Read lubukusu Esek. 38 Bible Online

Esek. 38 - lubukusu bible

Esek. 38

¹Omwami Wele amboolela kano:

² Mwana wo mundu suta chimoni chowo olole Koku owe mu sibala sia Makoku, omwami omukhulu owa Roshi, Mesheki ne Tubali, ng'oola kamabi khu niye,

³mala olome oli, “Omwami WELE aloma ali, ‘Lola, Ese nakhweanyilekho ee Koku, omwami omukhulu owa Roshi, Mesheki ne Tubali.

⁴Ese khakhukaluukhasie mala khukakie chingaki mu nyanyilo chowo lundi khakhukhweese wichilekho ne banamae bowo boosi, chifarasi nende bachitimia, boosi bakangiile buli bulwaani, babaandu bakali, boosi ne bali ne chingabo ne bie khukhweteechela, lundi basutile chimbalu.

⁵Babaandu khukhwama Ebapasha, Kushi ne Putu, bali alala ne nabo. Boosi bali ne chingabo ne chikofio che sichuuma.

⁶Komeri ne banamae bewe boosi, Beti-tokarima khukhwama aleeyi ebunaswa ne banamae bewe boosi, chikholo chingali chili ne nawe.

⁷Yerekekha, ewe ne banamae bowo boosi bakhwibusieo mala ewe obe omunamae wabwe omukhulu.

⁸Enyuma we chindaalo chingali okhalakiilisibwe, mu miiko kimimaliilisi, okhache wibwaakale sibala sie babaandu babakobola khukhwama mwiie, sibala nisio babaandu bebuusiamo khukhwama mu kholo chingali khu bikulu bia Isiraeli, sisiaba ne siachiililila khuuba likuunda. Babaandu basio bareerwa khukhwama mu chikholo mala luno boosi bamenyile mu buliindi bulayi.

⁹Ewe olebwaakala, olecha nga embembeesi; ewe ne banamae bowo boosi olaba nga lifuumbi lifuunikha sibala, ne chikholo chingali chiilaba ne nawe.’ ”

¹⁰Omwami WELE akhuboolela ewe Koku ali, khu ndaalo eyo kamebaasio kalingila mu mwoyo kwowo mala okharekekhe lirekekha lie bubwoni.

¹¹Okhalome oli, “Ndaniina nje nibwaakale sibala sie birekere bikhakarwa ne kamasiisi tawe. Ndapania babaandu ba baamenya mu muleembe ne mu buliindi. Boosi bakhamenya mu ngoba chichabotookhelelwa ne kamasiisi tawe, lundi baakhali ne biilibwa bie biibia tawe.

¹²Khufwakhila kimiaandu, khuyaaya ne khurekukha nakio. Khukhwibwaakala chingoba chichaba kamakuunda ne luno chilimo babaandu bababuusibwa khukhwama mu kholo choosi, bali luno ne chikhaafu ne bibiindu, bamenyile luno akari we sibala.

¹³Babaandu ba Sheba nende ba Dedani nende baboofuli ba Tarishishi ne birekere biasio bioosi bakhakhureebe ewe bali, ‘Eku, ewe wechile khuyaaya kimiaandu? Eku, ewe wabuusiisie banamae bowo khusuta nibio oyaayile; khubukula efwesa ne sahabu, khubukula chikhaafu ne kimiaandu ne khufwakhila kimiaandu kimikali?’ ”

¹⁴Khwako, mwana wo mundu, ng'oola mala oboolele Koku kano: Omwami WELE aloma ali, “Mu ndaalo nicho Baisiraeli base baliba ne bamenyile mu muleembe, ewe okharakikhe lukeendo.

¹⁵Okhaame ewowo, aleeyi ebunaswa, ewe ne chikholo chingali alala ne nawe, boosi bakhabe batimia chifarasi, banamae bakali lundi be kamaani.

¹⁶Okheche wibwaakale Baisiraeli base nga lifuumbi ne lifuunikha sibala. Mu ndaalo chimaliilisi khakhureere wibwaakale sibala siase, nio chikholo choole khu khuumanya Ese nga bakhabone Ese ne nekesia butakatifu bwase ebweeni wabwe khubirira mwiwe ee Koku.”

¹⁷Omwami WELE areeba ali, “Eku, ewe se oli niwe niye Ese nalomalomakho mu ndaalo chichabira khubirira mu bakholi base, bang'oosi ba Isiraeli, babang'oola mu ndaalo echo khulwe kimiiko kimikali bali Ese khakhureere obebwaakale?”

¹⁸Omwami WELE aloma ali, “Ne khu ndaalo eyo, nga Koku alicha khukhwibwaakala sibala sia Isiraeli, Ese khakhalale lukali.

¹⁹Sikila mu sikhalikhali siase, ne mu lirima liase lirafu Ese nechuba ndi, ‘Khu ndaalo eyo literema likali likhabe mu sibala sia Isiraeli.

²⁰Buli ng'eeni eye mu nyanja ne chinyuni che mu ngaaki, ne chisaang'i che mundaa nende bioosi bimoolanga khu liloba; ne babaandu boosi baali khu sibala bakhatereme ebweeni wase sikila bamboone. Ne bikulu bikhakwe asi ne chimbangaachi choosi chikhakwe asi ne buli lisiisi likhatechukhe likwe asi.’ ”

²¹Omwami WELE, aloma ali, “Ese khalaange busiku bwoosi bwibwaakale Koku. Buli mundu khu baandu bewe akhabanulile wandaaye embalu.

²²Khamukhalakile lufu ne khuchukha sifuki. Khalekhuule efula engali eya namatoa, eye kamaarara, kumulilo ne kumulilo kumubuusi khu niye ne banamae bewe nende khu kholo choosi chiili alala ne naye.

²³Khwako khekesie bunyali bwase ne butakatifu bwase mala khole samwene manyikhane mu kholo chingali. Nio bakhamanye bali Ese ndi Omwami Wele.”