Read lubukusu Esek. 4 Bible Online

Esek. 4 - lubukusu bible

Esek. 4

¹Wele aaloma ali, “Mwana wo mundu, bukula litifari ore ebweeni wowo, mala obwatakekho sifwaanani sie lukoba lwa Yerusalemu.

²Ne khufwaanania liliibuulila, yaba lubachangu, yombakha lisiisi, khola bibiabuusi, ne khulukara ne kimitalaachi kie khuteecha.

³Lundi bukula esaani eye sichuuma mala okikhole ebe nga lisiisi akari wowo ne lukoba. Luloleelele nga lulwibuuliilwe, ne niwe oolikho ne olwibuulila. Sino sili simanyisio sie nju eya Isiraeli.

⁴“Nio okonele lubeka lwowo lukhasi ne ese ndakhura khwiwe siuukuumo sie be nju eya Isiraeli khulwe bukali bwe chindaalo nicho olakonelakho, olabukula siuukuumo siabwe.

⁵Sikila ese nakhulakile chindaalo chimia chitaru ne kamakhumi tisa, chilaba tekete ne bukali bwe kimiiko kie siuukuumo siabwe, buli ndaalo yimeelela kumwiiko mulala, olasuta siuukuumo sie be nju eya Isiraeli khu siise esio.

⁶Ne nga ne omala chindaalo chino olakona asi lundi, mala olakonela lubeka luseecha, orio olabukula siuukuumo sie be nju eya Yuda khulwe chindaalo kamakhumi kane, nakhulakile ewe, buli ndaalo yimeelela kumwiiko mulala.

⁷Ne ewe wiluungikhe liliibuulila lia Yerusalemu olwekeselele lulwala lwowo mala ong'oole ke lukoba.

⁸Ne lola ese ndakhuboa kiminyololo nio okhanyala khuyuukha lubeka lwosi lwosi tawe, khukhwola nga ne omala chindaalo che liliibuulila liowo.

⁹“Lundi bukula bufu bwe ngano, eshayiri, kamakaanda, chibalaayo, buulo ne bufu bunosie, obutubaasilie mu sipanga silala, mala obung'oonemo kimikaati. Mu ndaalo chimia chitaru ne kamakhumi tisa, che khukonela lubeka lukhasi lwowo, okhalichenge kimikaati kino.

¹⁰Okhalichenge chikuramu chimia chibili ne kamakhumi kataru che siakhulia, lulala khu ndaalo.

¹¹Olanywa kameechi bikoombe bibili biong'ene khu ndaalo.

¹²Lundi okhabukule siakhulia sie shayiri mala ositeekhele khu mulilo kwe biibi bie babaandu mala olie babaandu ne baloleleele.”

¹³Ne Wele Omunyali Owa Bioosi aloma ali, “Kano keekesia nga babaandu ba Isiraeli bakhalie biakhulia mu kholo nimwo ndibayila.”

¹⁴Nio ese naloma ndi, “Ee, Omwami WELE! Lola, ese khenyaalutiakho khukhwama mu buele bwase khukhwola luno tawe. Ese khaliaakho esaang'i yosi yosi efwiile eng'ene, namwe niyo esolo yiirire tawe, lundi sisiindu sinyaalu sikhengilakho mukhanwa mwase tawe.”

¹⁵Nio Wele Omunyali Owa Bioosi amboolela ali, “Bona ndakhuelesia kamasisie ke chikhaafu mu bweyaangu bwe biibi bie babaandu niko olateekhela siakhulia siowo.”

¹⁶Khutasa khwako aamboolela ali, “Mwana wo mundu lola, ese nja khwonaka linyoola lie siakhulia mu Yerusalemu, babaandu ba Yerusalemu balalia siakhulia sie sikelo, ne buuri bukali, mala balanywa kameechi kamapiimwa mukhuayaaya.

¹⁷Ese khakhole ndio bataambe biakhulia ne kameechi mala baloleelelane, buli mundu no wasie mu khuayaaya mala bang'ayile mu bwoni bwabwe.”