Read lubukusu Esek. 40 Bible Online

Esek. 40 - lubukusu bible

Esek. 40

¹Mu mwiiko kukhola kimiiko kamakhumi kabili na kiraano kie mbaambe yefwe, kumwiiko ne kurakikha, khu ndaalo eye khumi, mu mwiiko kwe khumi na kine, enyuma we khuambwa khwa Yerusalemu, khu ndaalo eyo ne ng'ene bunyali bwo Mwami Wele bwaba khwise.

² Ne andeera ne ndi mu malola mu sibala sia Isiraeli, mala anjikhisia khu sikulu sileeyi lukali. Ebweeni wase nabona sisiindu sisiafwaana nga lukoba.

³ Nga ne andeera ebweeneyo, lola, abayo omundu owe lukoondo nga kumukasa. Omundu yuno aaba ne lukoye lwe buusi bung'enang'ena ne sisele sie khupiimila mukhono mwewe. Aaba emile e silibwa.

⁴Ne omundu oyo amboolela ali, “Mwana wo mundu, lola ne chimoni chowo mala oulile ne kamaru kowo, lundi ra kamebaasio kowo khu koosi niko ndikho nja khukhwekesia. Sikila ewe wareerirwe ano nio ese noole khukhwekesia. Boolela Baisiraeli koosi niko obona.”

⁵ Ne lola, lisiisi liabao liabotookhelesia enje we Lukaangu. Ne buleeyi bwe sisele sie khupiimila sisiaba mukhono mwo mundu oyo siaba chimita chitaru, mala aapiimila lisiisi. Bukhiikha liaba chimita chitaru, buleeyi bwe khucha angaaki chimita chitaru.

⁶Nio aacha mu silibwa sisialola ebukwe, aaniina khu situumi siasio aapiima ebwingililo bwe silibwa; khukhwama khu ngaaki khucha asi siaba chimita chitaru,

⁷ne chisiro che a lubeka chaba chimita chitaru bukhiikha, ne eye akari we chisiro yaba bubalaayi bwe chimita chibili ne nusu, ne khasiro khe silibwa ebweeni we ngila e lusiro we khufwaruriramo lulwaloleelela Lukaangu chimita chitaru.

⁸Nio aapiima lusiro lwe khukhwefulilamo mukari e silibwa lwaba chimita chine.

⁹Nio aapiima lisiisi liliaba emita ndala buboofu. Lusiro lwe khukhwefuulilamo lwaba mukari siimbi lukali ne Lukaangu.

¹⁰Ne chisiro chabaao chitaru chimbeka chombi che ngila e silibwa sie bukwe. Chisiro chino chaba chaleekhaana busa ne buboofu bwe lisiisi; buli lubeka liaba lialeekhaana.

¹¹Nono omundu oyo aapiima bubalaayi bwe ngila eye silibwa, yaba chimita sita ne nusu ne bubalaayi bwe silibwa bwaba chimita chiraano.

¹²Ebweeni we chisiro che buliindi, lisiisi liliimbi liabaao chisendimita kamakhumi karaano khucha angaaki ne chisendimita kamakhumi karaano buboofu.

¹³Nio aapiima buleeyi khukhwama khwisiisi lie nyuma lie lusiro khukhwola khwisiisi lie nyuma ne okhalisia engila, liaba chimita ekhumi na chibili ne nusu.

¹⁴Lusiro lwe aleeyi lwaba ne ngila eecha khu luuya lwe enje. Aapiima buleeyi bwe lusiro olwo, lwaba chimita ekhumi bubalaayi.

¹⁵Buleeyi bwoosi bwe ngila yoosi khukhwama khwisiisi lie enje lie silibwa, khukhwola lubeka lwe khu ndulo khwe lusiro lumaliilisi lwaba chimita kamakhumi kabili na chiraano.

¹⁶Chinuma chabaao khumasiisi ke nje koosi ke chisiro, akhaba kamasiisi ke mukari akari we chisiro. Khwaba ne kamakheendu niko bara khu masiisi ke mukari kakaloleelela silibwa.

¹⁷Nio aambila mu luuya lwe enje, chisiro ne luuya lwe kamabaale, bioosi biabotookhela luuya. Chisiro kamakhumi kataru ebweeni we luuya lwe kamabaale.

¹⁸Luuya lwe kamabaale lwabira asilibwa, lwaba lulekhaana ne silibwa buleeyi, luno lwaba luuya lwe mwalo.

¹⁹Yabao engila eye angaaki eyachichanga mu luuya lwe mukari, omundu oyo aapiima buleeyi akari we bilibwa bibili, aanyoola chimita kamakhumi karaano.

²⁰Nio omundu oyo aapiima buleeyi ne bubalaayi bwe silibwa sie bunaswa sisiachichanga khu luuya lwe nje.

²¹Chisiro chitaru che buliindi chaba buli lubeka lwe ngila akari we kamasiisi ne chisiro, ne lusiro lwe amuliango; bioosi biaba ne buleeyi ne bubalaayi bubwakana nende biili mu silibwa sie bukwe. Buleeyi bwoosi bwe silibwa bwaba chimita kamakhumi kabili na chiraano ne bukhiikha chimita likhumi na chibili ne nusu.

²²Lusiro lwe khunyoa, kamatirisia, ne kamakheendu kakefuumba biaba nga ebio bibiaba mu silibwa sie bukwe. Ano biaba bikele saba bie khuniina khukhwama khu silibwa, ne lusiro lwe muliango lwaba khu ndulo, lwaloleelela khu luya.

²³Nga ne obira luuya khukhwama khu silibwa sie ebunaswa, bulayi bwene nga sie ebukwe, silibwa sisiindi siabaao siicha khu luuya lwe mukari. Omundu oyo aapiima buleeyi akari we bilibwa bibili bino mala aanyoola ali bili chimita kamakhumi karaano.

²⁴Lilialoondakho, omundu yuno ambila elubeka lwe siafubo, mala silibwa sisiindi siabaayo. Aapiima buleeyi bwe kamasiisi ke mukari ne lusiro lwe muliango, mala bialekhaana busa ne bibiindi.

²⁵Kamatirisia kaba khu siro che silibwa bulayi bwene nga chichiindi. Buleeyi bwoosi bwe silibwa bwaba chimita kamakhumi kabili na chiraano, ne bubalaayi chimita ekhumi na chibili ne nusu.

²⁶Biaba bikele saba bie khuniina khukhwola khu silibwa, ne lusiro lwe muliango lwaba khu ndulo khukhwaloleelela luuya. Khwaba ne kamakheendu kakafuumbwa khu masiisi ke mukari kakaloleelela khu ngila.

²⁷Ano osi silibwa sisialoleelela khu luuya lwe mukari siabaao. Omundu oyo aapiima buleeyi khucha khu silibwa sie khabili sino, bwaba chimita kamakhumi karaano.

²⁸Nio omundu oyo aandeera khu luya lwe mukari khubirira mu silibwa sie siafubo, mala aapiima silibwa sie siafubo, siaba silekhaana ne bilibwa bibiindi.

²⁹Chisiro che lubeka, chisiro che buliindi nende chichiingila mukari chaba chilekhaana busa ne chichiindi, kamatirisia kabaakho buli lubeka ne khu chisiro che buliindi, buleeyi bwalwo bwaba chimita kamakhumi kabili na chiraano ne bubalaayi ekhumi na chibili ne sisiinja.

³⁰Ne khwabao ne chisiro che mukari buli lubeka, buleeyi chimita ekhumi na chibili ne sisiinja ne bukhiikha chimita chibili ne sisiinja.

³¹Lusiro olwo lwaloleelela luuya lwe enje, ne kamakheendu kaba khu siro che buliindi buli lubeka, ne engila yasio yaba bikele munaane bie khuniinilakho.

³²Nio omundu oyo aandeera khu luuya lwe mukari elubeka lwe bukwe mala aapiima buleeyi bwe silibwa. Siaba busa nga bibiindi.

³³Chisiro che lubeka, chisiro che buliindi ne chisiro che mukari, chaba busa nga chichiindi, chabaakho kamatirisia buli lubeka ne khu lusiro lwe mukari; buleeyi bwaba chimita kamakhumi kabili na chiraano ne bukhiikha chimita ekhumi na chibili ne nusu.

³⁴Lusiro lwe muliango lwaloleelela khu luuya lwe nje mala lwaba ne kamakheendu khu siro che buliindi chimbeka chombi, ne engila yalwo yaba bikele munaane bie khuniinilakho.

³⁵Nio omundu oyo aandeera mu silibwa sie bunaswa aasipiima buleeyi; siaba busa nga bibiindi.

³⁶Siaba ne chisiro che lubeka, che buliindi nende che mukari chicharonwaronwa, lusiro lwe khucha mukari lwaba ne kamatirisia buli lubeka, buleeyi bwako bwaba chimita kamakhumi kabili na chiraano ne bukhiikha chimita ekhumi na chibili ne nusu.

³⁷Lusiro lwe muliango lwaba lwaloleelela khu luuya lwe nje. Kamakheendu kaba khu siro che buliindi buli lubeka; ne engila yalwo yaba bikele munaane bie khuniinilakho.

³⁸Khu luya lwe nje yabao enju eyetiila khu silibwa sie mukari sisialoleelela ebunaswa. Enju yino yaba yaloleelela mu lusiro lwe mukari lulwaloleelela khu luya lwe nje niio basiingilanga chinyama che chisaang'i che chimbosio che khukhwosia.

³⁹Mu lusiro lwe muliango luno, chimesa chine chabaamo, chibili buli lubeka lwe lusiro. Khwaba khu mesa chino nikhwo beereranga chisaang'i che chimbosio che khukhwosia ne chimbosio che khurusiao bubwoni nende che kumuruungo kwe khurusiao bumayaanu.

⁴⁰Enje we lusiro, chabao chimesa chine chifwaanane, chibili buli lubeka lwe silibwa sie bunaswa.

⁴¹Choosi chaba chimesa munaane nicho beererangakho chimbosio chine mu lusiro mukari ne chine enje khu luya.

⁴²Chimesa chine che kamabaale kamabeeche chino, mu nju ekiindi endasakho; charumikhwanga khurekekha chimbosio che khukhwosia. Chaba chisendimita kamakhumi karaano khucha angaaki, ne lulama lwacho lwaba chisendimita kamakhumi saba na chiraano buli lubeka. Buli siindu sisiarumikhanga mu khwira chisaang'i che chimbosio chino siabiikhwangwa khu mesa chino.

⁴³Ne chingaki buleeyi bwe kumukhono mulala chaba khu ndulo khwe chimesa echo mukari. Chinyama choosi che chimbosio charechwangwa khu mesa khu ngaaki.

⁴⁴Nio aandera khu luya lwe mukari; chabao chisiro chibili chichaloleelela khu luya lwe mukari. Lulala lwaloleelela siafubo siimbi ne silibwa sie bunaswa ne luluundi lwaloleelela ebunaswa embi ne silibwa sie siafubo.

⁴⁵Omundu oyo aamboolela ali, “Lusiro lulwaloleelela siafubo luli lwe basaayi babemeelelanga mu Lukaangu.

⁴⁶Ne lusiro lulwaloleelela ebunaswa, luli lwe basaayi babemeelelanga khu alutare. Basaayi boosi bamanga khu lisaaye lia Satoki. Nibo bong'ene be lisaaye lia Lawi, bafukiililwa khucha ebweeni wa Wele Omunyali Owa Bioosi.”

⁴⁷Omundu oyo, aapiima bubalaayi bwe luuya lwe mukari; lwaba chimita kamakhumi karaano buli lubeka. Alutare yaba ebweeni we Lukaangu.

⁴⁸Nio aambila mu lusiro lwe muliango kwe Lukaangu mala aapiima chisiro che buliindi nende che mukari. Chaba chimita chibili ne nusu chimbeka chichaloleelelana, ne bubalaayi bwe silibwa chimita saba, ne lisiisi lie khu silibwa emita ndala ne nusu chimbeka chombi.

⁴⁹Engila yabaao eye khuniinilakho khu lusiro lwe khucha mukari. Lusiro olwo lwaba bubalaayi chimita ekhumi ne chimita sita khucha asi. Chinjeko chibili chaba khu ndulo khwe chisiro che buliindi, buli lubeka enjeko ndala.