Read lubukusu Esek. 36 Bible Online

Esek. 36 - lubukusu bible

Esek. 36

¹Ne ewe mwana wo mundu, ng'oola khu bikulu bia Isiraeli olome kamakhuwa kano: Ee, bikulu bia Isiraeli, ulila burume bwo Mwami Wele.

²Omwami WELE aloma ali, “Sikila omusiku aakhulomile ewe ali, ‘Aha! Bibiili bie khaale bileeyi biabeele kumukabwa kwefwe.’

³“Khwako ng'oola mala olome kano: Omwami WELE aloma ali, ‘Sikila, yee sikila bamukhola enywe mwanjukhwe, mala bamwibwaakala khukhwama buli lubeka bamuswalakilila nio enywe mwekela kumukabwa kwe chikholo choosi, mwekela bukhomo ne kamakuto ke babaandu.

⁴Khwako bikulu bia Isiraeli ulila burume bwo Omwami WELE Omunyali Owa Bioosi. Omwami Wele Omunyali Owa Bioosi aboolela bikulu bia Isiraeli ne bibiili ne bitoloola bie kameechi ne kamatooma, kamakuunda ne chingoba chichanjukhwa, chichekeele lirakikha lie khuyaaya lundi sisiindu silekeelesibwa ebweeni we chikholo choosi chichachibotookhelesia.’ ”

⁵Khwako Omwami WELE aloma ali, “Ese ndikho ndomaloma mu sikhalikhali sirafu sie busiku khu kholo chichiindi choosi ne khu Edomu, babekabila sibala siase nga kumukabwa kwabwe mu liekhoya lie kumwoyo; babukula sibala siase siaaba sisiabwe sikila kamaayilwe kasio nio basiyaaye.

⁶Khwako ng'oolela sibala sia Isiraeli mala oboolele bikulu, ne bibiili, bitoloola bie kameechi ne kamatooma kamakhuwa kano: Omwami WELE aloma ali, ‘Lola Ese ndikho ndomaloma mu siikhalikhali siase sirafu sikila chikholo chamuambia enywe chisoni.

⁷Khwako Ese Omwami WELE ndoma ndi: Ese nechubile ndi chikholo chichamubotookhelesia ching'ene chosi chilaambwa chisoni.

⁸Ne kakhali enywe Ee, bikulu bia Isiraeli, kimirongooro, chisakia chichoe mala chaame bibiaamo khulwe Baisiraeli base, sikila balikho bakobola engo khangu.

⁹Sikila lola Ese ndi lubeka lwenywe mala ndamuboolela, mulalimwa mala mumiichwemo.

¹⁰Lundi ndatasa babaandu mwinywe, enju eya Isiraeli yosi yosi, babaandu balamenya mu ngoba, ne chingoba chichanjukhwa chilombakhwa lundi.

¹¹Ndamutasa babaandu ne chikhaafu mala mulakucha mube bakali. Ndamukhola babaandu bamumenyemo nga biise bibiabira. Ndamukholela eywe bulayi lukali khukhila nga ne namukholelakho khale. Nono mukhamanye muli ese ndi Omwami Wele.

¹²Ng'ali Ese khalekhuule babaandu bamukeendemo. Baisiraeli base, mukhabe babaabwe mala mube bumenyo bwabwe. Se oreerisia babaana babwe lundi tawe.’ ”

¹³Omwami WELE aloma kano: Sikila babaandu bakhuboolelanga ewe bali “Ewe omuliindi owe babaandu mala wirisia babaana be kholo yowo.”

¹⁴Omwami WELE aloma ali, “Nono luno se olalia babaandu lundi tawe, ne se oreerisia babaana be kholo yowo lundi tawe.”

¹⁵Omwami WELE aloma ali, “Ne se ndakhulekha oulile ke chisoni che chikholo lundi tawe. Lundi se olachangalaasibwa ne babaandu tawe, ne se ndakhola ekholo yenywe yetuye tawe.”

¹⁶Omwami Wele amboolela ali,

¹⁷“Mwana wo mundu, nga Baisiraeli baamenya mu sibala siabwe sisiene, baasifwolobia mu ngila chabwe ne mu bikholwa biabwe, liiba liabwe ebweeni wase liaba nga omukhasi ooli mu ndaalo chewe chimbi.

¹⁸Nio nakhalala nabarafwira lukali sikila babaandu nibo beera mu sibala, ne khulwe bifwaani nibio basifwoloselia.

¹⁹Nabasalanisia mu kholo mala baacha mu sibala sioosi. Nabakhalakila khuloondekhana ne limenya ne bikholwa biabwe.

²⁰Ne kakhali nga boola mu chikholo, buli niio boola bafwolobia lisina liase litakatifu mu lienelio babaandu baloma khu kabwe bali, ‘Bano bali babaandu ba Wele Omunyali Owa Bioosi ne kakhaba kario barura mu sibala siewe.’

²¹Ne kakhali Ese naailisiamo busa lisina liase litakatifu nilio Baisiraeli bafwolobisia mu kholo nicho bachaamo.”

²²Khwako boolela Baisiraeli oli, “Omwami WELE, aloma ali, ‘Ee, Baisiraeli se lili sikila enywe, Ese ndi siimbi khukhola sikholwa tawe, ne likhali sikila lisina liase litakatifu nilio enywe mwafwolobia mu kholo nicho mwachaamo.

²³Ne khakwalaasie butakatifu bwe lisina liase liboofu liliafwolobisibwa mu kholo, lundi nilio enywe mwafwolobie mu kholo mala chikholo chilamanya chili Ese ndi Omwami Wele lundi nise Omwami WELE oolikho ne ndoma, nga khubirira mwinywe Ese ngwalaasia butakatifu bwase mu moni mwabwe.

²⁴Sikila khamukule enywe murusie mu kholo mala mubuusie khukhwama mu bibala bioosi mala mureere mu sibala sienywe sisiene.

²⁵Khamuanyekho kameechi kamakwalaafu mala mube bamiliiu khukhwama mu bunyalu bwenywe bwoosi lundi mukhakwalasibwe khukhwama mu bifwaani bienywe bioosi.

²⁶ Khamuelesie enywe kumwoyo kumuya lundi khare mwinywe roho omuya; ne khamurusiemo kumwoyo kwe libaale mala muelesie kumwoyo kwe nyama.

²⁷Khare roho wase mwinywe mala mukhole enywe muloonde kamalaka kase lundi mube barekeerefu mu khuloonda kamalakiilisia kase.

²⁸Mukhamenye mu sibala nisio naelesia baraara benywe lundi mulaba babaandu base ne Ese ndaba Wele wenywe.

²⁹Khamureesie khukhwama mu sifwabi sienywe sioosi. Ndalaka biakhulia mala mbikhole bibe bikali lukali ne se ndamureerera enywe enjala tawe.

³⁰Ndakhola bibiaamo bie kimirongooro ne bibiaamo bie mu maloba bikuche, nio mukhaba ne chisoni che khunaanisibwa ne njala lundi mu chikholo tawe.

³¹Nio mukhebulile chingila chenywe chimayaanu ne bikholwa bienywe biibi, mukhesonie mwabeene sikila bubwoni bwenywe ne bikholwa bienywe bie sifwabi.

³²Ee Baisiraeli, Ese Omwami WELE se ndakhola ndio sikila enywe tawe, lino limanyikhe khwinywe muambwe chisoni ne khurangaraarwa sikila chingila chenywe.’ ”

³³Ese Omwami WELE ndoma kano: Khu ndaalo niyo Ese khamukwalaasiliemo khukhwama mu bwoni bwenywe, khakhole babaandu bamenye mu chingoba, ne abuundu aali likuunda alombwakhwa lundi.

³⁴Kamaloba kakanjukhwa kalalimwa, kakhaba busa kakaanjukhwa mu moni che babaandu babira boosi tawe.

³⁵Ne babira bakhalome bali, “Sibala sisiaba ne sianjukhwa sino siekeele nga kumukuunda kwa Edeni, ne kamakuunda kakanjukhwa ne chingoba chichatechulwa, luno babaandu bamenyilemo ne khubotookhelesibwa ne kamasiisi.”

³⁶Nono chikholo chicharama chilamanya chili Ese Omwami Wele nombaakhe lundi abuundu aatechukha ne khubiaala kimikuunda kikiaba ne kianjukhwa. Ese Omwami Wele nalomile mala ndalikhola.

³⁷Omwami WELE aloma ali, “Lino liosi khalekhe Baisiraeli bandeebe mbakholeele; babaandu babwe bakuche babe bakali nga kumunyele kwe kamakheese.

³⁸Babe nga kamakheese ke mbosio, nga kamakheese e Yerusalemu mu ndaalo cha naikara. Khwako chingoba chichaba ne chonakakwa chilechulamo babaandu bipupu bikali. Nono bakhamanye bali Ese ndi Omwami Wele.”