kano:

²Mwana wo mundu, yibwaakala sikulu sia Seiri mala osing'oolele kamabi.

³Siboolele kano: Omwami WELE aloma ali, “Lola, sikulu sia Seiri ewe, Ese nakhweanyilekho, ndasuta kumukhono khwibwaakale mala khukhole wanjukhwe lundi obe likuunda.

⁴Ndakhola chingoba chowo chisasikhe busa, ne olanjukhwa mala ewe olamanya oli ese ndi Omwami Wele.

⁵“Ewe wabiikha ekhiinda eye busiku khu Baisiraeli, mala wabeera ne mbalu mu siise sie busiku bwabwe, mu siise sie sinyaasio siabwe simaliilisi.

⁶Khwako Ese Omwami WELE nechubile, ndakhurekekhera lifwa ne lifwa lilakhuloondakho sikila oli ne kumusaango kwe khuchukha sifuki khwako lifwa lilakhutimakho.

⁷Ese ndakhola sikulu sia Seiri sibe likuunda lundi sianjukhwe mala ndakamia abo boosi bakhwichangakho ne khu khururakho.

⁸Babaandu bowo bakali balereerwa khu bikulu biowo, ne khu biili, ne mu matooma ne mu luongwa mwe chinjichi choosi. Boosi bakherwe ne mbalu bakhakwe ebweeneyo.

⁹Ese khakhukhole ewe wanjukhwe buli lwoosi lundi babaandu se balamenya mu ngoba chowo tawe. Nio ewe omanye oli Ese ndi Omwami Wele.

¹⁰“Sikila ewe walomile oli, ‘Chikholo chibili cha Yuda ne Isiraeli ne bibala biabwe bibili bilaba bibiase mala ndababukula babe babaase,’ akhaba Omwami Wele ne ali lubeka lwabwe.

¹¹Omwami WELE Eechubile kano: Nga Ese ne menyile mindali, ndakhukholela khuloondekhana ne lirima ne siikhalikhali nisio wekesia sikila wababiila. Mala khakhole samwene manyikhe kwiwe nga ne ndikhukhalakila ewe.

¹²Ne ewe okhamanye oli Ese Omwami Wele naulila bukhomo bwowo bwoosi nibwo wakhoma bikulu bia Isiraeli ne oloma oli, ‘Bianjuukhwe, khwaelesibwe khubilie.’

¹³Nauliile nga olebonianga ne khuloma kamakhuwa kamakali khwise.”

¹⁴“Ese Omwami WELE ndoma ndi, ‘Khakhukhole wanjukhwe, mala sibala sioosi siikhoye.

¹⁵Bulayi bwene nga ewe ne wekhoyela kumukabwa kwe nju eya Isiraeli sikila kwaba likuunda, nono Ese ndaba busa khwiwe; sikulu sia Seiri ewe nende Edomu sioosi, mulanjukhwa. Khwako bakhamanye bali Ese ndi Omwami Wele.’ ”