Read lubukusu Esek. 37 Bible Online

Esek. 37 - lubukusu bible

Esek. 37

¹Bunyali bwa Wele Omunyali Owa Bioosi bwecha khwise, mala roho wewe aambukula aanjikhisia mwitooma akari; litooma elio liaba liechula bikuumba.

²Aandangirira nabibotookhelela, biaba bikali lukali mwitooma elio, abeele biaba biooma para.

³Nio amboolela ali, “Mwana wo mundu, bikuumba bino binyala biaaba ne bulamu ku?” Ne ese mukobosia ndi, “Yee, Omwami WELE Omunyali Owa Bioosi, ewe niwe omanyile.”

⁴Lundi amboolela ali, “Ng'oolela bikuumba bino obiboolele oli: Ee, enywe bikuumba bibioomu, ulila burume bwa Wele Omunyali Owa Bioosi.

⁵Omwami WELE aboolela bikuumba ali, ‘Lola Ese ndamuraamo kumuuya mala mulaba ne bulamu.

⁶Ndamuraakho chisia che kamafuki mala khole chinyama chimwichekho ne khumurakho sikhoba, ne khumuraamo kumuuya; mulaba ne bulamu mala mulamanya muli Ese ndi Omwami Wele.’ ”

⁷Nio ese nang'oola nga ne nalakwa. Ne nga naba ne ng'oola, luyoka lwabao, mala naulila luyoka lwe bikuumba ne biekhupanakho, mala bikuumba ebio biecha alala, sikuumba khu sikuumba siasio.

⁸Ne nga nalola nabona chisia che kamafuki khu nibio ne chinyama chechilekho, mala sikhoba siabifuuniikhe ne kakhali kimuuya se kwabibaamo tawe.

⁹Wele aamboolela kano: Ng'oola khu miuuya, mwana wo mundu ng'oola, mala oboolele kimiuuya oli, “Omwami WELE aloma ali, ‘yiicha khukhwama chimbeka chine, ee kimiuuya mala ofuelesie khu babeerwa bano boole khuuba ne bulamu.’ ”

¹⁰ Nio nang'oola nga ne nalakwa mala kimiuuya kiabiichamo mala biaaba ne bulamu, bienyokha biema biaaba libuusiana liboofu lukali nga lie banamae.

¹¹Nono Wele amboolela ali, “Mwana wo mundu, bikuumba bino bioosi bili be nju yoosi eya Isiraeli. Baloma bali, ‘Bikuumba biefwe bioomile, ne lilieyikina liefwe liaweele; se khuli ne limenya liliicha tawe.’ ”

¹²Khwako ng'oola obaboolele kano: Omwami WELE aloma ali, “Lola, ndekula biliindwa bienywe mala mulamusie mururemo. Ee, baandu base mala ndamukobosia mu sibala sia Isiraeli.

¹³Ne mulamanya muli Ese ndi Omwami Wele, nga ne khekule biliindwa bienywe mala mulamusie mururemo; ee baandu baase.

¹⁴Khamufuemo kimiuuya kiase, ne mukhabe balamu mala khamure mu sibala sienywe sisiene. Nono mukhamanye muli Ese Omwami Wele nalomaloome mala nakholile ndio.”

¹⁵Omwami Wele amboolela ali,

¹⁶“Mwana wo mundu bukula lusaala mala oandikekho oli, ‘Lwa Yuda mala babaana ba Isiraeli baambaana ne naye.’ Nono bukula lusaala luluundi mala oandikekho oli ‘Lwa Yosefu, (lusaala lwa Efuraimu) ne Baisiraeli boosi babaambaana ne naye.’

¹⁷Chiambaasie chibe lulala nio chikele lusaala lulala mukhono mwowo.

¹⁸Babaandu bowo ne bakhureeba bali, ‘Eku, se olakhuboolela sifuno sia kano tawe?’

¹⁹Baboolele kano: Omwami WELE aloma ali, ‘Lola, Ese ndi siimbi khubukula lusaala lwa Yosefu (luuli kamaani ka Efraimu) ne chikholo cha Isiraeli chichaambaana ne naye mala ndaluambaasia alala ne lusaala lwa Yuda mala njikhole chibe lusaala lulala nio chibe lusaala lulala mu mukhono kwase.’ ”

²⁰“Chisaala nicho oandiikekho ne chili mu mukhono kwowo ebweeni wabwe,

²¹baboolele kano: Omwami WELE aloma ali, ‘Lola Ese khabukule Baisiraeli mbarusie mu kholo nicho bachaamo, mala khababuusie khukhwama mu mbeka choosi mala mbareere mu sibala siabwe.

²²Khabakhole babe ekholo ndala mu sibala, mu bikulu bia Isiraeli, ne omwami mulala akhabamiie boosi. Se baliba lundi bubwami bubwakabukhana abili tawe.

²³Se bakhefwolobie lundi ne bifwaani biabwe ne bibiindu bie khusinya namwe bubwoni tawe. Ne Ese khabaonie khukhwama mu khukobola enyuma nimwo bakholeele bubwoni mbasiinge mbakwalaasie lundi bakhabe babaandu base ne Ese khabe Wele wabwe.

²⁴ Omukholi wase Daudi akhabe omwami wabwe, lundi boosi alala balaba nende omwayi mulala. Bakhaloonde kamalakiilisia kase ne khuuba barekeerefu khuloonda lilaka liase.

²⁵Bakhamenye mu sibala nisio naelesia raarawabwe Yakobo. Mu sibala nimwo baraara babwe baamenyanga; nibo ne babaana babwe ne babechukhulu babwe bakhamenye ebweeneyo buli lwoosi. Daudi omukholi wase akhabe omwami wabwe buli lwoosi.

²⁶Khakhole endakaano eye kumuleembe ne nabo, ekhabe endakaano eya mindali ne nabo. Khababiite chikhabi mala mbakuchisie. Khabombakhemo abuundu wase aatakatifu ababeemo mindali na mindali.

²⁷ Bumenyo bwase bukhabe mu nibo; ne Ese khabe Wele wabwe, ne nibo bakhabe babaandu base.

²⁸Nio chikholo chimanye chili Ese Omwami Wele okwalaasia Isiraeli nga abuundu wase aatakatifu ne ali akari wabwe buli lwoosi.’ ”