Read lubukusu Esek. 39 Bible Online

Esek. 39 - lubukusu bible

Esek. 39

¹Ne ewe mwana wo mundu, ng'oola busiku khu Koku olome kano: Omwami WELE aloma ali, “Lola Ese nakhweanyilekho ee Koku, omwami owa Roshi, Mesheki ne Tubali.

²Ne Ese ndakhuyuusia mala khuyile ebweeni, mala khurusie khukhwama aleeyi mu bibala bie bunaswa, lundi khuraangirire wibwaakale bikulu bia Isiraeli.

³Ese ndapa buyiingo bwowo bukwe khukhwama mu mukhono kwowo kumukhasi, lundi khole buembo bwowo bukwe khukhwama mu mukhono kwowo kumuseecha.

⁴Okhafwiile khu bikulu bia Isiraeli, ewe alala ne banamae bowo boosi ne chikholo chiili alala ne nawe. Khakhuane khu nyuni nende buli solo chikhulie.

⁵Okhafwiile mu lukoongo, sikila Ese Omwami WELE nalomaloome.

⁶Khayile kumulilo khu Makoku nende khwaabo bamenyile mu muleembe mu bibala bie khu nyanja; mala bakhamanye bali Ese ndi Omwami Wele.

⁷Ne Ese khakhole lisina liase litakatifu limanyikhe mu Baisiraeli base. Ne se khalekhe lisina liase litakatifu lifwolobisibwe lundi tawe. Ne chikholo chikhamanye chili Ese ndi Omwami Wele, Omutakatifu owa Isiraeli.”

⁸Omwami WELE aloma ali, “Lola endaalo elikho yiicha mala elareerwa. Yino niyo endaalo niyo nalomalomakho.

⁹Nono babaandu ba baamenya mu ngoba cha Isiraeli balarura bache babuusie boosie bulwaani buulekhiilwe. Bakhosie chingabo, buyiingo, buembo, kamafumo ne chiruungu. Bakhabiore khulwe kimiiko saba.

¹⁰Se bakhareenye chiikhu mundaa namwe bareme lwosi lwosi khukhwama mu musiru tawe, sikila bakhabwaane bulwaani nibwo baalekha nga chiikhu. Balayaaya bibiindu bia abo babayaaya ne khunuula. Omwami WELE aalomile.”

¹¹“Khu ndaalo eyo, Ese khaelesie Koku abuundu e khumusiikha mu Isiraeli; litooma lia Be khu Lukeendo, ebukwe we Nyanja eya chumbe, ekhakhinge engila eye babaandu be khu lukeendo, sikila Koku ne banamae bewe bakali bakhasiikhwe abwenao. Akhalaangwe, ‘Litooma lia Hamoni Koku.’

¹²Sikila khu mieesi saba Baisiraeli bakhabe balikho basiikha bafu khulwe khukhweya khukwalaasia sibala.”

¹³Omwami WELE aloma ali, “Babaandu boosi be mu sibala bakhayeete khubasiikha mala bakhaelesibwe lukoosi khu ndaalo niyo Ese khekeseliekho luyali lwase.

¹⁴Bakharobore babaandu be siseecha bache babire mu sibala sioosi busiele ne basiikha bafu ba baaba ne barama mu sibala nio basikwalaasie. Khu mieesi saba bakhakhole bario.

¹⁵Ne nga bano bakhabire mu sibala mwoosi, ne omundu yesi yesi ne abona sikuumba sio mundu araao simanyisio, khukhwola nga abo basiikha ne basisiikha mu Litooma Hamoni koku.

¹⁶(Lukoba Hamona lwosi luliyo) Khwako bakheye sibala sikwalaale sirio.”

¹⁷ Omwami WELE aloma kano: Ne khwiwe mwana wo mundu: Lomaloma khu nyuni chingano choosi ne khu solo che mundaa oli, “Khe mwibuusie alala mala mwiche, khe mwibuusie khukhwama chimbeka choosi khu naikara eye mbosio niyo Ese ndikho murekekhera enywe naikara eye mbosio emboofu khu bikulu bia Isiraeli, mala mulie chinyama ne khunywa kamafuki.

¹⁸Balalia chinyama che baafu be bunyali mala munywe kamafuki ke babaami be sibala, boosi bali nga kamamiiku, kamameeme ne chimbusi. Nga chikhaafu boosi bali banefu be Bashani.

¹⁹Mulalia kiminawa khukhwola nga mwikura; lundi mulanywa kamafuki khukhwola nga mulameelela a naikara eye mbosio niyo Ese ndikho murekekhera.

²⁰Ne a sialwa wase mulekura chifarasi ne babaandu bachitimianga, mulekura banaitiriani be kamaani ne banamae chingano choosi. Ese Omwami WELE nalomile”

²¹Omwami Wele aloma ali, “Ese khare luyali lwase mu kholo choosi, mala chikholo choosi chikhabone likhalaka liase nilio Ese khalake ne busiro bwe kumukhono kwase nikwo mbareerekho.

²²Baisiraeli balamanya bali Ese ndi Omwami Wele, Wele wabwe khukhwama endaalo eyo ne khuchiililila.

²³Ne chikholo chilamanya chili Baisiraeli bacha mu mbaambe sikila bubwoni bwabwe, sikila baba baabacha khwise nio nekisa bakhambona tawe, mala nabara mu makhono ke basiku babwe mala boosi beerwa ne mbalu.

²⁴Nabakhola khuloondekhana ne sifwabi siabwe ne bubwoni bwabwe mala nekisa bakhambona tawe.”

²⁵Omwami WELE aloma ali, “Luno ndakobosia lisaaye lia Yakobo ne khukholela siisa Baisiraeli mala ndaba ne siikhalikhali sikila lisina liase litakatifu.

²⁶Bakhebilile chisoni chabwe ne bubacha bwabwe bwoosi nibwo bakholela Ese nga ne baliba ne bamenyile mu muleembe mu sibala siabwe ne bakhali no mundu yesi yesi oobariikhirisia tawe.

²⁷Nga Ese ne ndiba ne mbakoboosie khukhwama mu kholo choosi ne khubabuusia khukhwama mu bibala bie basiku babwe; ne khubirira mu nibo, nekesie butakatifu bwase ebweeni we chikholo chingali.

²⁸Nio babaandu base balamanya bali Ese ndi Omwami Wele, Wele wabwe, sikila nabayila mu mbaambe mu chikholo, lundi nababuusia mu sibala siabwe babeene. Se khalekhe yesi yesi khu nibo arame mu kholo echo lundi tawe.”

²⁹Omwami WELE aloma ali, “Ne se khekise lundi khukhwama khu nibo tawe, nga ne khachukhe roho wase khu Baisiraeli.”